Tag: نوح دستگیر بٹ

جیولین تھروور گولڈ میڈلسٹ ارشد ندیم کے ساتھ ساتھ واپڈا نے کامن ویلتھ گیمز میں طلائی تمغہ جیتنے والے نوح دستگیر کو بھی کیش ایوارڈ سے نوازا۔

واپڈا نے اپنے ادارے سے تعلق رکھنے والے ایتھلیٹ اولمپیئن ارشد ندیم کے اعزاز میں واپڈا ہاؤس میں تقریب سجائی، پیرس اولمپکس میں تاریخی کامیابی پر ارشد ندیم کو 50 لاکھ روپے کا کیش ایوارڈ دیا گیا، واپڈا ہاؤس میں منعقدہ تقریب میں ایتھلیٹ نوح دستگیر بٹ کو بھی کیش ایوارڈ پیش کیا گیا۔

ایتھلیٹ نوح دستگیر بٹ نے ازبکستان میں شاندار پرفارمنس کا مظاہرہ کرتے ہوئے ویٹ لفٹنگ میں پاکستان کیلئےگولڈ میڈل جیتنے کا اعزاز حاصل کیا تھا۔

چیئرمین اور واپڈا اسپورٹس بورڈ کے پیٹرن انچیف انجینئر سجاد غنی نے ارشد ندیم کو کیش ایوارڈ دیا، گولڈ میڈلسٹ ارشد ندیم نے کیش ایوارڈ پر واپڈا اسپورٹس بورڈ کا شکریہ ادا کیا۔

اولمپئن ارشد ندیم نے کہا کہ واپڈا کی جانب سے کھیل اور کھلاڑیوں کی سرپرستی قابلِ تقلید ہے، واپڈا کا مجھ سمیت سیکڑوں کھلاڑیوں کا کیرئیر بنانے میں کلیدی کردار ہے۔

واپڈا کے چیئرمین نے اپنے خطاب میں کہا کہ ارشد ندیم نے اپنی تاریخی کامیابی سے پوری قوم کا سر فخر سے بلند کردیا، فخر ہے کہ ارشد کا تعلق واپڈ اسپورٹس بورڈ سے ہے، واپڈا کھلاڑی دنیا بھر میں پاکستان کا نام روشن کررہے ہیں۔

انجینئر سجاد غنی نے کہا کہ واپڈا پاکستان میں کھیلوں کے فروغ کے لیے اہم کردار ادا کررہا ہے، واپڈا کھلاڑی گزشتہ 2 سال میں عالمی مقابلوں میں پاکستان کیلئے 44 گولڈ میڈل جیت چکے ہیں۔

اس موقع پر واپڈا سے تعلق رکھنے والی سائبل سہیل، ویرونیکا سہیل اور ٹوئنکل سہیل کوبھی کیش ایوارڈ دیا گیا، تینوں بہنوں نے پاکستان کی نمائندگی کرکے جنوبی افریقہ میں پاورلفٹنگ میں گولڈ میڈل جیتا تھا۔

پاکستانی ویٹ لیفٹر نوح دستگیر بٹ پیرس اولمپکس کیلئے کوالیفائی نہ کرسکے، جس ایتھلیٹ کو انھوں نے شکست دی وہ ایونٹ کے لیے کوالیفائی کرگیا۔

اے آر وائی کے پروگرام میں گفتگو کرتے ہوئے نوح دستگیر نے کہا کہ پاکستان کی وجہ سے نہ ہی میں کسی کوالیفائنگ ایونٹ کے لیے جاسکا، نہ ہی مجھے بھیجا گیا، حکام کو چاہیے تھا کہ مجھے کامن ویلتھ گیمز کے بعد ہی انٹرنیشنل ٹریننگ کے لیے اور کوالیفائنگ ایونٹ کے لیے بھیجتے تاکہ میں اولمپک کے لیے کوالیفائی کرتا اور پاکستان کے لیے میڈیل جیتنے کی کوشش کرتا۔

نوح دستگیر بٹ نے کہا کہ میرے لیے اس وقت جو سب سے بڑی مشکل ہے وہ پاکستان کے اسپورٹس کے ادارے ہیں جنھوں نے مجھے اولمپک کوالیفائنگ ایونٹ کے لیے نہیں بھیجا نہ ہی مجھے دو سال سے انٹرنیشنل پلیٹ فارم فراہم کیا گیا۔

ویٹ لفٹر نے کہا کہ کامن ویلتھ گیمز میں ہم نے 72 ملکوں کے ایتھلیٹ کو شکست دی تھی اور ساؤتھ ایشین گیمز میں بھی میں نے 8 ملکوں کے کھلاڑیوں کو شکست دی تھی۔

نوح نے بتایا کہ میں جونئیر ورلڈ چیمپئن بھی ہوں جہاں میں نے اولمپک کے سلور میڈلسٹ اور ورلڈ سلور میڈلسٹ کو ہرایا تھا، جس نیوزی لینڈ کے پلیئر کو میں نے شکست دی تھی وہ اولمپک کے لیے کوالیفائی کرگیا مگر میں اولمپکس میں حصہ نہیں لے رہا۔

خیال رہے کہ پاکستانی ویٹ لفٹر نوح دستگیر بٹ 2022 کامن ویلتھ گیمز میں گولڈ میڈل حاصل کرچکے ہیں جبکہ اس کے علاوہ بھی انھوں نے کئی ایونٹس میں پاکستان کے لیے تمغے حاصل کیے ہیں۔

کھیلوں کا سب سے بڑا ایونٹ اولمپکس کل 27 جولائی سے شروع ہورہا ہے اور اس میں پاکستان کے صرف 7 ایتھلیٹس حصہ لے رہے ہیں۔

پاکستانی دستے میں ارشد ندیم ہی ایسے واحد ایتھلیٹ ہیں جن سے میڈل جیتنے کی امید ہے جبکہ نوح دستگیر بٹ جیسے ریسلرز حکومتی کوتاہی کی وجہ سے اولمپکس میں حصہ لینے سے محروم ہیں۔