کراچی : صوبائی وزیراطلاعات سندھ مولا بخش چانڈیو نے کہا ہے کہ اپیکس کمیٹی کے اجلاس میں کور کمانڈر، ڈی جی رینجرز سمیت تمام اداروں نے سندھ کی کارکردگی پر اطمینان کا اظہار کیا ہے.

صوبائی وزیر اطلاعت مولا بخش چانڈیو نے یہ بات اپیکس میٹنگ کے اختتام کے بعد میڈیا سے بات کرتے ہوئے کہی، انہوں نے وفاقی حکومت کے عدم تعاون کی شکایت کا ذکر کرتے ہوئے کہا کہ وفاق نے مدارس سمیت غیرقانونی اسلحہ کے حوالے سے بھی اپنی ذمہ داریاں پوری نہیں کیں۔

وزیراطلاعات سندھ نے کہا کہ وفاق نیشنل ایکشن پلان پر صحیح طور پر عمل پیرا نہیں ہے اگر سندھ میں اسلحہ پکڑا جاتا ہے تو یہ کوئی حل نہیں ہے سندھ میں اسلحہ نہیں بنتا بلکہ دیگر صوبوں سے آتا ہے جس کے روک تھام کی ذمہ داری وفاق پر ہے.

انہوں نے کہا کہ مدارس کا معاملہ ہو یا فرقہ ورانہ تنظیموں کی سرگرمیوں پر پابندی کا معاملہ ہو وفاق حکومت کی کارکردگی صفر نظر آتی ہے، وفاقی حکومت کے پاس کرنے اوردکھانے کو کچھ نہیں رہا تو سندھ کے معاملے میں ٹانگ اڑاتے ہیں، آئی جی سندھ اجلاس میں شریک تھے اور سندھ حکومت کی کارکردگی پر خوش بھی تھے.

مولا بخش چانڈیو کا کہنا تھا کہ اداروں کے درمیان لڑائی کروانے کی کوشش کی گئی لیکن اداروں کے درمیان تعلقات بہتر ہونے کے نتائج سامنے آئے ہیں، نئے کور کمانڈر بہت نرم مزاج آدمی ہیں جب کہ نئے ڈی جی رینجرز بھی بہت اچھے ہیں اور دونوں نے سندھ حکومت کے اقدامات پراطمینان کا اظہار کیا ہے۔

ایک سوال کے جواب میں مولا بخش چانڈیو کا کہنا تھا کہ اسٹریٹ کرائم اہم مسئلہ ہے کیونکہ ہم اوپر کچھ بھی کریں لیکن اگر گلیوں میں عوام محفوظ نہیں تو کوئی فائدہ نہیں ہوگا، یہ اہم معاملہ ہے لہذا وزیراعلیٰ نے اسٹریٹ کرائم ختم کرنے کی ہدایت کی ہے۔

کراچی : گورنر سندھ ڈاکٹر عشرت العبادخان نے کہا ہے کہ قومی سلامتی ہر چیز پر مقدم ہے کیوں کہ ملک ہے تو ہم سب ہیں یہی وجہ ہے کہ ضرب عضب کو پوری قوم کی مکمل اور غیر متزلزل حمایت حاصل ہے اور وہ دہشت گردی کے خلاف جنگ میں اپنی مسلح افواج کے ساتھ ہے۔

ان خیالات کا اظہار انہوں نے نیشنل سیکیورٹی وار کورس کے شرکاء کے 111 رکنی وفد سے گورنر ہاؤس میں ملاقات کے دوران کیا، گورنر سندھ نے کہا کہ دہشت گردی ملکی سلامتی کے لئے سب سے بڑا خطرہ ہے جس کے خاتمہ کے لئے ضرب عضب کا آغاز کیا گیا جس کے حوصلہ افزاء نتائج ہم سب کے سامنے ہیں۔

انہوں نے کہا کہ دہشت گردی کے واقعات میں نمایاں کمی واقع ہوئی ہے جس کے لئے پاکستان کی مسلح افواج نے بے مثال قربانیاں دی ہیں،پاکستان دہشت گردی کے خلاف جنگ میں عالمی برادری کے ساتھ ہے اور ہم نے اس جنگ میں ہمیشہ ہر اول دستہ کا کردار ادا کیا ہے جس کی معترف پوری دنیا ہے۔

گورنر سندھ نے دوران گفتگو سند میں امن و امان کی بحالی کا ذکر کرتے ہوئےکہا کہ 3 سال قبل امن و امان کی صورتحال ابتری کی جانب گامزن تھی یہی وجہ تھی کہ نیشنل ایکشن پلان کے تحت آپریشن کا آغاز کیا گیا اور قانون نافذ کرنے والے اداروں، رینجرز اور پولیس کی قربانیوں کے باعث کراچی دوبارہ روشنیوں کا شہر بن چکا ہے۔

انہوں نے کہا کہ کراچی ملک کا معاشی حب ہے اور یہاں ہونے والی کوئی بھی اقتصادی سرگرمی پورے ملک پر اثر انداز ہوتی ہے اور اب کراچی میں غیر ملکی سرمایہ کار بھی مختلف شعبوں میں موجود مواقعوں سے بھرپور استفادہ کر رہے ہیں۔

آپریشن کے نتیجہ میں قائم ہونے والے امن کو پائیدار بنانے کے بارے میں پوچھے جانے والے سوال پر گورنر سندھ نے کہا کہ دہشت گردوں اور مجرمان کے سہولت کاروں کے خلاف کاروائی کی جارہی ہے جبکہ پولیس کے معیار کو بہتر بنانے پر بھی خصوصی توجہ دی جارہی ہے کیونکہ امن و امان کو دیرپا بنانے میں اس کا کردار نہایت اہمیت کا حامل ہے۔

انہوں نے مزید کہا کہ اس ضمن میں پولیس میں بھرتی کے لئے میرٹ پر سختی سے عملدرآمد کیا جا رہا ہے جبکہ اس کی صلاحیتوں میں اضافے کے لئے آرمی سے تربیت بھی دلوائی جارہی ہے۔

گورنر سندھ نے کہا کہ پولیس ریکروٹمنٹ کو شفاف اور میرٹ کے مطابق بنانے کے لئے سپروائزری کمیٹی بنائی گئی ہے اس کے علاوہ پولیس کو مجرموں کی بیخ کنی ، جرائم کی تفتیش کے لئے ضروری آلات و مشینری بھی فراہم کی جارہی ہے تاکہ وہ ان کے خلاف زیادہ بہتر اور موثر انداز میں کاروائی کرسکیں۔

گورنر سندھ نے کراچی میں بحالی امن کے لیے رینجرز کی کارروائیوں کی تعریف کرتے ہوئے کہا کہ کراچی میں امن و امان بحال کرنے میں رینجرز کا نہایت اہم کردار ہے، ان کی دن رات محنت کے باعث دہشت گردی کے 33 واقعات کو وقوع پذیر ہونے سے روکا گیا جو اگر ہو جاتے تو کراچی میں بڑی تباہی ہوتی۔