ARYNews.tv | Urdu – Har Lamha Bakhabar

Tag: نیتن یاہو

  • نیتن یاہو کی حماس کو آخری مہلت، غزہ میں 62 فلسطینی شہید

    نیتن یاہو کی حماس کو آخری مہلت، غزہ میں 62 فلسطینی شہید

    اسرائیلی وزیراعظم نیتن یاہو نے حماس کو زیر حراست اسرائیلیوں کی واپسی کے لیے امریکی تعاون سے ایک ”آخری مہلت” دینے کا فیصلہ کیا ہے۔ اس دوران اسرائیلی فوج نے مزید 62 فلسطینیوں کو شہید کردیا ہے۔

    عرب خبر رساں ادارے کی رپورٹ کے مطابق نیتن یاہو کی سربراہی میں اسرائیلی کابینہ آج اہم اجلاس کرے گی جس میں غزہ سے متعلق آئندہ اقدامات پر فیصلے ہونے کی توقع ہے۔

    اسرائیلی نشریاتی ادارے نے سکیورٹی حکام کے حوالے سے بتایا ہے کہ قیدیوں کے تبادلے کی کسی بھی ممکنہ ڈیل کے امکانات کے بارے میں سکیورٹی اداروں میں شدید مایوسی ہے۔

    رپورٹس کے مطابق اسرائیلی فوج کے سربراہ ایال زامیر نے حماس کو خبردار کیا ہے کہ جب تک اسرائیلی قیدیوں کو رہا نہیں کیا جاتا، غزہ میں جنگ بغیر کسی وقفے کے جاری رہے گی۔

    غزہ میں طبی ذرائع کا کہنا ہے کہ گذشتہ 24 گھنٹوں کے دوران اسرائیلی فضائی حملوں میں غزہ کی پٹی میں 62 فلسطینی شہید ہوچکے ہیں۔

    طبی ذرائع کے مطابق امداد کے منتظر آٹھ فلسطینی زکیم کے علاقے میں اسرائیلی فائرنگ کا نشانہ بنے، جنہیں بعد ازاں ہسپتال الشفاء منتقل کردیا گیا ہے۔

    اسرائیل نے امدادی ٹرکوں کو غزہ میں داخلے سے روک دیا

    رپورٹس کے مطابق اسرائیلی فوج نے خان یونس شہر میں رہائشی عمارتوں کو بارودی روبوٹز کے ذریعے تباہ کیا، جس کے نتیجے میں شدید دھماکے ہوئے۔

  • شام پر بمباری، ٹرمپ انتظامیہ نے نیتن یاہو کو ’پاگل آدمی‘ قرار دیدا

    شام پر بمباری، ٹرمپ انتظامیہ نے نیتن یاہو کو ’پاگل آدمی‘ قرار دیدا

    واشنگٹن(21 جولائی 2025): امریکا نے شام پر اسرائیل کی جانب سے کیے جانے والے بمباری کے بعد اسرائیلی وزیراعظم نیتن یاہو پر غصے کا اظہار کیا ہے۔

    امریکی میڈیا کے مطابق وائٹ ہاؤس کے سینئر عہدیداروں نے اس ہفتے شام پر اسرائیلی فضائی حملوں کے بعد خطے میں اسرائیلی وزیراعظم بنیامین نیتن یاہو کی "حرکات” پر اپنی بڑھتی ہوئی تشویش کا اظہار کیا ہے۔

    وائٹ ہاؤس کی جانب سے شام پر ان حملوں سے واشنگٹن اور تل ابیب کے درمیان کشیدگی میں اضافہ ہوا ہے، اتوار کو امریکی صدر ڈونلڈ ٹرمپ کی انتظامیہ کے متعدد عہدیداروں نے نیتن یاہو کو پاگل قرار دیا ہے۔

    امریکی عہدیدار کے مطابق امریکی صدر ٹیلی ویژن پر کسی ایسے ملک میں بم گرتے دیکھنا پسند نہیں کرتے جہاں وہ امن کی تلاش میں ہیں، انہوں نے شام میں تعمیر نو میں مدد کے لیے ایک اہم اعلان جاری کیا ہے۔ بات اس حد تک پہنچ گئی ہے کہ وزیر خارجہ مارکو روبیو نے بدھ کو نیتن یاہو اور ان کی ٹیم کو وارننگ دی ہے کہ انہیں اس حملے سے باز رہنا چاہیے۔

