گوجرانوالہ: نندی پور پاور اسٹیشن کے ریکارڈ ضائع کرنے کے مقدمہ میں ملزم بلقیاس خان کوتیسری مرتبہ تین روزہ جسمانی ریمانڈپر پولیس کے حوالے کردیا گیا ہے۔
تفصیلات کے مطابق نندی پورپاوراسٹیشن میں ریکارڈ ضائع کرنے کے مقدمہ میں گرفتار سیکیورٹی گارڈ بلقیاس خان کو آج سول جج نزہت جبیں کی عدالت میں پیش کیا گیا عدالت نے ملزم کو تیسری بار جسمانی ریمانڈ پر پولیس کے حوالے کر دیا۔
عدالت میں پولیس نے موقف اختیار کیا کہ ملزم بلقیاس خان کے قبضہ سے پھٹے ہوئے تین رجسٹرڈ برآمد ہوئے ہیں جس میں کئی اپم شواہد کی موجودگی کا خدشہ ہے اس لیے عدالت سے استدعا ہے کہ مزید تحقیقات کے لیے ملزم کو آٹھ روزہ جسمانی ریمانڈ پر ملزم کو پولیس کے حوالے کرے۔
جس پر فاضل جج نے ملزم بلقیاس خان کومزید تین روزہ جسمانی ریمانڈ پر پولیس کے حوالے کرنے کا حکم دے دیا ہے،ملزم کو تیسری بار جسمانی ریمانڈ پر پولیس کے حوالے کیا گیا ہے۔
یاد رہے کہ ملزم بلقیاس خان نندی پور کے معطل سکیورٹی آفیسر ریٹائرڈ کیپٹن مہتاب عالم کا قریبی ساتھی تھا جس نے پولیس کے روبرو اس بات کا اقرار کیا تھا کہ اس نے معطل سکیورٹی آفیسر ریٹائرڈ کیپٹن مہتاب عالم کے کہنے پر ہی آئیل کی خریداری سکیورٹی سٹا ف کی حاضری کا ریکارڈ اور دوسری اہم دستاویزات پھاڑیں تھیں۔
دوران تفتیش ملزم بلقیاس خان نے بتایا کہ اُس نے ریکارڈ ضائع کرنے کے بعد کمرے کا بیرونی شیشہ توڑ دیا تھا تا کہ یہ تاثر دیا جاسکے کہ کوئی نامعلوم شخص شیشہ توڑ کر اندر داخل ہوا تھا۔
