ARYNews.tv | Urdu – Har Lamha Bakhabar

Tag: نماز جمعہ

  • مقبوضہ کشمیر میں کرفیو کا مسلسل 19واں روز

    مقبوضہ کشمیر میں کرفیو کا مسلسل 19واں روز

    سری نگر: آرٹیکل 370 اے ختم کرنے کے بعد مقبوضہ کشمیر میں 19ویں روز بھی کرفیو جاری ہے، موبائل فون، انٹرنیٹ سروس بند اور ٹی وی نشریات معطل ہیں۔

    تفصیلات کے مطابق مقبوضہ کشمیر میں آج مسلسل 19ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔

    کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔

    مقبوضہ کشمیر میں حریت قیادت کی جانب سے نماز جمعہ کے بعد احتجاج کی کال دی گئی ہے، نماز جمعہ کے بعد سری نگر میں اقوام متحدہ کے دفتر کی جانب مارچ کیا جائے گا۔

    عیدالاضحیٰ کے موقع پر بھی مقبوضہ وادی میں کرفیو نافذ رہا جس کے باعث مسلمان عید کی نماز اور سنت ابراہیمی علیہ اسلام ادا کرنے سے محروم رہے۔

    یاد رہے کہ پانچ اگست کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کردیا تھا۔

    راجیہ سبھا میں بل کے حق میں 125 جبکہ مخالفت میں 61 ووٹ آئے تھے، بھارت نے 6 اگست کو لوک سبھا سے بھی دونوں بل بھاری اکثریت کے ساتھ منظور کرالیے تھے۔

    کشمیرکشمیریوں کا ہے اوران کا موقف درست ہے، امرتیا سین

    نوبیل انعام یافتہ بھارتی معیشت داں ڈاکٹر امرتیا سین کا دو روز قبل کہنا تھا کہ جمہوریت کے بغیرمسئلہ کشمیرکا کوئی حل نہیں کرسکتا۔

    امرتیا سین کا کہنا تھا کہ کشمیرکشمیریوں کا ہے اوران کا موقف درست ہے، کشمیری قیادت کو گرفتار، نظربند کرنے کی شدید مذمت کرتا ہوں۔

  • کشمیری غلامی کی زنجیریں توڑنے کا تہیہ کرچکے ہیں، فواد چوہدری

    کشمیری غلامی کی زنجیریں توڑنے کا تہیہ کرچکے ہیں، فواد چوہدری

    اسلام آباد: وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ ہم کشمیریوں کی جدوجہد میں ان کے ساتھ ہیں، خدا مظلوموں کا مدد گار ہو۔

    تفصیلات کے مطابق سماجی رابطے کی ویب سائٹ ٹویٹر وفاقی وزیر فواد چوہدری نے اپنے پیغام میں کہا کہ مقبوضہ کشمیرمیں جمعہ کی نماز کے بعد بھرپور احتجاج کی کال ہے۔

    فواد چوہدری نے کہا کہ کشمیری غلامی کی زنجیریں توڑنے کا تہیہ کرچکے ہیں، پاکستان کشمیریوں کی پشت پر کھڑا ہے، ہم کشمیریوں کی جدوجہد میں ان کے ساتھ ہیں۔

    وفاقی وزیر برائے سائنس اینڈ ٹیکنالوجی نے کہا کہ خدا مظلوموں کا مدد گارہو اور یہ طویل جدوجہد اب تکمیل ہو۔

    حریت قیادت کی جانب سے مقبوضہ کشمیر میں نماز جمعہ کے بعد احتجاج کی کال دی گئی ہے، نمازجمعہ کے بعد سری نگر میں اقوام متحدہ دفتر کی طرف مارچ کیا جائے گا۔

    مقبوضہ کشمیر میں آج مسلسل 19ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔

    کشمیرمیڈیا سروس کے مطابق مواصلاتی نظام کی معطلی، مسلسل کرفیو اور سخت پابندیوں کے باعث لوگوں کو بچوں کے لیے دودھ، زندگی بچانے والی ادویات اور دیگر اشیائے ضروریہ کی شدید قلت کا سامنا ہے۔

