Tag: نیب لاہور

لاہور: قومی احتساب بیورو (نیب) نے امریکامیں تعینات سابق پاکستانی سفیر علی جہانگیر صدیقی کے معاف یا ری اسٹرکچرڈ قرضوں کا ریکارڈ طلب کر لیا۔

ذرایع کے مطابق علی جہانگیر صدیقی نے 3 روز قبل نیب لاہور میں پیش ہو کر بیان ریکارڈ کرا دیا، نیب نے سابق پاکستانی سفیر کے قرضوں کا ریکارڈ طلب کر لیا۔

ذرایع کا کہنا ہے کہ علی جہانگیر صدیقی پر اربوں روپے کی انسائیڈر ٹریڈنگ، ایز گارڈن نائن اور ایگری ٹیک کے شئیرز کی فروخت میں بد عنوانی سمیت 40 ارب کے فراڈ کا الزام ہے۔

فواد حسن فواد کے اکاؤنٹ میں علی جہانگیر کی امریکا تعیناتی سے چند دن قبل رقم منتقل ہوئی تھی، نیب اس بات کی تحقیقات کر رہی ہے کہ فواد حسن فواد کے اکاؤنٹ میں رقم منتقل کرنے کی محرکات کیا تھیں۔

یہ بھی پڑھیں:  نیب نے علی جہانگیر صدیقی کے خلاف انکوائری کو انویسٹی گیشن میں تبدیل کردیا

ذرایع کا کہنا ہے کہ علی جہانگیر صدیقی کے معاف یا ری اسٹرکچرڈ قرضوں کا ریکارڈ طلب کر لیا گیا ہے، ان سے نیب کی جانب سے فواد حسن اور خاندان کے دیگر افراد سے کاروباری تعلقات پر سوالات کیے گئے۔

نیب ذرایع نے بتایا کہ علی جہانگیر نے ایک بار پھر اپنا مکمل جواب جمع کرانے کے لیے مہلت مانگ لی ہے۔

واضح رہے کہ علی جہانگیر صدیقی پر الزام ہے کہ انھوں نے سفیر تعینات ہونے سے قبل فواد حسن فواد کے اکاؤنٹ میں پندرہ کروڑ منتقل کیے تھے، فواد حسن فواد نیب کے زیر حراست ہیں۔

لاہور: قومی احتساب بیورو (نیب) نے لیگی رہنما حمزہ شہباز کے تمام الزامات مسترد کر دیے، ترجمان نیب نے کہا کہ حمزہ شہباز کے الزامات کی تردید اور مذمت کرتے ہیں۔

تفصیلات کے مطابق ترجمان نیب نے کہا کہ ڈی جی نیب لاہور نے اپنی ڈگری سے متعلق کبھی حمزہ شہباز سے بات نہیں کی، حمزہ شہباز کے تمام الزامات من گھڑت ہیں۔

انھوں نے کہا کہ حمزہ شہباز کے الزامات کھسیانی بلی کھمبا نوچے کے مترادف ہے، حمزہ اور فیملی ممبران کے خلاف منی لانڈرنگ کے ٹھوس ثبوت ملے ہیں، نیب پر حکومت کا کوئی دباؤ نہیں، نیب خود مختار ادارہ ہے۔

نیب کے ترجمان کا کہنا تھا کہ شریف فیملی کے اکاؤنٹس میں رقم مبینہ منی لانڈرنگ سے منتقل ہوئی، اس حوالے سے اسٹیٹ بینک نے شکایت کی تھی۔

یہ بھی پڑھیں:  حمزہ شہباز نیب پر برس پڑے، میری بہنوں اور بیمار والدہ کو بھی نوٹس بھیج دیا

دوسری طرف نیب کا حمزہ شہباز کو بھجوایا گیا نوٹس بھی منظر عام پر آ گیا ہے، نیب نے حمزہ کو آمدن سے زائد اثاثہ جات کیس میں 16 تاریخ کو طلب کر رکھا ہے۔

