نئی دہلی: بھارت میں دوران پرواز ایئرہوسٹس سے بدتمیزی کرنے والے نوجوانوں کو گرفتار کرلیا گیا۔
بھارتی میڈیا رپورٹس کے مطابق دہلی سے پٹنہ جانے والی پرواز میں تین مسافروں نے ہنگامہ برپا کردیا اور ایئرہوسٹس سے بدتمیزی کرنے لگے جب کپتان نے سمجھانے کی کوشش کی تو اس سے بھی الجھ پڑے۔
تینوں مسافر نشے میں دھت ہوکر کپتان کو مارنے لگے پرواز کے پٹنہ ایئرپورٹ پر لینڈ کرتے ہی دو مسافروں کو گرفتار کرلیا گیا جبکہ ایک مسافر فرار ہوگیا۔
میڈیا رپورٹس کے مطابق گرفتار مسافروں میں نتن اور روہت کمار شامل ہیں جبکہ ان کے ساتھ موجود تیسرا نوجوان پنٹو فرار ہونے میں کامیاب ہوگیا، مسافر ایئرپورٹ پر خود کو صحافی ظاہر کرتے رہے تاہم آئی ایس ایف نے انہیں گرفتار کرکے قریبی تھانے منتقل کردیا۔
آئی ایس ایف کا بتانا ہے کہ دونوں مسافر حاجی پور علاقے کے رہائشی ہیں جبکہ پولیس پنٹو کی تلاش میں چھاپے مار رہی ہے۔
واضح رہے کہ اس سے قبل بھی انڈیگو کی پرواز میں نشے میں دھت مسافروں کی جانب سے طیارے کے عملے اور مسافروں کے ساتھ جھگڑے کے واقعات پیش آچکے ہیں۔
