Tag: نیشنل بینک آف پاکستان

کراچی: نیشنل بینک کے صدر نے اعلان کیا ہے کہ آئی ٹی میں سرمایہ کاری کرکے نیشنل بینک کو ڈیجیٹل بینکاری کی راہ پر گامزن کیا جارہا ہے ، نیشنل بینک سستے گھروں کی تعمیر پر قرضے دینے کی صلاحیت رکھتا ہے

تفصیلات کے مطابق نیشنل بنک کے صدر طارق جمالی نے میڈیا سے گفتگو کرتے ہوئے کہا ہے نیشنل بینک کو جدید خطوط پر استوار کرنا اولین ترجیح ہے ، ڈوبے ہوئے قرضوں کی وصولی ترجیحی بنیادوں پر کی جائے گی۔

طارق جمالی نے کہا کہ آئندہ 2سال میں خدمات اور آئی ٹی کے شعبے میں اخراجات میں بچت اور ڈوبے ہوئے قرضوں کی وصولی ترجیحات میں شامل ہیں، ان کا کہنا تھا کہ بینک مالیاتی خدمات کی پسماندہ طبقوں تک توسیع میں اپنا کردار ادا کرے گا۔

ان کا کہنا تھا کہ بینک آئی ٹی میں سرمایہ کاری کرکے ڈیجیٹل بینکاری کی جانب گامزن ہے، ایشیائی ترقیاتی بینک نے نیشنل بینک کوسال2018 کابہترین تجارتی بینک قراردیا ہے، اے ڈی بی کا یہ ایوارڈ نیشنل بینک کی جانب سے جاری کردہ ایل سیز پر دیا گیا ہے۔

نیشنل بینک کے صدر نے بتایا کہ نیشنل بینک ٹیکسٹائل شوگر پاور اور زراعت کے شعبوں میں بھاری قرضے جاری کررہا ہے۔ حکومت کی جانب سے 50 لاکھ سستے گھروں کی اسکیم متعارف کرانے کے ارادے پر تبصرہ کرتے ہوئے ان کا کہنا تھا کہ نیشنل بینک ان گھروں کی تعمیر کے لیے قرض فراہم کرنے کی صلاحیت رکھتا ہے۔

انہوں نے یہ بھی بتایا کہ تا حال حکومت کی جانب سے تاحال حکومت کی جانب سے نیشنل بینک کو کوئی پالیسی گائیڈ لائن نہیں دی گئی۔ طارق جمالی نے یہ بھی بتایا کہ سابقہ حکومت میں شروع کی گئی وزیراعظم یوتھ لون اسکیم جاری ہے مگر سست روی کا شکار ہے۔