ARYNews.tv | Urdu – Har Lamha Bakhabar

Tag: نگراں حکومت

  • ملک میں ڈالر کے اسمگلرز اور ذخیرہ اندوزوں کے خلاف کارروائی کا فیصلہ

    ملک میں ڈالر کے اسمگلرز اور ذخیرہ اندوزوں کے خلاف کارروائی کا فیصلہ

    اسلام آباد : نگراں حکومت نے ملک میں ڈالر کے اسمگلرز اور ذخیرہ اندوزوں کے خلاف کارروائی کا فیصلہ کرلیا اور ایکشن کی تیاریاں شروع کردی گئیں۔

    تفصیلات کے مطابق نگران حکومت نے ڈالر کی قدر بڑھنے پر تشویش کا اظہار کیا اور نگران وزیراعظم انور الحق کاکڑ نے نگران وزیر خزانہ کو خصوصی ہدایات جاری کردیں۔

    نگران وزیراعظم اور نگران وزیر خزانہ کی ملاقات کی اندرونی کہانی سامنے آگئی ، جس میں نگراں وزیر اعظم انوارالحق کاکڑ نے ڈالر کی مصنوعی قدر بڑھنے پر تشویش کا اظہار کیا ہے۔

    ملاقات میں ملک میں ڈالر کے اسمگلرز اور ذخیرہ اندوزوں کے خلاف کارروائی کا فیصلہ کیا گیا، جس کے بعد ڈالر کے ذخیرہ اندوزوں کے خلاف ایکشن کی تیاریاں شروع کردی گئی ہیں۔

    ذرائع کا کہنا تھا کہ وزیر خزانہ نے ڈالر کی قدر میں استحکام کے لیے تجاویز طلب کرلیں۔

    ذرائع نے کہا ہے کہ ڈالر کی مصنوعی قدر بڑھنے والے ڈیلرز کے خلاف بھی ایکشن کا فیصلہ ہوا، ڈالر کی مصنوعی قلت کرنے والوں کے خلاف ایف آئی اے اور کسٹم افسران کو مزید متحرک کرنے کا فیصلہ کیا گیا ہے۔

    ذرائع کے مطابق ایف آئی اے اس سلسلے میں ڈالر ذخیرہ اندوزوں کے خلاف کاروائیاں تیز کرے گا جبکہ کسٹم حکام ڈالر کی اسمگلنگ کی روک تھام کے لیے بھرپور ایکشن لے گی۔

    ذرائع نے بتایا کہ ڈالر کی قدر میں سٹہ بازوں کے خلاف بھرپور ایکشن کے لیے حکمت عملی تیار کی جائے گی۔

  • نگراں حکومت کو اضافی اختیارات دینے کی تیاری، الیکشن ایکٹ 2017 میں ترامیم کا بل آج پیش ہوگا

    نگراں حکومت کو اضافی اختیارات دینے کی تیاری، الیکشن ایکٹ 2017 میں ترامیم کا بل آج پیش ہوگا

    اسلام آباد: نگراں حکومت کو اضافی اختیارات دینے کی تیاری جاری ہے، الیکشن ایکٹ 2017 میں ترامیم کا بل آج پیش ہوگا۔

    تفصیلات کے مطابق نگراں حکومت کو اضافی اختیارات دینے کے سلسلے میں الیکشن ایکٹ 2017 میں مجوزہ ترامیم کا بل آج پارلیمنٹ میں پیش کیا جائے گا۔

    ترمیم کے مطابق نگراں حکومت عالمی اداروں سے معاہدے کر سکے گی، مجوزہ ترمیمی بل کے مطابق حلقہ بندیوں کا عمل انتخابی شیڈول کے اعلان سے 4 ماہ پہلے مکمل ہوگا، حلقوں میں رجسٹرڈ ووٹرز کی تعداد برابر ہوگی۔