    وائٹ ہاؤس کے متعدد ذرائع، جن میں 6 امریکی عہدیدار شامل ہیں، نے ایکسیوس ویب سائٹ سے بات کی اور کہا کہ شام میں امریکا کی ثالثی میں ہونے والی جنگ بندی کے باوجود نیتن یاہو کی علاقائی پالیسیوں پر امریکا کی تشویش بڑھ رہی ہے۔ ایک عہدیدار نے نیتن یاہو کے طرز عمل کو ہر وقت ہر چیز پر بمباری کرنا قرار دیا۔

    وائٹ ہاؤس کے ایک اور اہلکار نے کہا کہ ہر روز کوئی نہ کوئی نیا ہنگامہ ہو جاتا ہے، وائٹ ہاؤس اس ‘ڈیلی ڈرامے’ سے تنگ آچکا ہے۔،غزہ میں ایک چرچ پر اسرائیلی بمباری کے بعد صدر ٹرمپ نے خود نیتن یاہو کو فون کر کے وضاحت طلب کی تھی، وائٹ ہاؤس کے ایک سینئر اہلکار نے نیتن یاہو کا موازنہ ایک ایسے بچے سے کیا جو کسی کی بات نہیں سنتا ہے اور اپنی من مانی کرتا ہے۔

  • مدرسے کے طلبہ کی فوج میں بھرتی پر یہودی مذہبی جماعت نے نیتن یاہو حکومت چھوڑ دی

    مدرسے کے طلبہ کی فوج میں بھرتی پر یہودی مذہبی جماعت نے نیتن یاہو حکومت چھوڑ دی

    یروشلم: اسرائیلی وزیرا عطم نیتن یاہو کی حکومت کو بڑا دھچکا لگا ہے، مدرسے کے طلبہ کی فوج میں بھرتی کے معاملے پر اہم یہودی مذہبی جماعت نے نیتن یاہو حکومت چھوڑ دی۔

    روئٹرز کے مطابق اسرائیل کی الٹرا آرتھوڈوکس پارٹیوں میں سے ایک ’یونائیٹڈ تورات یہودیت‘ نے ایک بیان میں کہا ہے کہ وہ وزیر اعظم بنجمن نیتن یاہو کے حکمراں اتحاد کو چھوڑ رہی ہے، کیوں کہ وہ مدرسے کے طلبہ کو فوجی خدمات سے مستثنیٰ کرنے کے بل کا مسودہ تیار میں ناکام رہی ہے۔

    مذہبی جماعت ’یو ٹی جے‘ کے بقیہ 7 ارکان میں سے 6 نے وزیر اعظم کو خطوط لکھ کر استعفیٰ دے دیا ہے، جب کہ یو ٹی جے کے چیئرمین نے ایک ماہ قبل ہی استعفیٰ دے دیا تھا، یہ مذہبی جماعت دو اہم دھڑوں دجل ہاتورۃ اور اگودات یسرائیل پر مشتمل ہے۔

    یو ٹی جے کے استعفے کے بعد اب نیتن یاہو کی اکثریت 120 نشستوں کی کنیسے یا پارلیمنٹ میں 61 نشستوں والی ایک کمزور اکثریت میں بدل جائے گی۔ یہ واضح نہیں ہوا ہے کہ آیا ایک اور مذہبی پارٹی شاس بھی استعفے دے گی یا نہیں۔

    غزہ میں 60 روزہ ممکنہ جنگ بندی کے بعد کیا ہوگا؟

    یو ٹی جے کے دھڑے دجل ہاتورۃ نے ایک بیان میں واضح کیا کہ انھوں نے اپنے سربراہ ربیوں کے ساتھ بات چیت کے بعد مستعفی ہونے کا فیصلہ کیا ہے، کیوں کہ حکومت نے اپنے وعدوں کی بار بار خلاف ورزی کی، اور پوری تندہی سے اپنی تعلیم میں مصروف مقدس یشوا طلبہ کی ’حیثیت‘ کو استثنیٰ فراہم نہیں کیا۔

