سگریٹ جلانے کے لیے ماچس دینے سے انکار پر دو نوعمر لڑکوں نے ایک نوجوان کو چھریوں کے وار کرکے قتل کردیا۔
بھارتی دارلحکومت دہلی کی پولیس نے دو کم عمر لڑکوں کو ایک نوجوان کو قتل کرنے کے الزام میں گرفتار کیا ہے، پولیس نے بتایا کہ لڑکوں نے اس شخص کو اس لیے قتل کیا کہ مقتول نے نوجوانوں کو سگریٹ جلانے کے لیے ماچس دینے سے انکار کردیا تھا۔
افسوسناک واقعہ ہفتے کے روز بھارتی دارلحکومت کے علاقے تیمارپور میں پیش آیا، پولیس کو واقعے کی اطلاع پی سی آر کال کے ذریعے ملی تھی۔
پولیس جب جائے وقوع پر پہنچی تو اسے وہاں آٹو رکشہ اور اس کے اطراف میں خون ہی خون بکھرا نظر آیا اور مقتول شدید زخمی حالت میں ملا۔
فوری طور پر پولیس نے حملے کا نشانہ بننے والے شخص کو ہندو راؤ اسپتال منتقل کیا مگر وہاں پہنچنے پر ڈاکٹر نے اس کے مرنے کی تصدیق کردی۔
پولیس نے اس علاقے میں لگے سی سی ٹی وی کیمرے کی مدد سے دو نابالغ ملزمان کی شناخت کرنے کے بعد اتوار کو انھیں حراست میں لے لیا ہے۔
ڈی سی پی نے بتایا کہ پولیس نے کرائم سین سے شواہد اکٹھے کیے ہیں اور عینی شاہدین کا بیان بھی ریکارڈ کیا ہے جبکہ حملے میں استعمال ہونے والی چھری بھی قبضے میں لے لی گئی ہے۔