  • کوئٹہ: مدرسے میں نماز جمعہ کے دوران دھماکہ، 7 افراد جاں بحق

    کوئٹہ: مدرسے میں نماز جمعہ کے دوران دھماکہ، 7 افراد جاں بحق

    کوئٹہ: صوبہ بلوچستان کے دارالحکومت کوئٹہ میں مدرسے میں نماز جمعہ کے دوران دھماکہ ہوا ہے جس میں 7 افراد جاں بحق جبکہ 22 زخمی ہوگئے۔

    تفصیلات کے مطابق دھماکہ کوئٹہ کے قریب ایک قصبے کچلاک میں ایک مدرسے میں نماز جمعہ کے دوران ہوا، جب مسجد میں بے شمار نمازی موجود تھے۔

    ریسکیو ذرائع کا کہنا ہے کہ دھماکے میں 7 افراد جاں بحق جبکہ 22 زخمی ہوئے ہیں۔ ریسکیو ٹیموں نے فوری طور پر پہنچ کر زخمیوں کو مفتی محمود اسپتال منتقل کیا۔ عینی شاہدین کے مطابق دھماکہ نہایت زوردار تھا جس سے علاقے میں خوف و ہراس پھیل گیا۔

    دھماکے کے بعد مزید دھماکہ خیز مواد کی تلاش کے لیے بم ڈسپوزل اسکواڈ (بی ڈی ایس) کو طلب کرلیا گیا، اس دوران علاقے کو عام افراد سے خالی کروالیا گیا۔ بی ڈی ایس ذرائع کا کہنا ہے کہ دھماکہ خیز مواد محراب کے ساتھ ہی نصب کیا گیا تھا۔

    واقعے کے بعد سیکیورٹی فورسز کی بھاری نفری جائے وقوع پر پہنچ گئی جس نے علاقے کو گھیرے میں لے کر سیل کردیا۔

    سندھ میں سیکیورٹی سخت

    کوئٹہ دھماکے کے بعد انسپکٹر جنرل (آئی جی) سندھ ڈاکٹر کلیم امام نے صوبے میں سیکیورٹی سخت کرنے کی ہدایت کرتے ہوئے کہا کہ سیکیورٹی اقدامات انتہائی چوکنا اور مستعد رکھے جائیں۔

    اس سے قبل 6 اگست کو بھی کوئٹہ ٹک ٹک گلی شو مارکیٹ میں دھماکہ ہوا تھا جس کے نتیجے میں ایک شخص جاں بحق اور 9 افراد زخمی ہوگئے تھے۔ دھماکے سے ایک دکان تباہ ہوئی جبکہ زخمیوں میں 2 بچے بھی شامل تھے۔

    ڈی آئی جی کوئٹہ عبد الرزاق چیمہ کا کہنا تھا کہ دہشت گرد خریدار بن کر آئے اور بارودی مواد دکان میں رکھ گئے، دہشت گردوں نے کوئٹہ کے عوام کو نشانہ بنایا ہے۔

    بعد ازاں وزیر داخلہ بلوچستان میر ضیا لانگو کا کہنا تھا کہ دہشت گردوں کو ہمسایہ دشمن ملک کی پشت پناہی حاصل ہے، دہشت گردی کی لہر گزشتہ 2 دہائیوں سے چل رہی ہے۔

    انہوں نے کہا تھا کہ ہمسایہ دشمن ملک دہشت گرد بلوچستان میں بھیج رہا ہے، ہماری سیکیورٹی فورسز ہر وقت چوکنا ہے، دہشت گردی کی جڑ تک پہنچ چکے ہیں جلد خاتمہ کردیا جائے گا۔

  • پاکستان کی نیوزی لینڈ میں دہشت گردی کے واقعے کی مذمت

    پاکستان کی نیوزی لینڈ میں دہشت گردی کے واقعے کی مذمت

    اسلام آباد: ترجمان دفتر خارجہ ڈاکٹر محمد فیصل نے نیوزی لینڈ کے شہر کرائسٹ چرچ میں دہشت گردی کے واقعے کی شدید مذمت کی ہے۔

    تفصیلات کے مطابق پاکستان نے نیوزی لینڈ کے شہر کرائسٹ چرچ میں دو مساجد میں نماز جمعہ کے دوران فائرنگ کے واقعے کی مذمت کی ہے۔