حمزہ شہباز سے مجموعی طور پر 8 سوالات پوچھے گئے، مراسلے میں کہا گیا کہ والدہ کی جانب سے وصول ہونے والی فارن کرنسی کا ریکارڈ پیش کریں، سالانہ بنیادوں پر کی جانے والی انویسٹمنٹ کا ریکارڈ بھی پیش کریں۔

نوٹس مراسلے میں حمزہ شہباز سے کہا گیا ہے کہ 2006 سے 2008 تک ٹیکس ریٹرن نہ جمع کرانے کا ریکارڈ پیش کریں، اور 2005 سے 2017 کے دوران اثاثوں میں کئی گنا اضافے پر بھی تفصیلات پیش کریں۔

نوٹس کے مطابق حمزہ شہباز سے نیب کی جانب سے 2005 سے اب تک ملنے والے تحائف کی تفصیلات بھی طلب کی گئی ہیں۔

لاہور: مسلم لیگ ن کے رہنما حمزہ شہباز شریف نیب پر برس پڑے، کہا کل تین گھنٹے نیب دفتر میں بیٹھ کر آیا ہوں، اب پھر بلایا جا رہا ہے۔

تفصیلات کے مطابق حمزہ شہباز نے میڈیا سے گفتگو کرتے ہوئے کہا ’کل تین گھنٹے نیب میں بیٹھ کر آیا ہوں، اب پھر بلایا جا رہا ہے، میری بہنوں اور بیمار والدہ کو بھی نوٹس بھیج دیا گیا، کیا مہذب معاشرے میں ماں بیٹیوں کو نوٹس بھیجے جاتے ہیں۔‘

حمزہ شہباز نے کہا ’نیب نے عدالت میں کہا کہ حمزہ شہباز کی گرفتاری اتنی ضروری نہیں، وہ تعاون کر رہے ہیں۔‘

لیگی رہنما کا کہنا تھا کہ ایک کال اپ نوٹس کی سیاہی خشک نہیں ہوئی اور اب ان کی بہنوں رابعہ اور جویریہ کو بھی نوٹس بھیج دیا گیا ہے، شہباز شریف کو صاف پانی کیس میں بلایا گیا اور گرفتار آشیانہ اسکینڈل میں کیا گیا، کہتے تھے شہباز شریف کرپٹ ہیں، کہاں گئیں وہ 56 کمپنیاں، ان کے خلاف کچھ بھی ثابت نہیں ہوا، اثاثوں سے زائد آمدن کا کیس پرانا ہے، اچانک اتنی تیزی کیوں آئی۔

یہ بھی پڑھیں:  اثاثہ جات کیس : نیب نے شہباز شریف کے پورے خاندان کو بیان کیلئے طلب کر لیا

حمزہ شہباز نے کہا ’ڈی جی نیب لاہور نے کہا آپ نے ضمانت کی درخواست کیوں دی، ہم تو آپ کو گرفتار نہیں کرنا چاہتے، آپ حکومت سیٹلمنٹ کرلیں، آپ کو بار بار بلانا اچھا نہیں لگتا، حکومت سے ڈیل کیوں نہیں کر لیتے۔‘

انھوں نے کہا کہ مجھ پر85 ارب کی کرپشن کا الزام لگایا گیا، میں نےایک ایک پائی کا حساب دیا، سب کچھ ڈکلیئر کیا، نواز شریف کی بیماری کا مذاق اڑایا جاتا ہے، عدالتوں سے گزارش ہے کہ مجھے اور نیب کو ایک ساتھ بلائیں، ہمارے ساتھ بد سلوکی ہو رہی ہے۔

واضح رہے کہ نیب اہل کار نوٹس وصولی کے لیے شہباز شریف کی بیٹی کے گھر گئے، جس پر نون لیگ کی رہنما مریم اورنگزیب نے غلط بیانی کرتے ہوئے میڈیا کو گمراہ کیا، انھوں نے کہا کہ شہباز شریف کی بیٹی کے گھر پر چھاپا مارا گیا اور پولیس نے محاصرہ کر لیا ہے، جب کہ حقیقت اس کے برعکس نکلی۔