اسلام آباد : انٹیلی جنس بیورو کے بعد پاکستان الیکٹرانک میڈیا ریگولیٹری اتھارٹی (پیمرا) نے فیض آباد دھرنا کیس میں نظر ثانی درخواست واپس لینے کا فیصلہ کرلیا۔
تفصیلات کے مطابق فیض آباد دھرنا کیس میں پاکستان الیکٹرانک میڈیا ریگولیٹری اتھارٹی (پیمرا) نے فیصلے کیخلاف سپریم کورٹ سے نظرثانی درخواست واپس لینے کا فیصلہ کرلیا۔
پیمرا نے نظر ثانی درخواست واپس لینے کی متفرق درخواست دائرکردی، جس میں کہا ہے کہ فیض آباد دھرنافیصلےکیخلاف نظرثانی زیر التواہیں، سپریم کورٹ میں نظرثانی درخواست پر28 ستمبر کو سماعت مقررہے۔
درخواست میں کہنا تھا کہ پیمرانظرثانی درخواست کی پیروی نہیں کرناچاہتا، استدعا ہے کہ پیمرا کی متفرق درخوست منظور اور نظر ثانی اپیل واپس لینے کی اجازت دی جائے۔
گذشتہ روز انٹیلی جنس بیورو نے فیض آباد دھرنے پر نظر ثانی درخواست واپس لینے کا فیصلہ کیا تھا، انٹیلی جنس بیورو کے ڈپٹی ڈائریکٹر اسداللہ خان نے متفرق درخواست دائر کی تھی ، جس میں مؤقف اختیار کیا گیا تھا کہ فیض آباد دھرنا نظر ثانی 28 ستمبر کو سپریم کورٹ میں سماعت کیلئے مقرر ہے، انٹیلی جنس بیورو فیصلے کیخلاف نظر ثانی واپس لینا چاہتا ہے۔