    ترجمان دفترخارجہ نے سماجی رابطے کی ویب سائٹ ٹویٹر پراپنے پیغام میں کہا کہ ہمارا ہائی کمیشن مقامی حکام سے رابطے میں ہے۔

    ڈاکٹر محمد فیصل نے اپنے پیغام میں مزید کہا کہ مکمل تفصیلات حاصل کرنے کی کوشش کررہے ہیں۔

    نیوزی لینڈ کی 2 مساجد میں فائرنگ‘ 27 افراد جاں بحق

    واضح رہے کہ نیوزی لینڈ کے شہر کرائسٹ چرچ کی 2 مساجد میں مسلح شخص نے اندھا دھند فائرنگ کردی جس کے نتیجے میں 27 افراد جاں بحق ہوگئے جبکہ مسجد میں بنگلہ دیشی کرکٹ ٹیم کے کھلاڑی بھی موجود تھے۔

    غیرملکی میڈیا کے مطابق کرائسٹ چرچ میں مقامی وقت کے مطابق تقریباََ ایک بجکر 40 منٹ پر مسلح شخص نے مسجد میں داخل ہوتے ہی اندھا دھند فائرنگ کی اور اس کی لائیو ویڈیو بھی بناتا رہا۔

  • نیوزی لینڈ کی 2 مساجد میں فائرنگ‘ 49 افراد جاں بحق

    نیوزی لینڈ کی 2 مساجد میں فائرنگ‘ 49 افراد جاں بحق

    کرائسٹ چرچ: نیوزی لینڈ کے شہر کرائسٹ چرچ میں مسلح افراد نے مساجد میں موجود نمازیوں پر فائرنگ کردی جس کے نتیجے میں 49 افراد جاں بحق ہوگئے۔

    تفصیلات کے مطابق نیوزی لینڈ کے شہر کرائسٹ چرچ میں واقع 2 مساجد اور اسپتال میں مسلح افراد نے اندھا دھند فائرنگ کردی، افسوس ناک واقعے میں 49 افراد جاں بحق جبکہ درجنوں زخمی ہوگئے۔

    غیرملکی میڈیا کے مطابق نمازجمعہ کے دوران مساجد میں موجود نمازیوں پرفائرنگ کی گئی، حملہ آوروں نے النورمسجد اور لِین وڈ میں نمازیوں کونشانہ بنایا۔

    میڈیا رپورٹس کے مطابق مسجد میں بنگلہ دیشی کرکٹ ٹیم کے کھلاڑی بھی موجود تھے جو اس واقعے میں محفوظ رہے۔

    بنگلہ دیشی کرکٹرتمیم اقبال نے سماجی رابطے کی ویب سائٹ ٹویٹر پر اپنے پیغام میں کہا کہ پوری ٹیم محفوظ ہے، ہمارے لیے دعا کریں۔

    انہوں نے اپنے پیغام میں مزید کہا کہ خوش قسمتی سے محفوظ رہے، دوبارہ ایسا واقعہ نہیں دیکھنا چاہتے۔

    بنگلہ دیشی کرکٹرمشفق الرحیم نے ٹویٹرپراپنے پیغام میں کہا کہ کرائسٹ چرچ کی مسجد میں فائرنگ ہوئی، الحمداللہ، اللہ نے ہمیں محفوظ رکھا، ہم بہت زیادہ خوش نصیب ہیں، دوبارہ اس طرح نہیں دیکھنا چاہتے، ہمارے لیے دعا کریں۔


    عینی شاہدین کا کہنا ہے کہ فائرنگ کے واقعے میں متعدد افراد کو گولیاں لگی ہیں جن کی حالت تشویش ناک بتائی جاتی ہے۔

    کرائسٹ چرچ میں پولیس حکام نے لوگوں کو گھروں میں رہنے کی ہدایت کی گئی ہے، زخمیوں کو طبی امداد کے لیے قریبی اسپتالوں میں منتقل کیا جا رہا ہے۔

    [bs-quote quote=”
    نیوزی لینڈ کی وزیراعظم نے فائرنگ کے واقعے کے بعد ہنگامی پریس کانفرنس کے دوران کہا کہ آج نیوزی لینڈ کی تاریخ کا سوگواردن ہے، ایسے پُرتشددواقعات کی نیوزی لینڈ میں کوئی جگہ نہیں ہے۔” style=”style-8″ align=”left” author_name=”جیسنڈا ایرڈن” author_avatar=”https://arynewsudweb.wpengine.com/wp-content/uploads/2019/03/60×60.jpg”][/bs-quote]

