باکو: وزیراعظم نوازشریف کا کہنا ہے کہ پاکستان علاقائی تعاون مضبوط بنانے کی پالیسی پر یقین رکھتا ہےاور سی پیک علاقائی رابطوں کے فروغ میں معاون ثابت ہوگا۔

تفصیلات کےمطابق وزیراعظم نواز شریف تین روزہ دورے پر آذر بائیجان کے دارالحکومت باکو پہنچےجہاں ان کا پرتپاک استقبال کیاگیا۔وزیراعظم نواز شریف کی آمد پر شاندار پریڈ کی گئی اور گارڈ آف آنر پیش کیاگیا۔

اس موقع پر وزیر اعظم نواز شریف نے آذربائیجان کے صدر الہام علیوف سے بات چیت کر تے ہوئے کہا کہ پاکستان اور آذربائیجان برادر ممالک ہیں اور آذر بائیجان کا دور ہ کر کے بے حد خوشی ہے۔

وزیراعظم نوازشریف کا کہنا تھا کہ پاکستان علاقائی تعاون مضبوط بنانے کی پالیسی پر یقین رکھتا ہے اور سی پیک علاقائی رابطوں کے فروغ میں معاون ثابت ہوگا۔

تین روزہ دورے کے دوران پاکستان اور آذربائیجان میں اقتصادی،تجارتی اور سرمایہ کے شعبے میں تعاون پر تبادلہ خیال کیا جائے گا۔ دونوں ممالک کے درمیان زراعت،صنعت،ٹیکسٹائل سمیت مختلف معاہدوں پر دستخط ہوں گے۔

آذربائیجان کے صدرالہام علیوف کا کہنا تھاکہ وزیراعظم نوازشریف کو آذربائیجان دورے کی دعوت دی تھی دورہ کرنے پران کےمشکورہیں۔

اسلام آباد: تحریک انصاف کے ترجمان نعیم الحق کا کہنا ہے کہ نوازشریف آئینی واخلاقی طور پر وزیراعظم نہیں رہے۔

تفصیلات کےمطابق اسلام آباد میں الیکشن کمیشن کے باہر میڈیا سے بات کرتے ہوئے تحریک انصاف کے ترجمان نعیم الحق کا کہناتھا کہ حکومت کے رویے سے ظاہر ہے کہ نوازشریف پامانا لیکس پر جواب نہیں دینا چاہتے۔

نعیم الحق کا کہناتھا کہ نواز شریف 6 ماہ سے پانامالیکس پرتاخیری حربے استعمال کر رہے ہیں،ایساکرکے انصاف کے نظام اور قوم کا مذاق اڑایا جا رہا ہے۔

ترجمان نعیم الحق کا کہناتھاکہ وزیر اعظم کے وکیل نے الیکشن کمیشن سے کہا کہ وہ دو ہفتے کے لیے باہر جا رہے ہیں،نوازشریف کے وکیل نے 15 روز کا وقت لیا جو افسوس ناک ہے، عوام تنگ آچکے ہیں۔

انہوں نے کہا کہ اس قوم کو مزید مشکلات میں نہ ڈالا جائے،اس مقدمے کو طول نہ پکڑنے دیں،اب اگلے مہینے کی تاریخ دے دی گئی ہے قوم 20 دن تک اسی کشمکش میں مبتلا رہےگی۔

مزید پڑھیں: الیکشن کمیشن،پانامہ لیکس کی سماعت 2 نومبر تک ملتوی

واضح رہے کہ الیکشن کمیشن نے پاناما لیکس کی تحقیقات کے حوالے سے اپنے دائرہ اختیار پردرخواستوں کی سماعت 2نومبر تک ملتوی کر دی ہے۔

اسلام آباد : وزیراعظم نوازشریف کا کہناہےکہ توانائی بحر ان پر قابو پانے کےلیے شب و روز کوشش کررہے ہیں دوہزار اٹھارہ میں لوڈ شیڈنگ کا خاتمہ ہوجائے گا۔

تفصیلات کےمطابق اسلام آباد میں مسلم لیگ ن کی مرکزی کونسل کا اجلاس وزیراعظم نوازشریف کےزیر صدارت ہوا جس میں وزیراعظم نے کہا کہ ترقی اورخوشحالی کا عمل روکنے والے عناصر کامیاب نہیں ہوں گے حکومت ترقی کا سفر جاری رکھے گی۔

