دنیا میں سامان کی نقل و حرکت کا نقشہ بدل دینے والی امریکی کمپنی فیڈیکس (FedEx) کے مالک کو ابتدا میں اپنی کمپنی کو بچانے کے لیے جوا بھی کھیلنا پڑ گیا تھا۔
دنیا میں ایسے افراد آج بھی ہمارے جذبوں کو مہمیز دیتے ہیں، جن کی زندگی کی جدوجہد کے بارے میں جان کر ہمیں حیرانی ہوتی ہے، ایسی کامیاب شخصیات میں سامان کی نقل و حمل کی بین الاقوامی کمپنی فیڈیکس کے مالک بھی شامل ہیں جن کی کہانی بہت متاثر کن ہے۔
1965 میں فریڈ اسمتھ ییل یونیورسٹی میں زیر تعلیم تھے، جب انھوں نے اپنے معاشیات کے فائنل پروجیکٹ کے لیے ایک ایسا ریسرچ پیپر تیار کیا، جو دراصل ایک کمپنی کا خاکہ تھا جو امریکا میں سامان کی نقل وحمل کرتی تھی۔
فریڈ نے پہلے تفصیلاً بہت سے ایسے سسٹم پڑھے جو سامان کو ڈبوں میں ڈال کر ٹرک یا جہازوں کے ذریعے ان کی ترسیل کرتے تھے، انھوں نے ان کی تمام خرابیاں نکال کر ایک ایسا سسٹم ترتیب دیا جو سب سے مؤثر تھا، جب ان کا فائنل پیپر گریڈ ہو کر واپس آیا تو اس کو ’سی‘ملا تھا، مگر انھوں نے اپنا خواب ضائع نہیں کیا، اور 1971 میں اس خواب کو عملی جامہ پہنایا۔
فریڈ اسمتھ نے اپنی ایک کمپنی کھولی جس کا نام فیڈرل ایکسپریس تھا، انھوں نے سامان کو چھوٹے چھوٹے ڈبوں میں ڈال کر جہازوں کے ذریعے ان کی ترسیل کا سلسلہ شروع کر دیا، لیکن ایک اہم مسئلے کی وجہ سے صرف تین سال کے دورانیے میں ان کی یہ کمپنی بری طرح ناکامی کے کگار پر آ گئی۔
کمپنی جتنا منافع کماتی تھی اس سے کہیں زیادہ پیسے جہازوں کے فیول پر خرچ ہو جاتے تھے، اور ایک ایسا وقت آیا کہ ان کی کمپنی کے اکاؤنٹ میں صرف پانچ ہزار ڈالر باقی بچے تھے، انھوں نے جنرل ڈائینیمکس کو کال ملائی اور ان سے فنڈنگ کی درخواست کی، لیکن انھوں نے اسے کسی قسم کی امداد یا قرضہ دینے سے انکار کر دیا۔
اسمتھ کو ایک ترکیب سوجھی اور کمپنی کے اہل کاروں کو بتائے بغیر ایک عجیب رسک لینے نکل کھڑے ہوئے، وہ اپنے پانچ ہزار ڈالر لے کر ویگس گئے اور اپنے سارے پیسے جوئے پر لگا دیے، ان کی قسمت اچھی تھی کہ وہ بلیک جیک میں ان پانچ ہزار ڈالر پر 32 ہزار ڈالر جیت گئے۔
اگلے دن جب وہ واپس لوٹے اور ان کی کمپنی نے اکاؤنٹ میں اتنی فنڈنگ دیکھی تو وہ ایک بار پھر محنت اور لگن سے کام میں جت گئے، اور اس کے بعد کمپنی نے ترقی کا سفر شروع کر دیا۔
آج فیڈیکس نے دنیا میں سامان کی نقل و حرکت کا نقشہ بدل دیا ہے اور لوکل کمپنیاں جیسے ٹی سی ایس وغیرہ بھی گھر گھر اسی طرح سامان اور تحائف پہنچانے میں مصروف ہیں، جب کہ فیڈیکس دنیا کے 220 ممالک میں بخوبی کام کر رہی ہے اور اس کا سالانہ منافع لگ بھگ 45 بلین ڈالر کے قریب ہوتا ہے۔