    جیسنڈا ایرڈن نے دہشت گرد حملے کی شدید مذمت کرتے ہوئے کہا کہ ایک حملہ آور کو گرفتار کرلیا ہے، ملزم سے تحقیقات جاری ہیں، فی الحال تفصیلات نہیں بتا سکتے۔

    غیرملکی میڈیا کے مطابق حملے میں ملوث ایک دہشت گرد نے ہیلمٹ پہن رکھا تھا جس پرکیمرہ نصب تھا، دہشت گرد نے قتل وغارت کی فوٹیج براہ راست سوشل میڈیا پرنشرکی۔

    نیوزی لینڈ میں پاکستانی ہائی کمشنر عبدالمالک نے اے آروائی نیوز سے گفتگو کرتے ہوئے کہا کہ اطلاعات کے مطابق حملے میں 9 افراد شہید ہوئے۔

    انہوں نے کہا کہ پاکستانی کمیونٹی سے رابطے میں ہیں، حملے میں کسی پاکستانی کے متاثر ہونے سے متعلق اطلاع نہیں ہے۔

    پاکستانی ہائی کمشنر نے کہا کہ پولیس نےعلاقوں کا محاصرہ کیا ہوا ہے، رابطے نہیں ہوپارہے، جیسے ہی کوئی اطلاع ملی، ہم دفترخارجہ سے رابطہ کریں گے۔

    پولیس کمشنرکرائسٹ چرچ نے میڈیا سے گفتگو کرتے ہوئے کہا کہ پولیس نے گاڑی کوتحویل میں لے لیا، دھماکاخیز مواد نصب تھا۔

    پولیس کمشنر نے بتایا کہ خاتون سمیت 4 مشتبہ افراد زیرحراست میں، زیرحراست افراد میں 27 سال کا آسٹریلوی شہری بھی شامل ہے۔

  • بنی گالہ مسجد میں وزیرِ اعظم کی پہلی نمازِ جمعہ

    بنی گالہ مسجد میں وزیرِ اعظم کی پہلی نمازِ جمعہ

    اسلام آباد: وزیرِ اعظم عمران خان کی رہائش گاہ بنی گالہ میں خصوصی مسجد قائم کی گئی، جس میں وزیرِ اعظم نے پچھلے روز پہلی بار نمازِ جمعہ ادا کی۔

    تفصیلات کے مطابق بنی گالہ میں مسجد کی تعمیر 2 ماہ پہلے وزیرِ اعظم کی خصوصی ہدایت پر کی گئی ہے، نمازوں کی ادائیگی کے لیے امام بھی مقرر کر دیا گیا ہے۔

    گزشتہ روز جمعے کو وزیرِ اعظم نے اس مسجد میں پہلی نمازِ جمعہ ادا کی، انھوں نے مسجد میں بنی گالہ کے اسٹاف کے ساتھ با جماعت نماز کی ادا کی۔

    وزیرِ اعظم کے معاونِ خصوصی نعیم الحق نے اپنے ٹویٹر اکاؤنٹ کے ذریعے مسجد میں نماز کی ادائیگی کی تصاویر شیئر کیں۔

    تصاویر میں دیکھا جا سکتا ہے کہ وزیرِ اعظم عمران خان مسجد کے اندر بنی گالہ اسٹاف کے ساتھ صفوں میں بیٹھے ہوئے ہیں۔

  • جے یو آئی صدسالہ تقریبات: امام کعبہ آج نمازجمعہ پڑھائیں گے

    جے یو آئی صدسالہ تقریبات: امام کعبہ آج نمازجمعہ پڑھائیں گے

    پشاور: جےیو آئی کی صد سالہ تقریبات کےسلسلے میں نوشہرہ میں ہونے والےاجتماع میں امام کعبہ آج نمازجمعہ پڑھائیں گے۔

    تفصیلات کےمطابق نوشہرہ میں جمعیت علمائے اسلام کےصد سالہ یوم تاسیس پر تین روزہ عالمی اجتماع میں آج امام کعبہ نماز جمعہ پڑھائیں گے۔