    مذہبی یہودی جماعتوں کا استدلال ہے کہ 2022 کے آخر میں وہ حکومتی اتحاد میں اس شرط پر شامل ہوئے تھے کہ یشوا طلبہ کو مستثنیٰ کرنے کا بل پیش کیا جائے گا۔ تاہم حکومت نے تاحال اس میں کوئی پیش رفت نہیں کی ہے، اور مذہبی جماعت کے قانون ساز طویل عرصے سے بھرتی بل پر اتحاد چھوڑنے کی دھمکی دیتے آ رہے ہیں۔

  • غزہ میں 60 روزہ ممکنہ جنگ بندی کے بعد کیا ہوگا؟

    غزہ میں 60 روزہ ممکنہ جنگ بندی کے بعد کیا ہوگا؟

    تل ابیب: اسرائیل کے وزیر اعظم نیتن یاہو نے غزہ میں 60 روزہ ممکنہ جنگ بندی کے بعد کا منصوبہ وزیر خزانہ بزلیل سموٹریچ کے سامنے پیش کر دیا۔

    اسرائیلی میڈیا رپورٹس کے مطابق نیتن یاہو نے وزیر خزانہ بزلیل سموٹریچ کو یقین دہانی کرائی ہے کہ اگر 60 دن کی مجوزہ جنگ بندی پر اتفاق ہو جاتا ہے، تو اس کے خاتمے کے فوراً بعد تل ابیب دوبارہ غزہ پر بھرپور حملہ کر دے گا۔

    اسرائیل کے عبرانی چینل 12 کے مطابق نیتن یاہو نے سموٹریچ کو بتایا کہ ’’جنگ بندی کے بعد ہم غزہ کے شہریوں کو جنوب کی طرف منتقل کر دیں گے اور شمالی غزہ کا محاصرہ کر لیں گے۔‘‘

    ذرائع کے مطابق اس سلسلے میں ہونے والے بند کمرہ اجلاسوں میں نیتن یاہو نے ایک منصوبہ بھی پیش کیا، جس کے تحت اسرائیل غزہ کے عام شہریوں کو حماس سے علیحدہ کر کے انھیں جنوبی غزہ کی ایک پٹی میں محدود کر دے گا، تاکہ عارضی جنگ بندی کے بعد لڑائی جاری رکھنے کا جواز پیدا ہو۔

    اسرائیلی فوج کا پانی کی لائن میں کھڑے فلسطینی بچوں پر میزائل حملہ، 10 شہید

    دراصل، اسرائیلی وزیر خزانہ سموٹریچ نے وزیر اعظم سے مطالبہ کیا تھا کہ وہ جنگ بندی کے بعد غزہ پر ’’مکمل طاقت‘‘ کے ساتھ دوبارہ حملہ کرنے کی گارنٹی دیں۔ نیتن یاہو نے معذرت خواہانہ طور پر کہا کہ وہ ایران کے مسئلے میں مصروف تھے، اس لیے گزشتہ ماہ وہ وزیر خزانہ کی توقعات کے مطابق حماس کو نقصان نہیں پہنچا سکے تھے، تاہم اب وہ اپنے وعدے پر قائم رہیں گے۔

    دریں اثنا، اتوار کے روز نیتن یاہو نے پروپیگنڈے کے تحت میڈیا کو بتایا کہ انھوں نے جنگ بندی ڈیل کو قبول کر لیا ہے لیکن حماس نے اس سے انکار کر دیا، وہ غزہ میں اپنے وجود کو برقرار رکھتے ہوئے دوبارہ ہتھیار حاصل کرنا چاہتی ہے، ہم حماس کو مکمل طور پر ختم کرنے کے وعدے پر قائم رہیں گے۔

    دوسری طرف فلسطینی حکومتی میڈیا مرکز کے ڈائریکٹر محمد ابو الرب نے العربیہ کو بتایا کہ اسرائیل کی جانب سے دی جانے والی تجاویز کا اصل مقصد جنگ کو طول دینا ہے۔ امریکی صدر ڈونلڈ ٹرمپ نے کہا ہے کہ انھیں امید ہے کہ اسرائیل اور حماس کے درمیان جنگ بندی کی کوششیں رواں ہفتے کے دوران کسی حتمی نتیجے پر پہنچ جائیں گی۔

