ARYNews.tv | Urdu – Har Lamha Bakhabar

Tag: نندی پور پاور پراجیکٹ

  • نندی پور پاور پراجیکٹ: عدالت نے بابراعوان کی بریت سے متعلق فیصلہ موخرکردیا

    نندی پور پاور پراجیکٹ: عدالت نے بابراعوان کی بریت سے متعلق فیصلہ موخرکردیا

    اسلام آباد: احتساب عدالت نے نندی پور پاور پراجیکٹ کیس میں بابراعوان کی بریت سے متعلق کیس کی سماعت 6 مئی تک ملتوی کردی۔

    تفصیلات کے مطابق احتساب عدالت کے معزز جج محمد ارشد ملک نے نندی پور پاو پراجیکٹ کیس کی سماعت کی۔

    عدالت نے بابراعوان کی بریت سے متعلق فیصلہ موخر کردیا، جج محمد ارشد ملک نے ریمارکس دیے کہ بریت کی اور درخواستیں بھی ہیں سب کو سن کر ایک ساتھ فیصلہ سنائیں گے۔

    احتساب عدالت کے معزز جج نے کیس کی سماعت 6 مئی تک کے لیے ملتوی کردی۔

    عدالت نے 26 اپریل کو نندی پور پاور پراجیکٹ ریفرنس میں تحریک انصاف کے رہنما بابراعوان کی بریت کی درخواست پرفیصلہ محفوظ کرلیا تھا۔

    نیب کے مطابق پیپلزپارٹی کے دور حکومت میں وزراء کی ملی بھگت سے نندی پور پاور پراجیکٹ منصوبے میں 2 سال کی تاخیرہونے سے قومی خزانے کو 27 ارب کا نقصان پہنچا تھا۔

    نندی پور پاور پراجیکٹ کیس میں سابق وزیراعظم راجہ پرویز اشرف، سابق وزیرقانون بابراعوان، سابق سیکریٹری قانون اور دیگر پر فرد جرم عائد ہوچکی ہے۔

    واضح رہے کہ نیب ریفرنس میں عائد الزامات پر بابراعوان وزیراعظم کے مشیر برائے پارلیمانی امور کے عہدے سے مستعفی ہوگئے تھے۔

  • نندی پور پاور پراجیکٹ کے سیکیورٹی آفس میں اہم ریکارڈ پھاڑ دیا گیا

    نندی پور پاور پراجیکٹ کے سیکیورٹی آفس میں اہم ریکارڈ پھاڑ دیا گیا

    گجرانوالہ: نندی پور پاور پراجیکٹ کے سیکیورٹی آفس میں نامعلوم افراد نے اہم ریکارڈ پھاڑ دیا۔ پھاڑے جانے والے کاغذات میں ادائیگیوں اور آئل خریداری کا ریکارڈ شامل تھا۔

    ذرائع کے مطابق واقعہ کل نصف شب کو اسسٹنٹ ڈائریکٹر سیکیورٹی کے دفتر میں پیش آیا۔

    واضح رہے کہ یہ واقعہ اس جگہ پیش آیا ہے جہاں قانون نافذ کرنے والے اداروں، رینجرز، پولیس اور ایلیٹ فورس کے درجنوں اہلکار سیکیورٹی کے فرائض پر مامور ہیں۔ اس جگہ عام افراد کا داخلہ بند ہے جبکہ کچھ مقامات پر وی آئی پی شخصیات کا داخلہ بھی ممنوع ہے۔

    پروجیکٹ انتظامیہ نے ضلعی حکومت اور پولیس کو واقعہ کی اطلاع دی جس کے بعد پولیس نے تفتیش کا آغاز کردیا ہے۔

    پولیس کے مطابق صبح ساڑھے 3 بجے کے قریب کچھ نامعلوم افراد اسسٹنٹ ڈائریکٹر سیکیورٹی مہتاب عالم کے دفتر میں داخل ہوئے اور اہم ریکارڈ پھاڑ دیا۔

    فرانزک لیب کے اہلکار بھی جائے وقوع سے انگلیوں کے نشانات اور دیگر شواہد اکٹھے کرنے میں مصروف ہیں۔

  • نندی پور پاور پراجیکٹ پر نیا انکشاف سامنے آگیا

    نندی پور پاور پراجیکٹ پر نیا انکشاف سامنے آگیا

    اسلام آباد: نندی پور پاور پراجیکٹ پر نیا انکشاف سامنے آگیا، ایک سو تیرہ ارب روپے نقصان کے حکومتی دعوے کے برعکس پراجیکٹ کے انچارج کا کہنا ہے کہ  منصوبے کی تکمیل نہ ہونے سے تین سو پندرہ ارب روپے کا نقصان ہوا۔

    یہ انکشاف قومی اسمبلی کی قائمہ کمیٹی برائے منصوبہ بندی و ترقی کے اجلاس میں سامنے آیا، اجلاس میں نندی پور پاورپروجیکٹ سے متعلق ڈائریکٹر پراجیکٹ محمد محمود نے بریفنگ دی۔

    اُنہوں نے بتایا کہ اس منصوبےکی بَروقت تکمیل نہ ہونے سے تین سو پندرہ ارب روپے کا نقصان ہوا ہے، اَسٌی فیصد پراجیکٹ مکمل ہوچکا ہے، باقی تین ماہ میں مکمل ہو جائیگا، جس پر رکن قومی اسمبلی نفیسہ شاہ نے کہا کہ پانی و بجلی کے وزیرِ خواجہ آصف نے تو بتایا تھا کہ 113 ارب روپے کا نقصان ہوا ہے، آپ کیسے 315 ارب روپےکا نقصان بتا رہے ہیں۔

    اُن کا مزیدکہنا تھا کہ اگر یہ پراجیکٹ وقت پر مکمل ہوتا تو صرف 47 ارب روپےلاگت آتی، اُنہوں نے نندی پور پر دی جانے والی اس بریفنگ کو سیاسی بریفنگ قرار دیا، جس پر نندی پورکے ڈائریکٹر پراجیکٹ محمد محمود نےکہا کہ یہ کوئی سیاسی نہیں اصلی رپورٹ ہے۔