    جمعیت علمائے اسلام ف کےسربراہ مولانا فضل الرحمان کاکہناہےکہ تین روزہ عالمی اجتماع کی تمام تر تیاریاں مکمل کر لی گئی ہیں۔نوشہرہ کےعلاقے اضاخیل میں خیموں کا شہر بسادیا گیا،عالمی اجتماع میں دنیا کے52ملکوں کےوفود شرکت کریں گے۔

    مولانا فضل الرحمان کا کہناہےکہ امام کعبہ کی پاکستان آمد پوری قوم کےلیےباعث ِسعادت ہے۔

    امام کعبہ پاکستان پہنچ گئے

    یاد رہےکہ گزشتہ روز اجتماع میں شرکت کے لیےامام کعبہ الشیخ صالح بن محمد ابراہیم آل طالب سعودی وفد کے ہمراہ پشاور پہنچے تھےجہاں ان کا پرتپاک استقبال کیا گیاتھا۔

    اس موقع پر مولانا فضل الرحمان کاکہناتھاکہ امام کعبہ اجتماع میں نماز جمعہ کی امامت کریں گے۔ان کاکہناتھاکہ امام کعبہ امت مسلمہ کا مرکز ہیں اور وہ امن کا پیغام لےکر آئے ہیں۔

    خیال رہےکہ امام کعبہ آج نوشہرہ میں نماز جمعہ پڑھائیں گےجس کے بعد وہ جمعیت علمائے اسلام کی صد سالہ تقریبا ت کا افتتاح کریں گے۔

    واضح رہےکہ نوشہرہ میں عالمی اجتماع کی سیکورٹی کے لیے سخت انتظامات کیے گئے ہیں۔ڈرون کیمروں سے پورے اجتماع کی نگرانی کی جائے گی جبکہ پولیس اور سیکورٹی اہلکاروں کے علاوہ ہزاروں رضاکار سیکورٹی ڈیوٹی پر مامور ہیں۔

  • کیا خطبہ سنے بغیر نماز جمعہ ادا ہوجاتی ہے؟

    کیا خطبہ سنے بغیر نماز جمعہ ادا ہوجاتی ہے؟

    اگر نمازی جمعہ کے روز مسجد اتنی دیر سے پہنچا ہے کہ خطبہ جمعہ نہیں سن سکا تو ایسی صورت حال میں نمازِ جمعہ کے اجر و ثواب میں کوئی فرق نہیں پڑے گا البتہ وہ خطبہ سننے کے ثواب سے محروم رہ جائے گا۔

    یہ بات اے آر وائی ڈیجیٹل نیٹ ورک کے چینل کیو ٹی وی (پاکستان کا سب سے پہلا مذہبی چینل) مذہبی معلومات کے حوالے سے سوال جواب کے پروگرام میں مفتی صاحب نے ایک سائل کے جواب میں بتائی۔

     

    لاہور سے محمد الیاس نے فون پر مفتی صاحب سے سوال پوچھا تھا کہ خطبہ جمعہ چھوٹ جانے سے کیا نماز جمعہ ادا ہو جاتی ہے یا اس سے نماز جمعہ کے اجر اور ثواب میں کمی واقع ہو سکتی ہے؟

    جس پر پروگرام میں موجود مفتی صاحب کا کہنا تھا کہ مسجد میں نماز جمعہ سے قبل خطبہ جمعہ ہونا ضروری ہے اور اس دوران موجود نمازیوں پر لازم ہوتا ہے کہ پورے آداب اور احترام کے ساتھ خطبہ سنیں۔

    انہوں نے کہا کہ اگر کوئی شخص خطبہ جمعہ کے بعد مسجد میں پہنچتا ہے تو نماز جمعہ میں شریک ہو پاتا ہے تو ایسے شخص کی نماز ادا بھی ہو جاتی ہے اور انشاء اللہ مقبول بھی ہوگئی کیونکہ خطبہ جمعہ کی محرومی سے نماز جمعہ کی صحت پر حرف نہیں آتا۔