  • باپ نے بیٹوں کیساتھ ملکر مبینہ طور پر بیٹی کو قتل کردیا

    باپ نے بیٹوں کیساتھ ملکر مبینہ طور پر بیٹی کو قتل کردیا

    قصور : پنجاب کے ضلع میں ایک افسوسناک واقعہ پیش آیا جہاں باپ نے بیٹوں کیساتھ ملکر مبینہ طور پر بیٹی کو قتل کردیا۔

    تفصیلات کے مطابق پنجاب کے ضلع  قصور کے علی گڑھ میں باپ نے بیٹوں کیساتھ ملکر مبینہ طور پر بیٹی کو قتل کردیا، پولیس نے واقعے کا مقدمہ درج کرلیا۔

    تھانہ بی ڈویژن نے مقتولہ کے خاوند کی درخواست پر مقدمہ درج  کرلیا، مقدمے میں مقتولہ کے باپ، بھائیوں سمیت 4 افراد کو نامزد کیا گیا ہے۔

    پولیس کا کہنا ہے کہ پوسٹ مارٹم رپورٹ کے مطابق خاتون کی موت زہر دینے سے ہوئی ہے، شوہر نے پولیس کو بتایا کہ بیوی کاباپ خلع دلا کر کسی اور سے شادی کرنا چاہتا تھا۔

    https://urdu.arynews.tv/naushahro-feroze-tragic-incident/

    دوسری جانب اٹک کے حضرو میں گلی میں کھیلنے والے لڑکے کو پڑوسی نے قتل کردیا جس کا مقدمہ بھی درج کرلیا گیا ہے، پولیس کا کہنا ہے کہ گلی میں کھیلنے سے منع کرنے پر جھگڑا ہوا تھا۔

    پولیس کا اس واقعے کے حوالے سے مزید کہنا تھا کہ ملزم کو گرفتار کرلیا گیا ہے، پڑوسی نے 15 سالہ ابوبکر کے سر پر ڈنڈے کے وار کیے تھے۔

  • کوئی افزودگی نہ بیلسٹک میزائل، ایران کے ساتھ ایسے معاہدے کی حمایت کریں گے، نیتن یاہو

    کوئی افزودگی نہ بیلسٹک میزائل، ایران کے ساتھ ایسے معاہدے کی حمایت کریں گے، نیتن یاہو

    تل ابیب: اسرائیل کے وزیر اعظم نیتن یاہو نے کہا ہے کہ ایران کے ساتھ ایسے معاہدے کی حمایت کریں گے جس میں کوئی افزودگی ہوگی نہ کوئی بیلسٹک میزائل۔

    فاکس نیوز کو انٹرویو دیتے ہوئے اسرائیلی وزیر اعظم نیتن یاہو نے کہا کہ اگراسرائیل اور امریکا حملہ نہیں کرتے تو ایران ایک سال میں جوہری ہتھیار بنا لیتا۔

    انھوں نے کہا اسرائیل کے ساتھ جنگ کے بعد ایرانی حکومت مشکل میں ہے، ایران کے ساتھ ایسے غیر معمولی معاہدے کی حمایت کریں گے جس کے مطابق کوئی افزودگی نہیں ہوگی نہ ہی کوئی بیلسٹک میزائل ہوگا۔

    انھوں نے مزید کہا کہ صدر ڈونلڈ ٹرمپ کی قیادت میں ایک مختلف امریکا ہے، جو آزاد ہے، وائٹ ہاؤس میں ٹرمپ جیسا دوست اسرائیل کا کبھی نہیں تھا، اگر کوئی امن کے نوبل انعام کا مستحق ہے تو وہ صدر ٹرمپ ہیں۔

