اسلام آباد : سیکریٹری جنرل پیپلزپارٹی نیئرحسین بخاری نے کہا ایک افطار پارٹی نے عوام دشمنوں کو حواس باختہ کر دیا، حکمران اب بغیر سحری افطاری لمبےروزوں کی تیاری پکڑیں۔
تفصیلات کے مطابق سیکریٹری جنرل پیپلزپارٹی نے بلاول بھٹو کی افطار پارٹی پر حکومتی رہنماؤں کی جانب سے تنقید پر کہا ایک افطار پارٹی نے عوام دشمنوں کو حواس باختہ کر دیا، اپوزیشن کا فرض ہے کہ نالائق حکمرانوں کیخلاف عوامی آواز بنے۔
نیئربخاری کا کہنا تھا مانگے تانگے کے حکمران اب بغیر سحری افطاری لمبےروزوں کی تیاری پکڑیں، بلاول نے درپیش سنگین معاملات کی نشاندہی کی۔
یاد رہے گذشتہ روز زرداری ہاؤس اسلام آباد میں پیپلز پارٹی کے چیئرمین بلاول بھٹو زرداری نے افطار ڈنر کا اہتمام کیا جس میں ن لیگ کی نائب صدر مریم نواز کی قیادت میں ن لیگ کے وفد سمیت سیاسی جماعتوں کے رہنماؤں نے شرکت کی۔
دعوتِ افطار کے بعد اپوزیشن رہنماؤں کی مشترکہ پریس کانفرنس میں فیصلہ کیا عید الفطر کے بعد اپوزیشن جماعتیں ایوان کے اندر اور باہر حکومت کے خلاف علیحدہ علیحدہ احتجاج کریں گی۔
مزید پڑھیں ـ اپوزیشن جماعتوں کا عید کے بعد علیحدہ علیحدہ احتجاج کا فیصلہ
بلاول نے کہا تھا کہ اُس سے قبل مولانافضل الرحمان کی سربراہی میں آل پارٹیز کانفرنس ہوگی جس میں لائحہ عمل طے کیا جائے گا، ملک کے مسائل کےحل کیلئے اپوزیشن اپنا کردار ادا کرتی رہے گی۔
بعد ازان وزیراعظم عمران خان نے کہا تھا کہ آج کچھ لوگ جمہوریت بچانے کے لئے جمع ہوئے ہیں، یہ سارے وہ لوگ ہیں جن کی وجہ سے پاکستان آج تک آگے نہ بڑھ سکا۔
