Tag: نوشہرو فیروز

نوشہرو فیروز: زندہ دفن ہونے والی 15 دن کی معصوم بچی کی ماں گجر خاتون پہلی بار میڈیا کے سامنے آ گئی.

اے آر وائی نیوز سے گفتگو کرتے ہوئے مقتول نوزائیدہ بچی کی ماں گجر خاتون نے بتایا ’’میں پولیس کے خوف سے فصلوں میں چھپ کر بیٹھی ہوں، شوہر کو بھی گرفتار کر لیا گیا، بھوک سے مرنے سے بہتر ہے ہمیں قانونی حق دیا جائے۔‘‘

گجر خاتون نے کہا کہ بچی کےعلاج کے لیے پیسے نہیں تھے، بچوں کے تن پرکپڑے نہیں تو علاج کے لیے پیسے کہاں سے لاتے، گاؤں والوں نے مدد کی نہ ہی گاؤں کے چیئرمین علی گل راجپر نے بات سنی۔

انھوں نے کہا بڑی بیٹی بھی پندرہ سال تک بیماری سے لڑتے ہوئے فوت ہو گئی، میرے 2 بچے اور بھی ہیں، شوہر کو پولیس لے گئی ہے، اب انھیں کون کھلائے گا؟ کیا باقی دو بچوں کو بھی مار دیں؟

نومولود بچی زندہ دفن کرنے والے شخص کے خاندان پر پولیس نے زمین تنگ کر دی

دوسری طرف ملزم کے بھائی نے الزام لگایا کہ چیئرمین علی گل راجپر ایم پی اے کا خاص آدمی ہے، اس نے گاؤں میں کوئی ترقیاتی کام نہیں کرایا، چیئرمین گھر بیٹھے پیسے ہڑپ رہے ہیں۔ انھوں نے کہا یونین کونسل میں کوئی سہولت نہیں، چیئرمین کا بنگلہ بن گیا لیکن اسکول کی مرمت نہ ہو سکی۔

بتایا جا رہا ہے کہ ٹھاروشاہ پولیس نے ملزم طیب کے بھائی کو گرفتار کرنے کے بعد پندرہ ہزار لے کر آزاد کیا۔

نوشہرو فیروز: محکمہ پولیس میں طاقت کے غلط استعمال کے بڑھتے واقعات سے شہریوں کی زندگی اجیرن بن گئی ہے، نوشہرو فیروز میں مفت چائے پینے والے پولیس اہلکاروں نے ہوٹل مالک کو لاک اپ کر دیا۔

تفصیلات کے مطابق نوشہرو فیروز کے ایک علاقے میں مفت کی چائے پینے کے عادی پولیس اہلکاروں نے پارسل کیے جانے والی چائے کے پیسے طلب کیے جانے پر ہوٹل مالک کو گرفتار کر کے تھانے میں بند کر دیا۔

یہ واقعہ ٹنڈیارو کے علاقے محبت ڈیرو میں پیش آیا، جہاں چائے مفت میں نہ دینا ہوٹل مالک کے لیے ایک جرم بن گیا، ہوٹل مالک نے بتایا کہ پولیس اہلکار روز ہوٹل آ کر مفت کی چائے پیتے تھے، تاہم آج سپاہی ظہور گوپانگ کی جانب سے پارسل کا مطالبہ کیا گیا، پولیس اہلکاروں نے 5 چائے پارسل کروائی، جب ان سے پیسوں کا مطالبہ کیا گیا تو وہ سیخ پا ہو گئے اور ہمیں گرفتار کر کے تھانے لے گئے۔

ہوٹل مالک کے مطابق انھوں نے پولیس کے اعلیٰ افسران سے واقعے اور پولیس اہلکاروں کے رویے کی شکایت کی تھی، تاہم ان کی جانب سے کوئی ایکشن نہیں لیا گیا۔

ہوٹل مالک آفتاب گوپانگ نے اپنے ورثا کے ہمراہ پریس کلب پر احتجاج کرتے ہوئے الزام لگایا کہ جب انھیں گرفتار کیا گیا تو پولیس نے رشوت لے کر رہا کیا، انھوں نے مطالبہ کیا کہ پولیس اہلکار کے خلاف کارروائی کی جائے۔

دوسری طرف محبت ڈیرو کے ایس ایچ او محبوب چھاچھر نے رابطے پر بتایا کہ چائے کا کوئی ایشو نہیں ہے بلکہ یہ ان کا آپس کا تنازعہ ہے، تاہم ایس ایس پی نے معاملے کا نوٹس لے لیا ہے اور پولیس اہلکاروں کے خلاف انکوائری کی جا رہی ہے۔