    نیتن یاہو نے اقتدار بچانے کیلئےغزہ جنگ کو طول دیا، نیویارک ٹائمز کا انکشاف

    واضح رہے کہ غزہ جنگ کی طوالت کا راز فاش ہو گیا ہے، نیتن یاہو کی سیاسی چالیں بے نقاب ہو گئی ہیں، اقتدار کی سیاست یا قومی مفاد؟ امریکی اخبار نیویارک ٹائمز نیتن یاہو کے فیصلوں کا احوال سامنے لے آیا، نیویارک ٹائمز نے رپورٹ جاری کی ہے جس میں 110 سے زائد اہلکاروں کے انٹرویوز شامل ہیں۔

    اس رپورٹ میں خفیہ دستاویزات اور جنگی منصوبے کی تفصیلات بھی شامل ہیں، خفیہ ریکارڈز اور انٹیلی جنس رپورٹس نے نیتن یاہو کی سیاسی حکمت عملی کو بے نقاب کیا، کہ اسرائیلی وزیر اعظم نیتن یاہو نے اقتدار بچانے کے لیےغزہ جنگ کو طول دیا۔

  • نیتن یاہو نے اقتدار بچانے کیلئےغزہ جنگ کو طول دیا، نیویارک ٹائمز کا انکشاف

    نیتن یاہو نے اقتدار بچانے کیلئےغزہ جنگ کو طول دیا، نیویارک ٹائمز کا انکشاف

    امریکی اخبار نیویارک ٹائمز کی جانب سے انکشاف سامنے آیا ہے کہ اسرائیلی وزیراعظم نیتن یاہو نے اقتدار بچانے کیلئےغزہ جنگ کو طول دیا۔

    غزہ جنگ کی طوالت کا رازفاش ہوگیا، نیتن یاہو کی سیاسی چالیں بےنقاب ہوگئیں، اقتدار کی سیاست یا قومی مفاد؟ امریکی اخبار نیویارک ٹائمز نیتن یاہو کے فیصلوں کا احوال سامنے لےآیا، نیویارک ٹائمز نے رپورٹ جاری کردی ہے جس میں 110 سے زائد اہلکاروں کے انٹرویوز شامل ہیں۔

    رپورٹ میں خفیہ دستاویزات اور جنگی منصوبے کی تفصیلات بھی شامل ہیں، خفیہ ریکارڈز اور انٹیلی جنس رپورٹس نے نیتن یاہو کی سیاسی حکمت عملی کو بےنقاب کیا۔

    نیتن یاہو نے فلسطینی ریاست کی توثیق سے انکار کر دیا

    نیویارک ٹائمز نے سوال اٹھایا کہ اسرائیلی وزیراعظم نیتن یاہو کی میٹنگز اور عالمی رہنماؤں سے گفتگو نے جنگ کو کیوں بڑھایا؟

    اس چیز کا جواب دیتے ہوئے نیویارک ٹائمز کی رپورٹ میں بتایا گیا کہ نیتن یاہو کی حکمت عملی تھی کہ جنگ جاری رکھو اور اقتدار کو بچاؤ، غزہ میں جنگ طول پکڑتی رہی، نیتن یاہو اقتدار بچانے میں مصروف رہے۔

    نیویارک ٹائمز کی رپورٹ میں دعویٰ کیا گیا کہ نیتن یاہو کے فیصلے جنگی حکمت عملی سے زیادہ سیاسی چالیں تھیں، نیتن یاہو نے عالمی دباؤ کے باوجود جنگ ختم نہ ہونے دی۔

    جنگ رک جاتی تو سعودی عرب کے ساتھ اسرائیل کا تاریخی معاہدہ ممکن تھا، نیتن یاہو نے سیاسی مفاد کےلیے امن کا موقع ضائع کردیا، سعودی قیادت نے خفیہ طور پر امن کی پیشکش کی مگر غزہ کی جنگ رکاوٹ بنی۔

    نیویارک ٹائمز نے بتایا کہ امن کا سنہری موقع تھا مگر نیتن یاہو کی سیاسی چالوں نے مٹی میں ملادیا، غزہ جنگ جاری رکھ کر نیتن یاہو نے اسرائیل کے بجائے سیاسی بقا کو ترجیح دی۔

    https://urdu.arynews.tv/netanyahu-israel-60-days-deal-end-gaza-war/

  • غزہ میں جنگ بندی کب ہوگی؟ نیتن یاہو کا اہم بیان

    غزہ میں جنگ بندی کب ہوگی؟ نیتن یاہو کا اہم بیان

    اسرائیلی وزیرِاعظم نیتن یاہو نے کہا ہے کہ غزہ میں مجوزہ 60 روزہ جنگ بندی کے دوران مستقل جنگ بندی کیلیے بات چیت کریں گے۔

