Tag: نیب راولپنڈی

راولپنڈی: قومی احتساب بیورو (نیب) نے چیئرمین پاکستان پیپلز پارٹی بلاول بھٹو کو دوبارہ طلب کر لیا۔

تفصیلات کے مطابق چیئرمین پیپلز پارٹی بلاول بھٹو کو نیب راولپنڈی نے پارک لین کیس میں طلب کر لیا ہے۔

بلاول بھٹو کو نیب نے 17 مئی کو طلبی کا نوٹس جاری کر دیا گیا، بلاول نے پہلی پیشی پر سوالات کے جوابات بھی تا حال جمع نہیں کرائے۔

نیب میں پہلی پیشی پر آصف زرداری ہی زیادہ تر بلاول کے جوابات دیتے رہے، نیب کی جانب سے اس مرتبہ بلاول بھٹو کو تنہا طلب کیا گیا ہے۔

واضح رہے کہ 20 مارچ کو آصف زرداری اور بلاول بھٹو نیب کی تفتیشی ٹیموں کے سامنے پیش ہوئے تھے، نیب کی 16 رکنی ٹیم نے ان سے پوچھ گچھ کی۔

یہ بھی پڑھیں:  پارک لین کمپنی کیس : آصف زرداری اور بلاول بھٹو نے بیان ریکارڈ کرادیا

بلاول بھٹو نیب کی کمبائنڈ انویسٹی گیشن ٹیم کے سامنے پیش ہوئے تھے، انھوں نے بیان ریکارڈ کراتے ہوئے کہا امید کرتا ہوں آئندہ مجھے نیب نہیں بلائے گا۔

نیب کی جانب سے پی پی رہنماؤں کو سوال نامہ فراہم کیا گیا تھا اور ہدایت کی گئی تھی کہ 3 سے 4 دن میں جوابات جمع کرائے جائیں۔

یہ بھی پڑھیں:  پارک لین جعلی اکاؤنٹس کیس، گرفتار ملزم زرداری اور بلاول کے خلاف وعدہ معاف گواہ بن گیا

خیال رہے کہ پارک لین جعلی اکاؤنٹس کیس میں گرفتار ملزم سلیم فیصل آصف زرداری اور بلاول کے خلاف وعدہ معاف گواہ بن گیا ہے۔

فیصل سلیم نے نیب کی تفتیشی ٹیم کو بیان دیا تھا کہ پارک لین کی انتظامیہ کے حکم پر تمام کام کیے، بلاول بھٹو اور آصف زرداری پارک لین کے 25 ، 25 فی صد پارٹنر ہیں۔

اسلام آباد: پانی کی فراہمی کا غیر قانونی ٹھیکہ دینے پر آصف زرداری کو نیب نے طلب کر لیا، سابق صدر 9 مئی کو نیب راولپنڈی میں پیش ہوں گے۔

تفصیلات کے مطابق قومی احتساب بیورو کے راولپنڈی آفس نے پانی کی فراہمی کا غیر قانونی ٹھیکہ دینے کے کیس میں آصف زرداری کو 9 مئی کو طلب کیا ہے۔

کیس میں نیب روالپنڈی نے ریفرنس دائر کر دیا، عبد الغنی مجید اور منہال مجید بھی کیس میں نامزد ہیں۔

نیب ذرایع کا کہنا ہے کہ آصف زرداری کو ہارش کمپنی کیس میں طلب کیا گیا ہے، ہارش کمپنی کو ٹھیکے پر ملنے والی رقم بھٹو ہاؤس میں استعمال ہوئی۔

یہ بھی پڑھیں:  جعلی اکاؤنٹس کیس : آصف زرداری اورفریال تالپور کو عبوری ضمانت میں 15مئی تک توسیع

ذرایع نے بتایا کہ آصف زرداری کو رقوم کی منتقلی پر جواب کے لیے طلب کیا گیا ہے۔

واضح رہے کہ 29 اپریل کو جعلی اکاﺅنٹس کیس میں اسلام آباد ہائی کورٹ نے آصف علی زر داری اور فریال تالپور کی ضمانت میں 15 مئی تک توسیع کی ہے، نیز نیب پراسیکیوٹر کو ہدایت کی گئی تھی کہ نیب تحریری طور پر آگاہ کرے کہ دونوں کے خلاف کتنی انکوائریز چل رہی ہیں۔

عدالت نے کیس کی سماعت کے دوران نیب پراسیکیوٹر سے یہ بھی کہا تھا کہ نیب کی طرف سے آصف زرداری کو کسی کیس میں گرفتار کرنے کے سلسلے میں کوئی سرپرائز نہیں دی جائے گی۔

اسلام آباد: رینٹل پاور کیس میں نیب نے کارروائی کرتے ہوئے سابق وفاقی سیکریٹری شاہد رفیع کو گرفتار کرلیا۔

تفصیلات کے مطابق نیب راولپنڈی نے رینٹل پاور کیس میں بڑی کارروائی کرتے ہوئے سابق وفاقی سیکریٹری شاہد رفیع کو گھر سے گرفتارکرلیا، چھاپے کے دوران اسکینڈل سے متعلق اہم دستاویزات بھی برآمد کرلی گئی ہیں۔

نیب ذرائع کے مطابق شاہد رفیع رینٹل پاور کیس کے 11 ریفرنس میں ملزم نامزد ہیں، سابق وزیراعظم راجہ پرویز اشرف بھی اس ریفرنس میں ملزم ہیں، نیب ٹیم کل شاہد رفیع کو احتساب عدالت میں پیش کرے گی۔

واضح رہے کہ اسکینڈل میں کنوک گلوبل کمپنی کے ڈائریکٹر لائق احمد پہلے گرفتار ہوچکے ہیں، نیب ذرائع کے مطابق کنوک گلوبل کمپنی ایک آف شور کمپنی بھی چلارہی ہے، لائق احمد سابق صدر آزاد کشمیر راجہ ذوالقرنین کے بیٹے کے فرنٹ مین ہیں۔

بابر ذوالقرنین نے آف شور کمپنی اکاؤنٹ سے لائق احمد کو رقم بھیجی، بابر ذوالقرنین نے لائق احمد کو 3 لاکھ 65 ہزار ڈالر منتقل کیے۔

یاد رہے کہ رینٹل پاور کیس میں پیپلزپارٹی کے رہنما راجہ پرویز اشرف سمیت دیگر ملزمان پر سابق وزیراعظم یوسف رضا گیلانی کے دور میں کرپشن اور عہدے کا غلط استعمال کرنے کا الزام ہے۔

راجہ پرویز اشرف نے بطور وزیر برائے پانی و بجلی کرائے کے بجلی گھروں کے منصوبوں کی منظوری دی تھی جس سے قومی خزانے کو اربوں روپے کا نقصان پہنچا تھا۔