    پولنگ اسٹیشن میں کیمروں کی تنصیب میں ووٹ کی رازداری یقینی بنائی جائے گی، پریذائیڈنگ افسر نتیجہ فوری طورپر الیکشن کمیشن اور ریٹرننگ افسر کو بھیجنے کا پابند ہوگا، انٹرنیٹ کی سہولت نہ ہونے پر پریذائیڈنگ افسر اصل نتیجہ خود پہنچائے گا۔

    نتائج رات 2 بجے تک دیے جائیں گے، تاخیر کی صورت میں ٹھوس وجہ بتانا ہوگی، الیکشن نتائج کے لیے اگلے دن صبح 10 بجے کی ڈیڈ لائن ہوگی۔ سینیٹ ٹیکنوکریٹ سیٹ پر تعلیمی قابلیت کے علاوہ 20 سال کا تجربہ درکار ہوگا، قومی اسمبلی کی نشست کے لیے 40 لاکھ سے ایک کروڑ، جب کہ صوبائی نشست کے لیے انتخابی مہم پر 20 سے 40 لاکھ خرچ کرنے کی اجازت ہوگی۔

    ادھر نگراں حکومت کے اختیارات میں اضافے کے ترمیمی بل کو حکومت کی اتحادی اور اپوزیشن جماعتوں نے مسترد کر دیا ہے، مشترکہ پارلیمنٹ کے اجلاس میں پی پی رہنما رضا ربانی نے کہا کہ قومی اسمبلی اور سینیٹ کی طرح پارلیمنٹ کے مشترکہ سیشن کو بھی ربڑ اسٹیمپ بنایا جا رہا ہے، نگراں حکومت میں مزید اختیارات دینا جمہوری تابوت میں آخری کیل ثابت ہوگا۔

  • نگراں حکومت کی جانب سے مینار پاکستان میں پانی چھوڑا گیا، فیاض چوہان

    نگراں حکومت کی جانب سے مینار پاکستان میں پانی چھوڑا گیا، فیاض چوہان

    پاکستان تحریک انصاف کے رہنما فیاض الحسن چوہان نے کہا کہ حیران ہوں نگراں حکومت کی جانب سے مینار پاکستان میں پانی چھوڑا گیا۔

    پی ٹی آئی رہنما فیاض الحسن چوہان نے جوڈیشل کمپلیکس راولپنڈی کے باہر میڈیا سے گفتگو کرتے ہوئے کہا کہ اب تک پی ٹی آئی کے 500 کے قریب کارکن پکڑے گئے ہیں، پی ٹی آئی کارکنوں، رہنماؤں کے گھروں پر چھاپے مارے جارہے ہیں۔

    فیاض چوہان کا کہنا تھا کہ یہ لوگ ان کارروائیوں سے عمران خان کو مزید پاپولر کر رہے ہیں، حیرانی ہے نگراں حکومت کی جانب سے مینار پاکستان میں پانی چھوڑا گیا۔

    پی ٹی آئی رہنما نے کہا کہ آئین و قانون کے مطابق الیکشن کمیشن کو کوئی اختیار نہیں وہ الیکشن کی تاریخ دے، الیکشن کمیشن سمیت ان سب پر آرٹیکل 6 لگتا ہے۔

    فیاض الحسن چوہان نے مزید کہا کہ الیکشن میں کسی صورت تاخیر نہیں ہوسکتی،کیا 8 اکتوبر تک مہنگائی ختم ہو جائیگی، پی ڈی ایم الیکشن میں اس وقت پی ٹی آئی کا مقابلہ نہیں کرسکتی۔

    پی ٹی آئی رہنما نے مزید کہا کہ سپریم کورٹ سے ہمارا مطالبہ ہے الیکشن کمیشن پر آرٹیکل 6 لگایا جائے، الیکشن کمیشن نے آئین وقانون کی دھجیاں اڑائی ہیں۔

  • کے پی میں نگراں حکومت کی کابینہ کی تشکیل ، ناموں کا انتخاب

    پشاور : نگراں وزیراعلیٰ خیبرپختونخوا اعظم خان کی نگراں کابینہ کے لیے ناموں کا انتخاب کرلیا گیا، نگراں کابینہ کی تقریب حلف برادری آج ہوگی۔