    بین الاقوامی خبر رساں ادارے کی رپورٹ کے مطابق اسرائیلی وزیرِاعظم نیتن یاہو کا کہنا تھا کہ مجوزہ 60 روزہ جنگ بندی شروع ہو گی تو مستقل جنگ ختم کرنے کے لیے بات چیت کریں گے۔

    رپورٹس کے مطابق اُنہوں نے کہا کہ حماس کی طرف سے ہتھیار ڈالنا اسرائیل کی بنیادی شرائط میں سے ہے، حماس کے پاس غزہ کی حکمرانی اور فوجی صلاحیتیں نہ ہونا بھی اسرائیل کی شرائط میں شامل ہے۔

    اسرائیلی وزیرِاعظم کا کہنا تھا کہ یہ شرائط 60 روز میں پوری ہو گئیں تو بہت اچھا ورنہ فوجی طاقت سے انہیں پورا کیا جائے گا۔

    غیر ملکی خبر ایجنسی کے مطابق مجوزہ 60 روزہ جنگ بندی کے لیے قطر میں اسرائیل حماس بلواسطہ مذاکرات اتوار سے جاری ہیں۔

    دوسری جانب اسرائیل کے وزیر اعظم نے امریکی صدر ڈونلڈ ٹرمپ کو امن کے نوبل انعام کے لیے نامزد کر دیا ہے۔

    تفصیلات کے مطابق اسرائیلی وزیر اعظم نے پیر کو صدر ٹرمپ سے عشائیے پر ملاقات کے دوران انکشاف کیا کہ انھوں نے انھیں امن کے نوبل انعام کے لیے نامزد کیا ہے۔

    نیتن یاہو نے وائٹ ہاؤس میں عشائیے کے دوران کہا کہ انھوں نے صدر ٹرمپ کو نوبل انعام کمیٹی کو بھیجے گئے نامزدگی خط کی ایک نقل پیش کی ہے، انھوں نے کہا ٹرمپ اس نامزدگی کے پوری طرح حق دار ہیں کیوں کہ انھوں نے معاہدہ ابراہیم طے کیا، اور وہ ہماری آنکھوں کے سامنے ایک کے بعد دوسرے ملک اور خطے میں امن قائم کر رہے ہیں۔

    فرانس اور برطانیہ کو مل کر فلسطینی ریاست تسلیم کرنی چاہیے، صدر میکرون

    امریکی صدر ٹرمپ نے خط وصول کرتے ہوئے خوشی کا اظہار کیا اور کہا کہ انھیں نامزدگی کی بات معلوم نہیں تھی، انھوں نے کہا ”آپ کا بہت شکریہ، اس کا خاص طور پر آپ کی طرف سے آنا میرے لیے بہت معنی رکھتا ہے۔“

  • ایران جوہری پروگرام جاری رکھنے سے خوفزدہ ہے، نیتن یاہو کا دعویٰ

    ایران جوہری پروگرام جاری رکھنے سے خوفزدہ ہے، نیتن یاہو کا دعویٰ

    اسرائیلی وزیر اعظم نیتن یاہو کا کہنا ہے کہ ایران جوہری پروگرام جاری رکھنے سے ‘خوفزدہ’ ہے، اسرائیل جانتا ہے کہ ایران نے انتہائی افزودہ یورینیم کہاں زیر زمین دفن کیا ہے۔

    اسرائیلی وزیر اعظم نیتن یاہو نے امریکی ٹی وی کو انٹرویو دیتے ہوئے دعویٰ کیا کہ ایرانی سمجھتے ہیں کہ جو کچھ امریکا اور اسرائیل نے ایک بار کیا، وہ دو تین بار بھی کر سکتے ہیں۔

    رپورٹس کے مطابق اسرائیلی وزیر اعظم نے غزہ میں 60 روزہ جنگ بندی معاہدہ جلد ہونے کا امکان بھی ظاہر کردیا۔

