اسلام آباد : احتساب عدالت نے توشہ خانہ ریفرنس میں اشتہاری ملزم نوازشریف کی جائیداد نیلام کرنے کا حکم دے دیا ، نیب نے نوازشریف کی جائیدادنیلامی کی درخواست کی تھی۔
تفصیلات کے مطابق احتساب عدالت میں توشہ خانہ ریفرنس میں نیب کی جانب سے نواز شریف کی جائیداد نیلامی سے متعلق درخواست پر سماعت ہوئی۔
احتساب عدالت نےنوازشریف کی جائیدادنیلامی کی نیب درخواست منظور کر تے ہوئے اشتہاری ملزم نوازشریف کی جائیدادنیلامی کا حکم دے دیا۔
عدالت نے کہا نوازشریف کی جہاں جائیدادہے متعلقہ صوبائی حکومت نیلام کرسکے گی اور ہدایت کی کہ ڈپٹی کمشنرلاہور،شیخوپورہ 60دن کےاندررپورٹ پیش کریں اور جائیدادیں نیلام کرکے رقم قومی خزانےمیں جمع کرائی جائے۔
عدالت کا کہنا تھا کہ نوازشریف کی گاڑیاں بھی 30دن کےاندرنیلام کی جائیں اور پولیس کی مدد سے گاڑیاں قبضے میں لیکربیچی جائیں۔
احتساب عدالت نے نواز شریف کےبینک اکاؤنٹس سےرقوم سرکاری خزانےمیں منتقل کرنےکاحکم دیتے ہوئے کہا جس جس جائیدادپر اعتراض نہیں آیا نیلام کی جا سکے گی۔
یاد رہے نیب نے سابق وزیراعظم نوازشریف کی جائیدادیں فروخت کرنےکا فیصلہ کرتے ہوئے جائیدادیں فروخت کرنے کے لئے احتساب عدالت سے رجوع کیا تھا، نیب نےسیکشن88سی آرپی سی کےتحت عدالت سےاجازت مانگی تھی۔
ذرائع کے مطابق فروخت کرنےوالی جائیدادوں میں اتفاق فاؤنڈری،حدیبیہ پیپر مل، بخش ٹیکسٹائل مل اور حدیبیہ انجینئرنگ کےشیئرز بھی شامل ہیں اس کے علاوہ لاہوراپر مال کی جائیدادا ور زرعی اراضی بھی فروخت کی جائےگی، نوازشریف کی جائیداد کی مالیت اربوں روپے بنتی ہے۔
واضح رہے کہ گذشتہ سال نومبر میں سابق وزیر اعظم نواز شریف کی تقریر ٹی وی پر نشر کرنے پر پابندی کے خلاف درخواست دائر کی گئی تھی، درخواست ہیومن رائٹس کمیشن، پی ایف یو جے اور دیگر معروف صحافیوں کی جانب سے بیرسٹر سلمان اکرم راجہ کے توسط سے دائر کی گئی درخواست میں وفاق کو بذریعہ سیکریٹری اطلاعات اور پیمرا کو فریق بنایا گیا تھا۔