    تفصیلات کے مطابق نگراں وزیراعلیٰ خیبرپختونخوا اعظم خان کی نگراں کابینہ کی تشکیل کے لیے ناموں کا انتخاب کرلیا گیا۔

    نگراں کابینہ میں بارہ وزرا اور تین مشیر شامل ہوں گے، گورنر خیبرپختونخوا سے نگراں وزیراعلیٰ کے پی اعظم خان نے ملاقات کی جس میں منتخب ناموں پر مشاورت کی گئی۔

    کابینہ میں حاجی غفران، خوشدل خان، حامد شاہ، ایڈووکیٹ ساول نذیر، فضل الہیٰ، عدنان جلیل، تاج آفریدی، محمدعلی شاہ، ارشاد قیصر اور ریاض انور ، رحمت سلیم خٹک، شاکراللہ اور حمایت اللہ بطور مشیر شامل ہوں گے۔

    اس کے علاوہ کابینہ میں پیپلز پارٹی کے رہنما نجم الدین کے صاحبزادے شاکر اللہ بھی شامل ہیں۔

    نگراں کابینہ کی تقریب حلف برادری آج گورنر ہاؤس خیبر پختونخواہ میں ہوگی ، جہاں نگراں کابینہ حلف لے گی۔

  • نگراں حکومت، عمران خان نے پارلیمانی کمیٹی کے لیے 4 نام بھجوا دیے

    نگراں حکومت، عمران خان نے پارلیمانی کمیٹی کے لیے 4 نام بھجوا دیے

    اسلام آباد: نگراں حکومت کے لیے عمران خان نے پارلیمانی کمیٹی کے لیے 4 نام بھجوا دیے۔

    تفصیلات کے مطابق وزیر اعظم عمران خان نے اسپیکر کو 8 رکنی پارلیمانی کمیٹی کے لیے 4 نام بھجوا دیے، جن میں اسد عمر، پرویز خٹک، شفقت محمود اور شیریں مزاری کے نام شامل ہیں۔

    مذکورہ پارلیمانی کمیٹی نگراں حکومت کے لیے مشاورت کرے گی، اپوزیشن کو بھی پارلیمانی کمیٹی کے لیے 4 نام دینا ہوں گے۔

    ادھر وزیر اعظم نگراں حکومت کے لیے پارلیمانی کمیٹی کے نام تجویز کر رہے ہیں ادھر سپریم کورٹ آف پاکستان نے اسپیکر رولنگ پر فیصلہ محفوظ کر لیا ہے، امکان ہے کہ عدالت تحریک عدم اعتماد پر ووٹنگ کے حق میں فیصلہ جاری کرے۔

    دوسری طرف الیکشن کمیشن نے صدر مملکت کے خط کا جواب دیتے ہوئے کہا ہے کہ صاف شفاف، غیر جانب دارانہ الیکشن کے لیے 4 ماہ درکار ہیں، اور اکتوبر میں ہی الیکشن کا انعقاد ممکن ہے۔

    الیکشن کمیشن نے کہا کہ حلقہ بندیاں الیکشن کے انعقاد کے لیے کلیدی ہیں، بارہا الیکشن کمیشن کے خطوط کے باوجود مردم شماری کی حتمی اشاعت بروقت نہ کی گئی، حکومت کی اس تاخیر کو الیکشن کمیشن کے ذمے نہیں ڈالا جا سکتا۔

  • طالبان کیسا نظام حکومت لانے والے ہیں؟ الجزیرہ کا دعویٰ

    طالبان کیسا نظام حکومت لانے والے ہیں؟ الجزیرہ کا دعویٰ

    کابل: عربی نیوز چینل الجزیرہ نے دعویٰ کیا ہے کہ طالبان کی منصوبہ بندی افغانستان میں جامع نگراں حکومت لانے کی ہے۔