    نماز تو ہوجاتی ہے تاہم خطبے کا ثواب نہیں ملتا

    مفتی صاحب کا مزید کہنا تھا کہ بتائی گئی صورت حال میں نمازِ جمعہ تو ادا ہو جاتی ہے اور نمازی اس کے ثواب و برکات کا بھی مستحق رہتا ہے لیکن نمازی خطبہ جمعہ سننے کے ثواب و اجر سے محروم رہ جا تا ہے اس لیے پوری کوشش کرنی چاہیئے کہ خطبہ جمعہ کو سننے کے لیے وقت سے پہلے مسجد پہنچ جائیں۔


    Jummah Ka Khutba by aryqtv

    خطبہ جمعہ نہ صرف یہ کہ سنت ہے جس میں اللہ کی کبریائی اور مدح رسول صلی اللہ علیہ وآلہ وسلم بیان کی جاتی ہے بلکہ دین کی معلومات کے حصول اور روز مرہ مسائل سے آگاہی کا بھی ذریعہ بنتا ہے اس لیے ہر مسلمان کی کوشش ہونا چاہیے کہ خطبہ جمعہ کو ہر صورت سنیں۔

  • چیمپیئنز ٹرافی : قومی ہاکی ٹیم پہلا میچ آج بیلجیئم کیخلاف کھیلے گی

    چیمپیئنز ٹرافی : قومی ہاکی ٹیم پہلا میچ آج بیلجیئم کیخلاف کھیلے گی

     بھوبانیسور : پاکستان ہاکی ٹیم کی بھوبانیسور کی مسجد میں نماز جمعہ کی ادائیگی , تفصیلات کے مطابق پاکستان ہاکی ٹیم نے چیمپیئنز ٹرافی کے آغاز سے قبل بھارتی شہر اڑیسہ کی مقامی مسجد میں نماز جمعہ ادا کی۔

    پاکستان ہاکی ٹیم چیمپیئنز ٹرافی کھیلنے کیلئے بھارتی ریاست اڑیسہ میں موجود ہے۔ کھلاڑیوں نے جمعہ المبارک کے موقع پر بھوبانیسور پولیس ہیڈ کوارٹرز کی مسجد میں نماز جمعہ ادا کی۔

    قومی ٹیم کا مقامی افراد نے گرمجوشی سے استقبال کیا۔کھلاڑیوں نے میگا ایونٹ میں کامیابی کیلئے دعائیں کیں۔ اس موقع پر سیکیورٹی کے فول پروف انتظامات کیے گئے تھے۔ پاکستان ہاکی ٹیم اپنا پہلا میچ آج بیلجیئم کیخلاف کھیلے گی۔

  • پاکستان عوامی تحریک کے جلسے میں نماز جمعہ کی تیاریاں

    پاکستان عوامی تحریک کے جلسے میں نماز جمعہ کی تیاریاں

    اسلام آباد: آج پی اے ٹی کے جلسہ گاہ میں نماز جمعےکے لئے خصوصی اہتمام کیا گیا ہے، انقلاب کی آس میں پاکستان عوامی تحریک کےکارکنان کو دھرنا دیئے ایک ہفتے سے زائد گزرگیا  لیکن انکے عزم میں ذراکمی نہ آئی ۔ جمعے کے دن کا آغاز ہوا تو صبح سے ہی نماز جمعہ کےلئے تیاریاں شروع ہوگئیں۔

    معمول سےہٹ کےآج کام کی رفتار میں تیزی دیکھنےکو ملی  جلسہ گاہ کی صفائی کے بعد غسل کے اہتمام کے لئے پہلے پانی کا حصول ممکن بنایاگیا۔ تگ و دو کے بعد پانی جلسہ گاہ تک پہنچا اور تمام کارکنان میں تقسیم کیا گیا پھر سب تیاری میں مصروف ہوگئے ،کچھ تسبیحات اور ذکر اللہ کرنے لگےاورکچھ قرآن کی تلاوت میں مشغول رہے۔

    خواتین بھی نعت خوانی اورذکرکرتی نظر آئیں۔ ذکر کے ساتھ کامیابی کے حصول کے لئےدعاؤں کا سلسلہ بھی جاری رہا۔پی اے ٹی کا جلسہ گاہ میں ڈاکٹر طاہرالقادری کی امامت میں نماز جمعہ ادا کی جائے گی۔