Tag: نیند

خواب، نیند کے دوران آنے والے وہ خیالات ہیں جو ہمارے شعور اور لاشعور سے مل کر تشکیل پاتے ہیں۔ ہمیشہ سے یہ خواب ماہرین نفسیات کی دلچسپی کا موضوع رہے ہیں۔

جب ہم نیند میں ہوتے ہیں تو ہمارا شعور سوجاتا ہے اور لاشعور جاگ جاتا ہے اور یہی خواب بنانے کا ذمہ دار ہے، خواب ہمارے دماغ کے اس حصے سے کنٹرول ہوتے ہیں جو جذبات سے تعلق رکھتا ہے، اس حصے سے نہیں جو منطقی انداز میں کام کرتا ہے اور جاگنے کے دوران ہم پر حاوی رہتا ہے۔

آج ہم آپ کو ان خوابوں کے بارے میں نہایت دلچسپ معلومات بتانے جارہے ہیں۔

خواب میں موبائل فون دیکھنا ناممکن

کیا آپ جانتے ہیں ہم اپنے خواب میں اسمارٹ فون، کار یا دیگر کسی ٹیکنالوجی کو نہیں دیکھ سکتے؟

اس کی وجہ یہ ہے کہ خواب ہمارے دماغ کی جینیاتی یادداشت (جینیٹک میموری) پر مشتمل ہوتے ہیں جو سینکڑوں سال قدیم ہے، ٹیکنالوجی ہماری زندگی میں نسبتاً نئی ہے اور ہمارا دماغ تاحال اس سے مانوس نہیں۔

یہی وجہ ہے کہ بلیک اینڈ وائٹ فلموں کے دور کے افراد عموماً عمر کے آخری حصے تک بلیک اینڈ وائٹ خواب دیکھتے ہیں، دنیا بھر میں تقریباً 12 فیصد افراد سیاہ و سفید خواب دیکھتے ہیں۔

خواب میں کچھ لکھنا اور پڑھنا بھی ناممکن

اس کی وجہ یہ ہے کہ نیند کے دوران ہمارے دماغ کا وہ حصہ غیر فعال ہوجاتا ہے جو زبانوں کو سجھتا ہے۔

صرف یہی نہیں بلکہ خواب میں کی جانے والی گفتگو بھی زبان سے نہیں ہوتی، یہ ٹیلی پیتھی کی طرح ہوتی ہے جس میں لوگ خیالات کے ذریعے ایک دوسرے سے گفتگو کرتے ہیں۔

اجنبی شخص

ہم اپنے خواب میں کبھی کسی اجنبی شخص کو بھی نہیں دیکھتے۔

اگر آپ نے کبھی کوئی خواب ایسا دیکھا ہے جس میں کوئی اجنبی شخص آپ کا پیچھا کر رہا ہے، یا آپ کے گھر میں کوئی اجنبی شخص موجود ہے، تو حقیقی زندگی میں آپ نے اس شخص کو کہیں نہ کہیں دیکھ رکھا ہے، لیکن وہ آپ کو یاد نہیں۔

البتہ وہ آپ کے دماغ کو یاد ہے جسے وہ آپ کے خواب میں لے آیا۔

عجیب اور بے معنی خواب کیوں آتے ہیں؟

ہم اپنے دن بھر میں غیر ارادی طور پر جو مختلف بے معنی الفاظ اور فقرے استعمال کرتے ہیں، مذاق یا سنجیدگی میں کوئی صورتحال گھڑتے ہیں اور لایعنی سوچیں سوچتے ہیں، وہ خواب میں تصویر کی صورت میں سامنے آجاتی ہیں۔

کیا کوئی رات بغیر خواب دیکھے بھی گزر سکتی ہے؟

ایسا ممکن نہیں، ہم ہر رات، اور ہر نیند کے دوران کئی خواب دیکھتے ہیں، لیکن ان میں سے ایک آدھ ہی یاد رکھ پاتے ہیں۔

نابینا افراد کے خواب کیسے ہوتے ہیں؟

نابینا افراد دیکھ نہیں سکتے لیکن انہوں نے بہت سی آوازیں، غائبانہ منظر کشی، اور خوشبوئیں محسوس کی ہوتی ہیں اور انہی کی بنیاد پر انہیں خواب دکھائی دیتے ہیں۔

ایسے افراد جو بعد میں عمر کے کسی حصے میں بینائی سے محروم ہوئے ہوں، ان کے خواب عام انسانوں جیسے ہی ہوتے ہیں، لیکن وقت گزرنے کے ساتھ ساتھ وہ مبہم اور بے رنگ ہوتے جاتے ہیں۔

کیا خواب سیکھنے میں بھی مدد کرتے ہیں؟

اس کا جواب ہاں میں ہے، ہمارا دماغ نیند کے دوران، دن بھر جاگتے ہوئے ملنے والی معلومات کا تجزیہ کرتا ہے اور ان میں سے غیر ضروری معلومات کو تلف کردیتا ہے یا یوں کہیئے کہ ڈیلیٹ کردیتا ہے۔

برے خوابوں سے نجات ممکن ہے؟

ماہرین کا کہنا ہے کہ اگر آپ اپنے برے خواب کو یاد رکھیں، ان کا تجزیہ کریں اور ان کے بارے میں گفتگو کریں، تو برے خواب آنا آہستہ آہستہ کم ہوسکتے ہیں۔

تو کیا اچھے خواب دیکھنا بھی ممکن ہے؟

اس حوالے سے ماہرین کی تجویز ہے کہ سونے سے قبل پریشان کن، برے اور خوفزدہ کردینے والے خیالات نہ سوچے جائیں، یا اس چیز سے دماغ ہٹا لیا جائے جو آپ کو پریشان کر رہی ہے، تو اچھے خواب آنا ممکن ہے۔

اس مقصد کے لیے کمرے میں یا ہیڈ فون پر دھیمی موسیقی سنی جاسکتی ہے جو دماغ اور اعصاب کو پرسکون کرے، جیسے بارش کی، لہروں کی یا ایک مسلسل دھیمی آواز۔

علاوہ ازیں سونے سے قبل لیونڈر کی خوشبو سونگھنا بھی پرسکون نیند اور اچھے خواب لانے کا سبب بن سکتی ہے۔