    تفصیلات کے مطابق الجزیرہ ٹی وی نے کہا ہے کہ طالبان افغانستان میں ایک جامع کیئر ٹیکر حکومت لانا چاہتے ہیں، اس نگراں حکومت میں تمام قبائلی اور نسلی رہنما شامل کیے جائیں گے۔

    ٹی وی رپورٹ کے مطابق طالبان نگراں حکومت کا دورانیہ ابھی واضح نہیں کیا گیا ہے، تاہم اس میں شمولیت کے لیے 12 سے زائد ناموں پر غور کیا جا چکا ہے، اور اس میں طالبان کمانڈرز کو بھی شامل کیا جائے گا۔

    طالبان رہنماؤں کو نشانہ بنانے کی کوشش ناکام، این ڈی ایس اہلکار رنگے ہاتھوں گرفتار

    الجزیرہ کا کہنا ہے کہ طالبان ذرائع نے بتایا کہ نگراں حکومت کے لیے نامزد وزرا کا فیصلہ کرنے کے لیے طالبان کی قیادت کونسل کا اجلاس طلب کیا گیا ہے، جس میں ابتدائی طور پر عدلیہ، داخلی سلامتی، خارجہ امور اور اطلاعات کے وزرا نامزد ہوں گے۔

    ملا برادر کے بارے میں کہا گیا ہے کہ وہ کابل میں ہیں، جب کہ ملا یعقوب ابتدائی مشاورت کے لیے قندھار سے کابل آ رہے ہیں، الجزیرہ کا کہنا ہے کہ طالبان قیادت حکومت میں نئے چہرے لانا چاہتی ہے، اور طالبان چاہتے ہیں کہ حکومت میں تاجک اور ازبک قبائلی رہنماؤں کے بیٹے شامل ہوں۔

  • نگراں حکومت کی ایک بار پھر عوام پر پٹرول بم گرانے کی تیاری

    نگراں حکومت کی ایک بار پھر عوام پر پٹرول بم گرانے کی تیاری

    اسلام آباد: نگراں حکومت نے ایک بار پھر عوام پر پٹرول بم گرانے کی تیاری کرلی ہے، پٹرولیم مصنوعات کی قیمتوں میں اضافے کی سمری وزراتِ خزانہ کو ارسال کردی۔

    تفصیلات کے مطابق نگراں حکومت کی جانب سے وزارتِ خزانہ کو بھجوائے جانے والی سمری میں پٹرولیم مصنوعات کی قیمتوں میں 7 روپے فی لیٹر اضافے کی تجویز دی گئی ہے۔

    سمری میں جی ایس ٹی کے 2 مختلف ریٹس پر قیمتیں بڑھانے کی تجویز بھی دی گئی ہے، پٹرولیم مصنوعات کی قیمتیں یکم اگست سے بڑھنے کا امکان ہے۔

    سمری کے مطابق موجودہ شرح کے حساب سے پٹرول 2 روپے 45 پیسے اور ہائی اسپیڈ ڈیزل کی قیمت میں 2 روپے 70 پیسے اضافہ متوقع ہے۔

    مٹی کے تیل کی قیمت میں بھی 3 روپے 25 پیسے اضافے کا امکان ہے جب کہ سمری میں لائٹ ڈیزل 3 روپے 40 پیسے مہنگا کرنے کی سفارش کی گئی ہے۔

    پیٹرولیم مصنوعات کی قیمتوں میں ہوشربا اضافہ، پیٹرول 92روپے لیٹر تک جا پہنچا

    نئے سیلز ٹیکس کے تحت پٹرولیم مصنوعات 7 روپے 40 پیسے مہنگی ہونے کا امکان ہے، تاہم نگراں حکومت قیمتوں میں اضافے کا حتمی فیصلہ کل کرے گی۔

