Tag: نجیب اللہ

گلگت : دنیا کی بلند ترین سائیکل ریلی اپنے اختتام کو پہنچ گئی، فائنل واپڈ ا کے کھلاڑی نجیب اللہ نے اپنے نا م کرلیا، صدر مملکت ڈاکٹر عارف علوی بھی تقریب میں شرکت کررہے ہیں۔

تفصیلات کے مطابق پاکستان کے شمالی علاقہ جات میں جاری ’ ٹور ڈی خنجراب ‘ سائیکل ریلی اختتام پذیر ہوگئی ، پہلے نمبر پر نجیب اللہ اور دوسرے نمبر پر ہنزلہ نے کامیابی حاصل کی ۔

فائنل مرحلے میں نجیب اللہ نےسب سے پہلے سوست سےخنجراب ٹاپ تک کافاصلہ طے کیا۔ بلوچستان سے تعلق رکھنے والے ہنزلہ دوسرے نمبرپرخنجراب ٹاپ پہنچنے میں کامیاب ہوئے۔

اس کامیابی پر نجیب اللہ فرطِ مسرت سے آب دیدہ ہوگئے اور کہا کہ اس کامیابی پر اللہ کا شکر گزار ہوں ، یہ سب بڑے بھائی کی مدد کی بدولت ممکن ہوا

یاد رہے کہ ٹور ڈی خنجراب دنیا کے بلندترین مقام پر منعقد ہوتا ہے ، یہ 4200 فٹ کی بلندی پر گلگت سے شروع ہوتا ہے اور 15300 فٹ کی بلندی پر خنجراب پر اختتام پذیر ہوتا ہے ، یہ ٹور ہنزہ سے ہوتا ہوا خنجراب تک جاتا ہے کہ جو کہ قدیم شاہراہ ریشم ہے۔

ٹور ڈی خنجراب کی اختتامی تقریب آج ہنزہ میں منعقد ہوئی جس میں صدر مملکت ڈاکٹر عارف علوی اس تقریب میں مہمانِ خصوصی ہیں۔ صدر مملکت کا استقبال گورنر گلگت بلتستان راجہ جلال حسین نے کیا۔

ٹورنامنٹ میں نجیب اللہ اور ہنزلہ کے علاوہ سوئی گیس کے عبدالرزاق اور رضوان، آرمی کے عبداللہ خان اور عابد صدیقی نمایاں رہے۔