لاہور: نگران وزیر اعلیٰ پنجاب محسن نقوی نے کہا ہے کہ کوئی پولیس کو چیلنج کرے گا قانون ہاتھ میں لےگا تو وہ ہاتھ توڑیں گے۔
تفصیلات کے مطابق نگراں وزیر اعلیٰ پنجاب محسن نقوی نے لاہور میں پریس کانفرنس کرتے ہوئے کہا کہ دو دن قبل پولیس والوں نے کینال روڈکو کلیئر کرایا، پولیس اور رینجرز بھی وہاں پر موجود تھی، دونوں بار میں نے پولیس سے کہا آپ واپس آجائیں، ہماری کوشش ہے کوئی ایسی چیز نہ ہو جس سےماحول خراب یا نقصان ہو۔
انہوں نے کہا کہ آپریشن کے دروان پولیس آگے جاناچاہتی تھی انہیں پتا تھاکہ آگے اسلحہ بردارکھڑے ہیں، کینال روڈکھلنےکےبعدرات پولیس والا گھر جارہا تھا اسے تشدد کا نشانہ بنایاگیا انکا اسلحہ چھیناگیا وین کو توڑ کر نہر میں پھینک دیا۔
نگراں وزیراعلیٰ پنجاب نے کہا کہ پولیس کو کہہ دیا ریاست کی رٹ قائم کرنے کیلئے جو کرنا پڑے کریں، یہ نہیں ہوسکتا پولیس مار کھاتی رہے اور ہم چپ رہیں، کئی دنوں سے پولیس کو کہہ رہا تھا کہ آپ نے صبر سے کام لینا ہے۔
انکا کہنا تھا کہ میں نے آئی جی سے کہا انہیں ایک ڈیڈ لائن دے دیں، یہ عام سیاسی کارکن نہیں کرتا، آج صبح پولیس والوں کوکہہ دیا اب انہیں جو کرنا پڑا کرینگے،کوئی پولیس کو چیلنج کرےگا قانون ہاتھ میں لےگا تو وہ ہاتھ توڑیں گے، کل ایک تھریٹ لیٹر بھی آیاہے، جو کچھ نظر آرہا ہے وہاں پر دہشت گردی بھی ہوسکتی ہے۔
محسن نقوی نے کہا کہ زمان پارک میں دہشتگرد بھی ہیں تصاویر موجود ہیں، اس طرح کی سیاسی سرگرمیاں کوئی جماعت نہیں کرتی، میں پولیس،رینجرز اور اپنی فورس کیساتھ کھڑا ہوں، اب اگرکوئی ایسا کرے گا اسے بھر پور جواب دیا جائے گا۔
’زمان پارک میں موجود دہشت گرد پولیس والوں کو مار رہے ہیں گاڑیاں توڑ رہے ہیں، اب کوئی لحاظ نہیں ہوگا اگر کچھ کیا گیا تو اس کا جواب سخت ملےگا، پچھلے7 دن جو دہشتگردی ہوئی اس کی تحقیقات کیلئے جےآئی ٹی بنارہے ہیں، پنجاب حکومت کی جانب سے جےآئی ٹی کا نوٹیفکیشن آج جاری کیاجائیگا‘۔
انہوں نے کہا کہ پنجاب حکومت آج الیکشن کمیشنکو خط لکھ رہی ہے، سیاسی سرگرمیوں سے ہٹ کر جو کچھ ہوا وہ تفصیل دینگے، تمام چیزوں کی تفصیلات الیکشن کمیشن کوبھی بھجوائے گے۔
نگراں وزیر اعلیٰ پنجاب محسن نقوی نے زمان پارک آپریشن میں حصہ لینے والے پولیس کے لیے پیکچ کا اعلان کیا ہے، معمولی زخمی پولیس کیلئے ایک لاکھ، اور زیادہ زخمی کو 5 لاکھ روپے دیئے جائیں گے۔
محسن نقوی کا مزید کہنا تھا کہ عمران خان کو پولیس کو کھلے عام دھمکیاں دینے کی اجازت نہیں دینگے، عمران خان دھمکیاں دینا چاہتے ہیں تو پولیس کی سیکیورٹی واپس دے دیں، انہوں نے کل بھی پولیس والوں کو تھریٹ کیا ہے۔
انکا مزید کہنا تھا کہ عمران خان آئی جی، سی سی پی او کبھی تیسرا تو کبھی چوتھا نام لیتے ہیں، انہیں پولیس چیف یاکسی پراعتمادنہیں توسیکیورٹی واپس کردیں، پولیس گالیاں کھاکر سیکیورٹی نہیں دے سکتی۔
