اسلام آباد : وفاقی حکومت نے سرکاری دفاتر کے لیے نئے اوقات کار مقرر کر دئیے، تمام سرکاری دفاتر میں صبح نو بجے سے شام پانچ بجے تک کام ہوگا، جس کا نوٹیفیکشن جاری کردیا ہے۔
تفصیلات کے مطابق وفاقی حکومت کی جانب سے سرکاری دفتری کے اوقات کار تبدیل کردئیے گئے،جس کے بعد تبدیلی کا نوٹیفکیشن جاری کردیا گیا، نوٹیفکیشن کے مطابق تمام سرکاری اداروں میں دفتری اوقات صبح 9 سے شام 5 بجے تک ہوں گے ۔
یاد رہے کہ 24 اگست کو وزیراعظم عمران خان کی زیر صدارت ہونے والے وفاقی کابینہ کے اجلاس میں فیصلہ کیا گیا تھا کہ سرکاری دفاتر کے اوقات صبح 8 بجے سے لے کر 4 بجے کی بجائے صبح 9 بجے سے لے کر 5 بجے تک ہوں گے۔
اس سے قبل وفاقی کابینہ نے سرکاری دفاتر میں ہفتہ وار دو تعطیلات ختم کر کے اسے ایک کرنے کی سمری تیار کی اور ملازمین کی ڈیوٹی کے اوقات صبح 8 سے دوپہر 3 بجے تک کرنے کی سفارش بھی کی تھی۔
ذرائع کے مطابق سمری میں سفارش کی گئی تھی کہ سرکاری دفاتر میں دی جانے والی ہفتے کے روز کی چھٹی ختم کرنے کے لیے کابینہ منظوری دے۔
دوسری جانب وزارت داخلہ نے ملک بھر میں ہفتہ وار چھٹی کم کرنے کی مخالفت کرتے ہوئے سمری وفاقی کابینہ کو ارسال کی تھی، جس میں مؤقف اختیار کیا گیا تھا کہ 2011 میں وزارت پانی و بجلی کی سفارش پر دو چھٹیوں کا فیصلہ کیا گیا تھا، ہفتے میں 2چھٹیوں کا مقصد توانائی بحران پر قابو پانا اور بجلی کی بچت ہے۔
سمری کے مطابق 7 دنوں میں ایک تعطیل بڑھانے کے باوجود ہفتے وار کام کے اوقات کار 40 گھنٹے جبکہ اگر 6 دن کام ہوتا ہے تب بھی اتنا ہی وقت لگے گا۔
سمری میں کہا گیا تھا کہ ہفتے کی چھٹی ختم کرنے سے اداروں کی کارکردگی پر خاطر خواہ اثر نہیں پڑے گا، وفاقی کابینہ کی مرضی ہے ہفتے کی چھٹی ختم کرنی ہے یا جاری رکھنی ہے۔
