اسلام آباد : نیو اسلام آباد ایئرپورٹ کی لفٹ خراب ہونے سے مسافروں کو شدید مشکلات کا سامنا کرنا پڑہا ہے، سفر کی تھکان کے بعد سیڑھیاں چڑھنا اور اترنا مزید تکلیف کا باعث بن رہا ہے۔
تفصیلات کے مطابق اربوں روپے کی لاگت سے تعمیر ہونے والا نیو اسلام آباد ایئرپورٹ مسائل کا گڑھ بن گیا، بین الاقوامی آمد (انٹرنیشنل ارائیول) کی لفٹ خراب ہوگئی۔
لفٹ خراب ہونے کی وجہ سے بیرون ملک آنے والے مسافروں کو پریشانی کاسامنا کرنا پڑرہا ہے، لفٹ کی مرمت کا کام تاحال شروع نہیں کیا جاسکا۔
اس حوالے سے ذرائع کا کہنا ہے کہ سیکریٹری ایوی ایشن نے نیو اسلام آباد ایئرپورٹ پر لفٹ خراب ہونے کا نوٹس لے لیا، انہوں نے واقعے کی تحقیقات کا حکم دے کر تین رکنی کمیٹی تشکیل دے دی، کمیٹی فوری طور پر تحقیقات کرکے رپورٹ ڈی جی سی اے اے کو پیش کرے گی۔
واضح رہے کہ سابق نون لیگی دور حکومت میں116ارب روپے کی لاگت سے تعمیر ہونے والے نیو اسلام آباد ایئرپورٹ کا عجلت میں افتتاح کیا گیا تھا۔
مزید پڑھیں: نیواسلام آباد ایئرپورٹ کے تمام بورڈنگ برج خطرناک قرار دے دیئے گئے
نیو اسلام آباد ایئرپورٹ پر معمولی بارش ہوجائے تو چھتوں سے پانی رسنا شروع ہوجاتا ہے، اس کے علاوہ بھی نیو اسلام آباد ایئرپورٹ کا اے ویو برج بھی اکثر خراب ہونے کی شکایت موصول ہوتی رہی ہیں۔
