Tag: نیب قوانین

اسلام آباد: وزیر خارجہ شاہ محمود قریشی نے کہا ہے کہ نیب ترمیمی آرڈیننس کے مسودے کو قانون سازی کے لیے پارلیمنٹ میں لایا جائے گا۔

تفصیلات کے مطابق نیب ترمیمی آرڈیننس سے متعلق وزیر خارجہ شاہ محمود قریشی نے اہم بیان جاری کرتے ہوئے کہا ہے کہ موجودہ اپوزیشن نے ماضی میں نیب قوانین میں اصلاح کے لیے ادھورا کام کیا تھا۔

انھوں نے کہا کہ یہ تاثر کہ نیب کو انتقامی کارروائی کے لیے استعمال کیا جاتا ہے درست نہیں، آرڈیننس کی معینہ مدت ہے، اس کے بعد اسے پارلیمنٹ جانا ہوتا ہے، پارلیمنٹ میں حکومت کے ساتھ اپوزیشن کا مؤقف بھی سامنے آئے گا، اپوزیشن کی قابل عمل اور مثبت تجاویز پر کھلے دل سے غور کیا جائے گا اور انھیں قبول بھی کیا جائے گا۔

وزارت قانون نے نیب ترمیمی آرڈیننس کا نوٹیفکیشن جاری کردیا

وزیر خارجہ نے کہا کہ نیب قوانین میں اصلاحات لانے کا مطالبہ بہت پرانا ہے، ن لیگ دور میں انھی قوانین کی اصلاح کے لیے خصوصی کمیٹی بنی تھی، اُس کمیٹی میں ن لیگ، پیپلز پارٹی اور دیگر جماعتیں شامل تھیں، کمیٹی نے اصلاحات پر بہت کام کیا مگر بد قسمتی سے مکمل نہ ہو سکا، عمومی تاثر یہی تھا کہ نیب قوانین میں اصلاح کی ضرورت ہے۔

شاہ محمود قریشی نے کہا کہ حکومت نے اب آرڈیننس کے ذریعے ایک پروپوزل سامنے رکھ دیا ہے، اس مسودے کو قانون سازی کے لیے پارلیمنٹ میں لایا جائے گا، معزز ممبران اس میں بہتری کے لیے تجاویز دینا چاہیں تو ضرور دیں، حکومت نیب ترمیمی آرڈیننس پر پارلیمنٹ میں اپوزیشن کی مثبت تجاویز قبول کرے گی۔

وزیر خارجہ کا کہنا تھا کہ بہت سے مقدمات میں نیب کی طرف سے جمع شہادتیں نامکمل نظر آئیں، بعض مقدمات میں استغاثہ کے دلائل کم زور دکھائی دیے، قومی خزانے کو لوٹنے والے بہت سے لوگوں کو نقایص سے فائدہ پہنچا، نیب میں بہتری لائی جا سکتی ہے، نقایص کو دور کیا جا سکتا ہے، تاہم نیب اپنی کارروائی اور تفتیش میں مکمل آزاد ہے۔

اسلام آباد: وزیر اعظم عمران خان نے نیب قوانین میں اصلاحات کا فیصلہ کیا ہے، اس سلسلے میں قانونی ٹیم کے ساتھ مشاورت مکمل کر لی گئی ہے۔

تفصیلات کے مطابق وزیر اعظم عمران خان نے احتساب کےعمل میں تبدیلی کا فیصلہ کیا ہے، نیب قوانین میں اصلاحات سے متعلق مشاورت بھی مکمل کر لی گئی ہے، ذرایع کا کہنا ہے کہ نیب قوانین میں اہم تبدیلیاں لا کر انھیں مزید بہتر بنایا جائے گا۔

ذرایع کے مطابق یہ فیصلہ گورننس کی بہتری اور کاروباری سرگرمیوں کے فروغ کے لیے کیا گیا ہے، وزیر اعظم عمران خان کی ہدایت پر قانونی ٹیم نے اس پر کام بھی شروع کر دیا ہے۔

سابق وزیر قانون بابر اعوان نے سوشل میڈیا پر اپنے بیان میں کہا ہے کہ ملک کے احتسابی نظام کے قانون میں ریفارمز لائی جا رہی ہیں، وزیر اعظم عمران خان سے اس سلسلے میں اہم ملاقات ہوئی، نیب قوانین میں قابل ذکر تبدیلیاں لاکر مزید بہتر بنایا جا رہا ہے، ان اصلاحات سے نظام حکومت میں بہتری آئے گی اور کاروباری سرگرمیوں کو فروغ ملے گا۔

خیال رہے کہ پی ٹی آئی کی حکومت نے پہلے ہی نیب قوانین میں ترامیم کا عندیہ دیا تھا، اکتوبر میں وفاقی کابینہ بھی نیب ترمیمی آرڈیننس کی منظوری دے چکی ہے۔ اس کا تعلق 5 کروڑ سے زائد کی کرپشن کرنے والے ملزم کو انکوائری، انویسٹی گیشن یا ٹرائل کے دوران بھی سی کلاس میں رکھے جانے سے تھا، سی کلاس جیل سے متعلق ترمیمی بل کے سب سیکشن 10 میں نئی شق بھی شامل کی گئی۔