Tag: ننھا شہزادہ

لندن: برطانوی شاہی خاندان نے دنیا بھر میں موجود اپنے مداحوں کے انتظار کی گھڑیاں ختم کرتے ہوئے شہزادہ ہیری اور شہزادی میگھن کے بیٹے کی تصویر جاری کردی ہے۔

تفصیلات کے مطابق شہزادہ ہیری ، شہزادی میگھن اور ان کے نومولود بیٹے کی تصویر ونڈسر کیسل کے سینٹ جارج ہال سے جاری کی گئی ہے جس میں برطانوی تخت کے ساتویں وارث کو باقاعدگی سے دیکھا جاسکتا ہے۔

تصویر میں دیکھا جاسکتا ہے کہ ننھا شہزادہ ایک سفید رنگ کے لبادے میں لپٹا ہوا ہے ، پہلی جھلک میں شہزادے کے نقوش بالکل ان کی والدہ میگھن مرکل جیسے دکھائی دے رہے ہیں۔

برطانوی شہزادہ ہیری اور میگھن مرکل کے ہاں دو روز قبل بیٹے کی ولادت ہوئی تھی ، پرنس ہیری نے بیٹے کی پیدائش کی تصدیق کرتے ہوئے کہا کہ میرا بیٹا صحت مند ہے اور اس کا وزن 7 پونڈ ہے۔

اس دن میڈیا سے گفتگو کرتے ہوئے شہزادہ ہیری کا کہنا تھا کہ میں بہت خوش ہوں یہ بتاتے ہوئے کہ میگھن مرکل نے آج صبح بیٹے کو جنم دیا ہے۔

ہیری کا مزید کہنا تھا کہ میرے لیے یہ لمحہ حیران کن ہے جسے میں لفظوں میں بیان نہیں کرسکتا ہے، اہلیہ میگھن مرکل بھی خیریت سے ہیں۔

شہزادہ ہیری کے نومولود بیٹے تخت شاہی کے ساتویں امیدوار ہیں تاہم ابھی یہ واضح نہیں کہ نومولود کو شاہی اعزاز سے نوازا جائے گا یا شاہی حیثیت سے محروم کردیا جائے گا جیسا کہ شاہی خاندان کے تین ارکان کو پسند کی شادی کی وجہ سے شاہی حیثیت ترک کرنا پڑی تھی۔

واضح رہے کہ 34 سالہ شہزادہ ہیری کی شادی 37 سالہ سابق امریکی اداکارہ میگھن مرکل سے گزشتہ سال مئی انجام پائی تھی، جسے لاکھوں کی تعداد میں مداحوں نے دیکھا تھا۔

خیال رہے کہ چند روز قبل ڈیلی میل نا می برطانوی ادارے میں شائع ہونے والی ایک رپورٹ کے مطابق برطانوی شہزادہ ہیری اور میگھن مرکل کے یہاں آنے والے نئے مہمان کا اٹالین نام ’الیگرا‘ رکھا جائے گا کیونکہ آنجہانی لیڈی ڈیانا کو یہ اٹالین نام بہت پسند تھا۔