ڈپٹی کمشنر لاہور نے امن و امان کی صورتحال خراب کرنے کے خدشات کے تحت تحریک انصاف کی کارکن خدیجہ شاہ کو 30 دن کے لیے نظر بند کرنے کے احکامات جاری کردیے۔

ڈپٹی کمشنر لاہور کے آفس سے جاری نوٹیفکیشن میں کہا گیا ہے کہ خدیجہ شاہ 9 مئی کو پُرتشدد کارروائیوں میں شریک رہیں، ان کے خلاف مواد کا جائزہ لیا گیا وہ دوبارہ امن و امان کی صورتحال خراب کر سکتی ہیں۔

اس میں کہا گیا ہے کہ امن و امان کی صورتحال برقرار رکھنے کے لیے خدیجہ شاہ کو 30 دن کے لیے نظر بند کیا جاتا ہے، نوٹی فکیشن کے مطابق خدیجہ شاہ کو ایس پی کینٹ اور ڈسٹرکٹ انٹیلی جنس برانچ کی سفارش پر نظر بند کیا گیا۔

واضح رہے کہ 15 نومبر کو لاہور کی انسداد دہشت گردی کی عدالت نے خدیجہ شاہ کے خلاف 9 مئی سے متعلق چوتھے اور آخری مقدمے میں ضمانت بعد از گرفتاری کی درخواست منظور کی تھی۔

یاد رہے کہ خدیجہ شاہ نے 9 مئی ہنگامہ آرائی کے الزامات میں 23 مئی کو خود کو لاہور پولیس کے حوالے کردیا تھا۔

راولپنڈی: پاکستان تحریک انصاف (پی ٹی آئی) کے نظر بند 13 کارکنان کو اڈیالہ جیل سے رہا کر دیا گیا۔

تفصیلات کے مطابق پاکستان تحریک اںصاف (پی ٹی آئی) کے نظر بند 13 کارکنان کو اڈیالہ جیل سے رہا کردیا گیا، جن کی نظربندی کی مدت مکمل ہوگئی تھی۔

جیل ذرائع کا کہنا ہے کہ کارکنان کو نظر بندی مدت مکمل ہونے پر اڈیالہ جیل سے رہا کیا گیا، گزشتہ 2 روز میں 19 کارکنان کو اڈیالہ جیل سے رہا کیا گیا۔

 ذرائع نے مزید بتایا کہ ضلعی انتظامیہ کے احکامات پر نقص امن کے پیش نظر کارکنان کو حراست میں لیا گیا تھا۔

یاد رہے کہ 9 مئی کو پاکستان تحریک انصاف کے چئیرمین کو القادر ٹرسٹ کیس میں اسلام آباد سے گرفتار کیا گیا تھا جس کے فوری بعد ہی ملک کے مختلف شہروں میں پرتشدد احتجاج کا سلسلہ شروع ہوا تھا۔

 ان مظاہروں کے نتیجے میں توڑ پھوڑ، سرکاری و عسکری املاک سمیت کئی اہم عمارتوں کو بھی نقصان پہنچا، ان مظاہروں کے دوران اور بعد میں تحریک انصاف کے رہنماؤں اور کارکنوں کو ایم پی او کے تحت گرفتار کیا گیا تھا۔