    واضح رہے کہ نگراں حکومت نے آتے ہی پٹرولیم مصنوعات میں اضافہ کر کے ملک میں مہنگائی کی ایک نئی لہر پیدا کر دی تھی، جس پر عمران خان سمیت دیگر سیاست دانوں نے بھی ردِ عمل ظاہر کیا تھا، موجودہ اضافے کی تجویز پر اگر عمل ہوتا ہے تو یہ تیسری مرتبہ کا اضافہ ہوگا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • با اثر شخصیات کے سامنے قواعد و ضوابط پر سمجھوتہ نہ کیا جائے، نگراں وزیرِ قانون پنجاب

    با اثر شخصیات کے سامنے قواعد و ضوابط پر سمجھوتہ نہ کیا جائے، نگراں وزیرِ قانون پنجاب

    لاہور: پنجاب کے نگراں وزیر قانون نے ملکی اداروں کے افسران کو ہدایت کی ہے کہ با اثر شخصیات کے سامنے قواعد و ضوابط پر کوئی سمجھوتہ نہ کیا جائے۔

    ان خیالات کا اظہار وہ اپنی زیرِ صدارت منعقد ہونے والے ایک اجلاس میں کر رہے تھے، اجلاس میں صوبائی وزیر قانون ضیا حیدر رضوی نے پارلیمانی امور کا جائزہ لیا۔

    اجلاس میں نگراں وزیر قانون کو افسران کی جانب سے محکمہ جاتی بریفنگ دی گئی، ضیا حیدر نے افسران کی بریفنگ پر اطمینان کا اظہار کیا۔

    صوبائی وزیر نے کہا کہ قانون وضع کرنے والے اداروں میں 100 فی صد میرٹ چاہتے ہیں، میرٹ کے لیے محکموں میں پالیسیوں کا جائزہ لے رہے ہیں۔

    پنجاب کے نگراں وزیرِ قانون ضیا حیدر نے پارلیمانی امور کا جائزہ لیتے ہوئے کہا کہ کرپشن ملک کا سب سے بڑا مسئلہ ہے، اداروں میں رشوت اور سفارش سے گریز کیا جائے۔

    نگراں حکومت آتے ہی ملک میں بجلی کے بحران میں اضافے کا خدشہ

    نگراں وزیرِ قانون کا کہنا تھا کہ قواعد و ضوابط پر کسی بھی صورت میں سمجھوتہ نہ کیا جائے چاہے سامنے کتنی ہی با اثر شخصیت کیوں نہ ہو، نسلوں کو نوازنے کا سلسلہ ختم ہونا چاہیے۔

    خیال رہے کہ انتخابات کے بعد نئی حکومت بننے تک نگراں حکومت ملکی معاملات دیکھ رہی ہے، جس کی اوّلین ذمہ داری ملک میں شفاف انتخابات کا انعقاد ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • پیٹرولیم مصنوعات میں ہوش ربا اضافے کے بعد نگراں حکومت نے قیمتوں میں کمی کردی

    پیٹرولیم مصنوعات میں ہوش ربا اضافے کے بعد نگراں حکومت نے قیمتوں میں کمی کردی

    اسلام آباد: نگراں حکومت نے پیٹرولیم مصنوعات میں رواں ماہ کی پہلی تاریخ کو ہوش ربا اضافے کے بعد آج قیمتوں میں کمی کرنے کا اعلان کر دیا ہے۔

    تفصیلات کے مطابق پیٹرول 4 روپے 26 پیسے فی لیٹر سستا کر دیا گیا، جب کہ ہائی اسپیڈ ڈیزل 6 روپے37 پیسے فی لیٹر سستا کر دیا گیا۔

    حکام وزارت خزانہ کے مطابق مٹی کا تیل 3 روپے 74 پیسے اور لائٹ ڈیزل 5 روپے 54 پیسے سستا کر دیا گیا، پیٹرولیم مصنوعات کی قیمتوں میں کمی کا اطلاق آج رات 12 بجے سے ہوگا۔

    نگراں حکومت نے پیٹرول اور مٹی کے تیل پر ٹیکس کی شرح بھی 17 سے 12 فی صد کرنے کا فیصلہ کر لیا ہے، جب کہ ہائی اسپیڈ ڈیزل میں سیلز ٹیکس کی شرح 31 سے 24 فی صد اور لائٹ ڈیزل پر سیلز ٹیکس کی شرح 17 سے 9 فی صد کر دی گئی ہے۔