پارٹی کے اراکین سے خطاب میں نوازشریف کا کہناتھاکہ بعض عناصر منفی سیاست کے زریعے ملک کو مفلوج کرنا چاہتے ہیں وہ 2014 میں ناکام ہوئے اس بار بھی ناکام ہوں گے۔

وزیراعظم نوازشریف کا کشمیریوں کے حوالے سے کہناتھاکہ دنیا کی کوئی طاقت ہمیں کشمیریوں کی آزادی کی تحریک کی حمایت سے نہیں روک سکتی۔بھارت اگر یہ سمجھتا ہے کہ طاقت کے ذریعے آزادی کی تحریک کو دبا لے گا تو یہ اس کی بھول ہے۔

توانائی کے بحران پر وزیراعظم نے کہا کہ تھر کی ترقی پرکام کررہے ہیں جس سے دس ہزارمیگاواٹ بجلی دوہزار اٹھارہ تک نیشنل گرڈ میں شامل ہوجائے گی۔

وزیراعظم نے کہا کہ چھیالیس ارب کے سی پیک منصوبے سے ترقی کا عمل جاری ہے۔موٹر ویز اور ہائی ویز کی تعمیر پر ایک ہزار ارب خرچ کیے جارہے ہیں۔

مزید پڑھیں:الیکشن کمیشن کا مسلم لیگ ن کوانتخابی نشان الاٹ کرنے سےانکار

یاد رہےکہ دو روز قبل الیکشن کمیشن آف پاکستان نے مسلم لیگ (ن) کو انتخابی نشان الاٹ کرنے سے انکار کر دیا تھااور جلد پارٹی انتخابات کرانے کی ہدایت کی تھی۔

واضح رہے کہ اسلام آباد میں مسلم لیگ ن کے مرکزی کونسل کے اجلاس میں 18 اکتوبر کو پارٹی انتخابات کرانے کافیصلہ کیا گیاہے۔

اسلام آباد : وزیراعظم نوازشریف کا کہنا ہے کہ مسئلہ کشمیر پر بھارت کا دوہرا معیار ہے ہے جس سے خطے میں مسائل پیدا ہو رہے ہیں۔

تفصیلات کےمطابق وزیر اعظم نواز شریف سے نیٹو ملٹری کمیٹی کے چیئر مین جنرل پیٹر نے ملاقات کی ہے جس میں مسئلہ کشمیر،پاک بھارت کشیدگی،خطے کی سیکورٹی صورتحال اور دو طرفہ امور پر تبادلہ خیال کیاگیا۔

اس موقع پر وزیر اعظم نواز شریف نے کہاکہ بھارت کا اڑی حملے کا پاکستان پر الزام غیر منصفانہ ہے۔ان کا کہنا تھا کہ پاکستان کی افغانستان سے متعلق پالیسی بالکل واضح ہے،افغانستان کا دشمن پاکستان کا دشمن ہے ،ہم نے ہمیشہ کہا کہ دہشت گردی مشترکہ دشمن ہے۔

نوازشریف نے کہا کہ افغانستان میں امن نہ صرف خطے بلکہ پاکستان کے لیے بھی ضروری ہے،امن کے حصول کے لیے پاکستان کی سول اور عسکری قیادت افغان حکام سے رابطے میں ہے۔

ان کا کہنا تھا کہ آرمی چیف اور میں نے افغانستان کا دورہ کر کے افغان حکام کو ہر ممکن تعاون کی یقین دہانی کرائی ہے۔

دوسری جانب جنرل پیٹر نے کہا کہ دنیا مسئلہ کشمیر سے الگ نہیں رہ سکتی۔ان کا کہنا تھا کہ دہشت گردی کے خلاف جنگ میں پاک فوج کا کردار قابل ستائش ہے جنہوں نے اس جنگ میں بہت کامیابیاں حاصل کی ہیں۔

نیٹو ملٹری کمیٹی کے چیئر مین کا کہنا تھا کہ پاکستان نیٹو کا روایتی اتحادی اور اہم ملک ہے۔جنرل پیٹر نے مسلح افواج کے سربراہوں سے ملاقاتوں پر بھی اطمینان کا اظہار کیا۔

واضح رہے نیٹو ملٹری کمیٹی کے چیئر مین جنرل پیٹر نے گزشتہ دور روز میں چیئر مین جوائنٹ چیف آف اسٹاف کمیٹی جنرل راشد محمود اور آرمی چیف جنرل راحیل شریف سے بھی ملاقاتیں کی تھی۔