Tag: نیب راولپنڈی

راولپنڈی: نیب ترمیمی آرڈیننس سے فیض یاب ملزمان کی سنچری مکمل ہو گئی ہے، نیب راولپنڈی کے 25 ارب روپے مالیت کے ریفرنس ختم ہو گئے۔

تفصیلات کے مطابق 103 ملزمان کے خلاف اسلام آباد کی احتساب عدالتوں نے مقدمات ختم کر دیے، گزشتہ حکومت کے آرڈیننس سے ای او بی آئی اسکینڈل، توقیر صادق تعیناتی کیس بھی نیب کو واپس ہو گئے۔

سابق وزیر اعظم شوکت عزیز، سابق سیکریٹری پانی شاہد رفیق بھی بچ نکلے، ادویات کی قیمتوں میں مصنوعی اضافے کے ملزم سابق سیکریٹری قانون ارشد فاروق بھی بری ہو گئے، ارشد فاروق فہیم پر ادویات بنانے والی کمپنیوں کو نوازنے کا الزام تھا۔

پی ٹی اے کے ساتھ 21 ارب غبن کیس میں ٹیلی کام کمپنی کے افسران جاوید فیروز اور شاہد فیروز بھی بری ہو چکے ہیں، بینک کرپشن کیس میں حیات اللہ بنگش کے خلاف کیس بھی ترمیمی آرڈیننس کے تحت ختم کر دیا گیا۔

سید پور ویلیج کی اراضی ہتھیانے کے ملزم حیات خان مندوخیل کے خلاف کیس بھی خارج کر دیا گیا، ہاؤسنگ فراڈ کیس میں ڈاکٹر فرزانہ، سردار کیناف اور سید اشفاق حسین شاہ بھی بری ہو گئے۔

جعلی این او سی سے سرکاری رقوم نکلوانے کے 5 ملزمان بھی دائرہ اختیار ختم ہونے پر بری ہو گئے ہیں، لیاقت قائمخانی اور آصف زرداری ترمیمی آرڈیننس کے تحت ایک ایک کیس میں ضمانت لے چکے۔

راولپنڈی: آمدن سے زائد اثاثوں کے کیسز میں نیب کو ایک اور کامیابی مل گئی ہے، ایک سی ڈی اے افسر کو 10 سال کی سزا سنا دی گئی۔

تفصیلات کے مطابق سرکاری افسران کے آمدن سے زائد اثاثوں کے خلاف کیسز میں نیب کی ایک اور کامیابی سامنے آ گئی، نیب راولپنڈی کے ریفرنس میں کیپٹل ڈیویلپمنٹ اتھارٹی (سی ڈی اے) کے ایک افسر کو 10 سال سزا سنا دی گئی۔

ڈپٹی ڈائریکٹر سی ڈی اے غلام مرتضیٰ ملک پر 5 کروڑ 70 لاکھ جرمانہ بھی عائد کیا گیا ہے، غلام مرتضیٰ ملک اثاثوں کے ذرائع آمدن نہ دکھا سکے تھے۔

احتساب عدالت راولپنڈی نے جرم ثابت ہونے پر سزا سنائی، یہ ریفرنس نیب کی تفتیشی افسر مریم بنت سعید نے دائر کیا تھا، جب کہ احتساب عدالت میں پراسیکیوٹر سردار طاہر ایوب نے کیس کی پیروی کی۔

واضح رہے کہ غلام مرتضیٰ ملک صفا گولڈ مال کیس میں بھی سزا یافتہ ہیں۔