اسلام آباد: وفاقی حکومت نے قومی صنعتی تعلقات کمیشن (این آئی آر سی) کے 8 ارکان کی تقرری کا نوٹیفکیشن جاری کر دیا۔
تفصیلات کے مطابق وزارت اطلاعات نے وفاقی کابینہ کی منظوری کے بعد قومی صنعتی تعلقات کمیشن کے 8 ارکان کی تقرری کا باضابطہ نوٹیفکیشن جاری کر دیا۔
ارکان میں ریٹائرڈ سول سرونٹ سید نور الحسنین، ریٹائرڈ ڈسٹرکٹ اینڈ سیشن جج عبدالقیوم، سہیل اکرم، محمد زبیر، وکلا محمد سراج الاسلام خان، عبدالغنی اور منور حسین طوری شامل ہیں۔
کابینہ نے وزارت اطلاعات کی سمری پر خالی عہدوں پر تقرریوں کی منظوری دی تھی، قومی صنعتی تعلقات کمیشن کے یہ عہدے گزشتہ 9 ماہ سے خالی تھے۔
قومی صنعتی تعلقات کمیشن وزارت اطلاعات سے ملحقہ ادارہ ہے، جس کا قیام صنعتی تعلقات کمیشن ایکٹ 2012 کی شق 53 کے تحت عمل میں لایا گیا تھا۔ صنعتی تعلقات کمیشن کی ذمہ داری صنعتی تنازعات نمٹانا، تجارتی تنظیموں کا اندراج، بارگنگ ایجنٹوں کی وصولی کا تعین، محنت کشوں سے غیر منصفانہ سلوک کا خاتمہ اور ایک دوسرے کے صوبوں کی اسٹیبلشمنٹس اور اسلام آباد میں انفرادی تحفظات کا ازالہ کرنا ہے۔