کوئٹہ : وزیراعلیٰ بلوچستان نواب ثناء اللہ زہری نے انکشاف کیا ہے کہ دہشت گرد انہیں دھمکیاں دے رہے ہیں ،انہوں نے ڈاکٹروں کو خبردار کیا کہ وہ احتجاج کی راہ نہ اپنائیں، وزیراعلیٰ بلوچستان نواب ثناء اللہ زہری نے اتوار کو یارو تا پشین دو رویہ سڑک کے تعمیراتی منصوبے کا افتتاح کیا۔
اس موقع پر منعقدہ اجتماع سے خطاب کرتے ہوئے انہوں نے کہا کہ صوبہ بھر کی شاہراہیں محفوظ بنادی گئی ہیں، انہوں نے اس موقع پرانکشاف کیا کہ دہشت گردوں کی جانب سے انہیں دھمکیاں مل رہی ہیں۔
دہشت گرد انہیں قتل کرکے دوبارہ منظم ہونا چاہتے ہیں ،لیکن ہم کسی قسم کی دھمکیوں سے مرعوب نہیں ہونگے۔
نواب ثناء اللہ زہری نے سول ہسپتال کوئٹہ میں ٹراما سینٹرکا افتتاح بھی کیا، افتتاح کے بعد میڈیا کے نمائندوں سے گفتگو کرتے ہوئے انہوں نے ڈاکٹروں کو خبردار کیا کہ وہ احتجاج کی راہ پنانے کی بجائے عوامی خدمت کو اپنا شعار بنائیں۔
باون بستروں پر مشتمل ٹراما سینٹر میں تین آپریشن تھیٹر بنائے گئے ہیں جن میں دو مکمل طور پر فعال ہیں اس حوالے صوبائی وزیر صحت رحمت صالح بلوچ کا کہنا ہے کہ سینٹر میں مزید سہولیات کی فراہمی کے لئے بھی جلد ٹینڈر کئے جائیں گے۔
