Tag: نسٹ

اسلام آباد: وزیر اعظم عمران خان کا کہنا ہے کہ میرٹ کا سسٹم نیچے جانے سے پاکستان پیچھے چلا گیا، تعلیم کے شعبے میں ہم بہت پیچھے رہ گئے ہیں۔

تفصیلات کے مطابق وزیر اعظم عمران خان نے نسٹ میں تقریب سے خطاب کرتے ہوئے کہا کہ فواد چوہدری کی ٹی وی پر پرفارمنس لوگوں نے دیکھی ہے، لوگ کہتے تھے آپ سنجیدہ نہیں انہیں سائنس و ٹیکنالوجی کا وزیر کیوں بنایا۔ اچھے کپتان کو پتہ ہوتا ہے اچھے پلیئرز کو کس وقت کھلانا ہوتا ہے۔

وزیر اعظم نے کہا کہ سائنس و ٹیکنالوجی کے لیے جو جنون فواد چوہدری نے دکھایا اس پر داد دیتا ہوں۔ مجھے اندازہ نہیں تھا کہ اس یونیورسٹی میں کتنا زبردست کام ہو رہا ہے۔ ہر چیز ایک وژن سے شروع ہوتی ہے۔

انہوں نے کہا کہ میں نے پاکستان کی اہمیت بڑھتے اور گرتے ہوئے بھی دیکھی، ہمارے اسکول کے زمانے میں پاکستانیوں میں اعتماد ہوتا تھا۔ بھارت میں کرکٹ کھیلنے جاتے تو احساس ہوتا تھا کہ بڑے اہم ملک سے آئے ہیں، میرٹ کا سسٹم نیچے جانے سے پاکستان پیچھے چلا گیا۔

وزیر اعظم نے کہا کہ پاکستان کی ٹاپ یونیورسٹی نسٹ کے طالب علموں پر بڑی ذمہ داری ہے، تعلیم کے شعبے میں ہم بہت پیچھے رہ گئے ہیں۔ ہمیں معلوم ہی نہیں ہوتا کہ ہم کیا بن سکتے ہیں اور کیا بن گئے۔

انہوں نے کہا کہ اللہ نے انسان کو بے پناہ صلاحیتوں سے نوازا ہے، اپنی صلاحیت کو استعمال کرنے کے لیے بڑا خواب چاہیئے، کوئی بھی بڑا وژن ہوتا ہے وہ اپنی ذات سے بڑھ کر ہوتا ہے۔ دنیا کی تاریخ اسے جانتی ہے جس نے پیسے سے انسانوں کے لیے کچھ کیا ہو، جنون صرف دل میں ہوتا ہے ہمیشہ اپنے دل کے راستے پر چلو۔

وزیر اعظم کا کہنا تھا کہ اگر ٹیلنٹ اور جنون کا مقابلہ ہو تو جنون اس کو ہرا دیتا ہے، جب کوئی مشکل آتی ہے تو وہ آپ کو سیکھنے کا موقع فراہم کرتا ہے۔ برا وقت جب بھی آتا ہے تو کئی دفعہ حوصلہ شکنی کا شکار بناتا ہے۔ جب آپ کشتیاں جلا دیتے ہیں اس وقت صحیح معنوں میں طاقت سامنے آتی ہے۔

انہوں نے کہا کہ جمہوریت میں میرٹ اور احتساب کا اہم کردار ہوتا ہے، بادشاہت کبھی جمہوریت کا مقابلہ نہیں کر سکتی۔ خاندانی سیاست جمہوریت کی نفی ہے۔ خون پر لیڈر بنیں گے تو یہ جمہوریت کی نفی ہوگی۔