نیویارک : نگراں وزیر اعظم انوار الحق کاکڑ نیویارک پہنچ گئے، جہاں وہ آج مصروف دن گزاریں گے اور22 ستمبر کو جنرل اسمبلی کے78ویں اجلاس سے خطاب کریں گے۔
تفصیلات کے مطابق نگران وزیر اعظم انوار الحق کاکڑ 5 روزہ دورے پر نیویارک پہنچ گئے، پاکستانی سفیر مسعود خان اور مستقل مندوب منیر اکرم نے استقبال کیا، نگراں وزیر اعظم انوار الحق کاکڑ مختصر وفد کے ارکان کے ہمراہ نیویارک پہنچے ہیں۔
نگراں وزیر اعظم اقوام متحدہ جنرل اسمبلی کے اٹھہترویں اجلاس میں شرکت کریں گے اور اعلیٰ سطح کے مباحثے میں شریک ہوں گے۔
نگراں وزیر اعظم جمعہ 22 ستمبر کو جنرل اسمبلی کے78ویں اجلاس سے پالیسی خطاب کریں گے، اپنے خطاب میں وہ مقبوضہ کشمیر میں جاری مظالم اور افغانستان سے درپیش سیکورٹی چیلنجز کا ذکر کریں گے اور اقوام متحدہ کو سلامتی کونسل کی قراردادو ں کی یاد دلائیں گے۔
نگران وزیراعظم یواین جنرل اسمبلی کے78ویں اجلاس سے خطاب کریں گے اور عالمی رہنماؤں سے ملاقاتیں کریں گے۔
انوار الحق کاکڑ اپنے دورے میں عالمی رہنماؤں سے ملاقاتیں کریں گے، امریکا میں موسمیاتی تبدیلی پر منعقد ہونے والی کانفرنس میں شریک ہوں گے اور عالمی ذرائع ابلاغ کے نمائندوں سے بھی ملاقات ہوگی۔
اس کے علاوہ نگران وزیراعظم امریکا کے معروف تھنک ٹینکس کا بھی دورہ کریں گے اور امریکی صدر کے عشائیے میں شریک ہوں گے۔
وزیراعظم انوار الحق کاکڑ کے امریکی میڈیا سے انٹرویوز طے کر دیئے گئے ہیں ، واشنگٹن پوسٹ سمیت، سی این این، بلومبرگ، اے پی، نیوزویک وزیر اعظم کا انٹرویو کریں گے۔
اس کے ساتھ انوار الحق کاکڑ کی مائکروسافٹ کے فاؤنڈر بل گیٹس سے ملاقات طے ہیں جبکہ وہ چین کے نائب صدر، ایران کے صدر ، ترکی کے صدر طیب اردوان سے بھی اہم ملاقاتیں ہوگی۔