    اس سے قبل وائٹ ہاوس میں عشائیہ پر اسرائیلی وزیراعظم نیتن یاہو اور امریکی صدر ڈونلڈ ٹرمپ سے نیویارک کیلئے نامزد مئیر ظہران ممدانی سے متعلق سوال کیا گیا تھا۔

    صحافی نے پوچھا ممدانی نے کہا ہے کہ اگر آپ نیویارک آئے تو گرفتار کر لئے جائیں گے، اسرائیلی وزیر اعظم نیتن یاہو نے ڈیموکریٹک میئر کے نامزد امیدوار ظہران ممدانی کی جانب سے گرفتاری کی دھمکی کو ”احمقانہ”قرار دیتے ہوئے مسترد کر دیا۔

    اسرائیلی وزیراعظم نے کہا کہ مجھے اس کی کوئی پرواہ نہیں، صدر ٹرمپ فوری بولے میں ان کو باہر نکال لوں گا، نیتن یاہو نے کہا میں نیویارک صدرٹرمپ کیساتھ جاؤں گا پھر دیکھتے ہیں کیا ہوتا ہے۔

    صدر ٹرمپ بولے ظہران ممدانی ایک کمیونسٹ ہیں اور وہ یہودیوں کیلئے بری باتیں کرتے ہیں لیکن ابھی کوئی نہیں جانتا نیویارک کا مئیر کون ہوگا۔

    امریکی صدر کی برازیل کو دھمکی

    واضح رہے ممدانی نے اپنی انتخابی مہم کے دوران ہندوستانی وزیراعظم نریندر مودی اور اسرائیلی وزیراعظم نیتن یاہو کے خلاف سخت مؤقف اختیار کیا تھا۔

  • ظہران ممدانی کی جانب سے گرفتاری کی دھمکی پر نیتن یاہو کا ردعمل آگیا

    ظہران ممدانی کی جانب سے گرفتاری کی دھمکی پر نیتن یاہو کا ردعمل آگیا

    اسرائیلی وزیراعظم نیتن یاہو اور امریکی صدر ٹرمپ سے نیویارک کے نامزد مئیر ظہران ممدانی سے متعلق سوال کیا گیا۔

    غیر ملکی میڈیا رپورٹ کے مطابق وائٹ ہاوس میں عشائیہ پر اسرائیلی وزیراعظم نیتن یاہو اور امریکی صدر ڈونلڈ ٹرمپ سے نیویارک کیلئے نامزد مئیر ظہران ممدانی سے متعلق سوال کیا گیا۔

    صحافی نے پوچھا ممدانی نے کہا اگر آپ نیویارک آئے تو گرفتار کر لئے جائیں گے، اسرائیلی وزیر اعظم نیتن یاہو نے ڈیموکریٹک میئر کے نامزد امیدوار ظہران ممدانی کی جانب سے گرفتاری کی دھمکی کو "احمقانہ” قرار دیتے ہوئے مسترد کر دیا۔

    اسرائیلی وزیراعظم نے کہا کہ مجھے اس کی کوئی پرواہ نہیں، صدر ٹرمپ فوری بولے میں ان کو باہر نکال لوں گا، نیتن یاہو نے کہا میں نیویارک صدرٹرمپ کیساتھ جاوں گا پھر دیکھتے ہیں کیا ہوتا ہے۔

    صدر ٹرمپ بولے ظہران ممدانی ایک کمیونسٹ ہیں اور وہ یہودیوں کیلئے بری باتیں کرتے ہیں لیکن ابھی کوئی نہیں جانتا نیویارک کا مئیر کون ہوگا۔

    واضح رہے ممدانی نے اپنی انتخابی مہم کے دوران ہندوستانی وزیراعظم نریندر مودی اور اسرائیلی وزیراعظم نیتن یاہو کے خلاف سخت مؤقف اختیار کیا تھا۔

    انہوں نے ایک انٹرویو میں کہا تھا کہ اگر نیتین یاہو آئے تو انہیں گرفتار کیا جائے گا، اس شہر میں ہماری اقدار بین الاقوامی قوانین کی پاسداری کرتی ہیں اور اب وقت ہے کہ ہمارا عمل بھی ایسا ہی ہو۔