    نگراں حکومت کے وزیر اطلاعات علی ظفر نے کہا ہے کہ نگراں حکومت عوامی شکایت سے متعلق مکمل آگاہ ہے، پیٹرولیم مصنوعات کی قیمتوں میں کمی سے معاشی پہیا تیزی سے چلے گا۔

    پیٹرول کی قیمت میں ایک بار پھر اضافہ، سو روپے لیٹر تک جا پہنچا

    نگراں وزیر اطلاعات کا مزید کہنا تھا کہ قیمتوں میں کمی سے حکومت کو 10 ارب کا نقصان ہوگا، تاہم حکومت کو عوامی پریشانیوں کا ادراک ہے۔

    واضح رہے کہ نگراں حکومت نے آتے ہی ایک ہی ماہ میں دو مرتبہ پیٹرولیم مصنوعات کی قیمتوں میں اضافہ کیا، وزارتِ خزانہ کی جانب سے سمری منظور ہونے کے بعد پیٹرول کی قیمت میں 7 روپے 54 پیسے اضافے سے پیٹرول 99.50 پیسے فی لیٹر ہوگیا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ٹیکس ایمنسٹی اسکیم کےتحت اب تک 50 ارب روپے وصول ہوئے‘ علی ظفر

    ٹیکس ایمنسٹی اسکیم کےتحت اب تک 50 ارب روپے وصول ہوئے‘ علی ظفر

    اسلام آباد: نگراں وزیراطلاعات سید علی ظفرکا کہنا ہے کہ ٹیکس ایمنسٹی اسکیم کے تحت اب تک 50 ارب روپے وصول ہوئے ہیں۔

    تفصیلات کے مطابق نگراں وزیراطلاعات ونشریات سید علی ظفر نے ایک انٹرویو میں کہا کہ ایمنسٹی اسکیم کا مقصد پاکستانی شہریوں کو غیراعلانیہ اثاثوں کو دستاویزی شکل دینا ہے۔

    انٹرویو کے دوران پٹرولیم مصنوعات سے متعلق سوال پر انہوں نےکہا کہ پٹرولیم مصنوعات کی قیمتوں میں اضافہ عالمی منڈی میں اضافے کو مدنطررکھ کرکیا گیا ہے۔

    افغان پناہ گزینوں کے پاکستان میں قیام سے متعلق سوال پر نگراں وزیراطلاعات نے کہا کہ اس میں مزید 3 ماہ کی توسیع کی گئی ہے۔

    سید علی ظفر نے انٹرویو میں کہا کہ دنیا کو دہشت گردی کے خلاف جنگ میں پاکستان کی جانب سے دی گئی قربانیوں کا اعتراف کرنا چاہیے۔

    نگراں وزیراطلاعات نے گرے لسٹ سے متعلق کہا کہ پاکستان کو گرے لسٹ سے باہرنکلنے کے لیے فنانشل ایکشن ٹاسک فورس کی طرف سے دیے گئے 26 نکات پرعملدرآمد کی کوشش کرے گا۔

    انہوں نے الیکشن 2018 کے حوالے سے کہا کہ آزادانہ اور شفاف انتخابات کا انعقاد یقینی بنانے کے لیے ہرممکن اقدامات کیے جا رہے ہیں اور بین الاقوامی مبصرین کو پاکستان میں انتخابی عمل کی نگرانی کی مکمل آزادی ہوگی۔

    نگراں حکومت نے ایمنسٹی اسکیم میں ایک ماہ کی توسیع کردی

    خیال رہے کہ نگراں حکومت کی جانب سے ٹیکس ایمنسٹی اسکیم میں ایک ماہ کے لیے توسیع سے متعلق صدرممنون حسین کوسمری ارسال کی گئی تھی جس پرانہوں نے دستخط کردیے تھے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