اسلام آباد : نگراں حکومت نے بجلی چوروں اور بل ادا نہ کرنے والوں کے خلاف بڑے کریک ڈاؤن کا اعلان کردیا، نگراں وزیرتوانائی محمدعلی نے واضح کیا ہے کہ بجلی چوروں کو خصوصی عدالتوں سےسزائیں ملیں گی۔
تفصیلات کے مطابق نگران وزیراطلاعات مرتضیٰ سولنگی اور وزیرتوانائی محمد علی نے نیوز کانفرنس، وزیرتوانائی محمد علی نے پریس کانفرنس میں کہا کہ ہرعلاقے کے اندر مختلف نوعیت پر بجلی کی چوری ہوتی ہے، جب تک بجلی کی چوری ختم نہیں ہوگی قیمتیں نیچے نہیں آسکتیں،وزیرتوانائی محمد علی
محمد علی نے بتایا کہ وزیراعظم کی ہدایات ہیں بجلی چوری کرنیوالوں سےریکوری کریں، اسلام آباد،لاہور،گوجرانوالہ،فیصل آباداورملتان ڈسٹریبیوشن کمپنی میں 100 ارب کا نقصان ہے جبکہ پشاور، حیدرآباد،کوئٹہ،سکھر،آزادکشمیرڈسٹری بیوشن کمپنی میں479ارب روپےکانقصان ہوتا ہے۔
نگراں وزیر توانائی نے کہا کہ ہمارے پاس ڈیٹا ہے کہ کن فیڈرز سے بجلی زیادہ چوری ہوتی ہے ،جن علاقوں میں چوری زیادہ ہے وہاں پر ڈیٹا کے مطابق کارروائی کریں گے ، تمام ڈیٹا ہے کونسے علاقوں میں بجلی کی چوری زیادہ اورکہاں کم ہے، مردان کےعلاقےمیں بجلی چوری بہت زیادہ ہے، مردان میں 50 سے 83 فیصد تک بجلی چوری یا ادائیگیاں نہیں کر رہے۔
انھوں نے بتایا کہ متاثرہ علاقوں میں بجلی کی چوری کم کرنےکیلئےکریک ڈاؤن کریں گے ، بجلی چوروں کو خصوصی عدالتوں سےسزائیں ملیں گی۔
نگراں وزیر توانائی نے مزید کہا کہ بجلی چوری روکنے کیلئے تین اسٹیپ لئےہیں، جہاں پر 30 سے 60 فیصد نقصان ہے وہاں پرائیویٹ سیکٹرکوشامل کرسکتے ہیں۔
محمد علی کا کہنا تھا کہ وزیراعظم نےکہاآنےوالےدنوں میں سب کی پرفارمنس دیکھی جائےگی، بہت سےممالک میں ڈسٹریبیوشن کمپنیاں صوبوں کےنہیں وفاق کے ماتحت ہوتی ہیں، ڈسٹریبیوشن کمپنیاں صوبوں کےحوالے کی جائیں یا نجکاری ،کابینہ جلد فیصلہ کرے گی۔
نگراں وزیرتوانائی نے کہا کہ ماضی میں بجلی کارخانوں میں صرف حکومت ہی بجلی خریدسکتی تھی، کیپسٹی پے منٹ کم کرنے پر کام ہورہا ہے تھوڑاوقت لگےگا۔
ان کا مزید بتانا تھا کہ ڈسٹری بیوشن کمپنی کے بورڈآف ڈائریکٹرزکودیکھ رہےہیں ان میں تبدیلیاں لائیں گے، تمام چیف سیکریٹریز،آئی جیزکےساتھ بات چیت ہوچکی ہے، ان آفیسرزکی لسٹ بنالی ہےجوبجلی چوری میں ملوث ہیں، ان آفیسرز کو فیلڈ کی جاب سے ہٹا دیا جائے گا۔
محمد علی نے کہا کہ بجلی چوری میں ملوث افسران کی لسٹ الیکشن کمیشن کو بھجوا دی ہے، ہمارا ٹارگٹ ہے کہ 589ارب کی چوری کو جلد از جلد کم کیا جائے۔
دوسری جانب نگران وزیراطلاعات مرتضیٰ سولنگی نے گفتگو کرتے ہوئے کہا 589ارب روپے کی بجلی ہر سال چوری ہوتی ہے ، بجلی کی قیمتوں کے حوالے سے لوگوں کااحتجاج جائزہے، لوگوں کی پریشانیوں کاحل نکالنا ہے۔
مرتضیٰ سولنگی کا کہنا تھا کہ توانائی کے شعبے میں اصلاحات کی ضرورت ہے، گھریلو صارفین میں بعض بجلی چوری اور بعض بل ادا ہی نہیں کرتے۔
نگران وزیراطلاعات نے کہا کہ کسی وزیرکومفت بجلی نہیں ملتی، جوالاؤنسزملتے ہیں ان کے بھی اعدادوشمارہیں۔
