نیوزی لینڈ نے پاکستان کو چوتھے ٹی 20 میچ میں 115 رنز سے ہرا کر پانچ میچوں کی سیریز میں تین ایک کی فیصلہ کن برتری حاصل کر لی ہے۔
ماؤنٹ مونگانوئی میں کھیلے گئے چوتھے میچ میں پاکستان ٹیم کی بولنگ اور بیٹنگ دونوں ناکام رہے۔ نیوزی لینڈ کی جانب سے جیت کے لیے دیے گئے 221 رنز کے ہدف کے تعاقب میں قومی ٹیم 16.2 اوورز میں صرف 105 رنز پر ڈھیر ہو گئی۔
پاکستان کی بیٹنگ کی ناکامی کا اندازہ اس بات سے لگایا جا سکتا ہے کہ 9 بلے باز ڈبل فیگرز میں بھی داخل نہ ہو سکے۔ عبدالصمد ناٹ آؤٹ 44 رنز کے ساتھ ٹاپ اسکورر رہے۔ عرفان خان 24 رنز بنا کر ڈبل فیگر میں داخل ہونے والے دوسرے بلے باز رہے۔
پاکستانی اننگ کا آغاز کی تباہ کن انداز میں ہوا اور ابتدائی تین وکٹیں صرف 9 رنز پر گر گئیں۔ آکلینڈ میچ کے ہیرو حسن نواز اور کپتان سلمان علی آغا صرف ایک، ایک رن ہی بنا سکے جب کہ محمد حارث نے دو رنز بنائے۔
شاہین شاہ آفریدی، خوشدل شاہ اور حارث رؤف نے 6، چھ رنز بنائے جب کہ شاداب خان اور عباس آفریدی ایک ایک رن کے مہمان ثابت ہوئے۔
نیوزی لینڈ کی جانب سے سب سے کامیاب بولر جیکب ڈفی رہے جنہوں نے 20 رنز کے عوض چار وکٹیں حاصل کیں۔ زکارے فالکس نے 25 نرز دے کر تین کھلاڑیوں کا شکار کیا۔ اش سودھی، ول او رورکے اور جیمز نشام نے ایک، ایک کھلاڑی کو آؤٹ کیا۔
اس سے قبل پاکستانی کپتان سلمان علی آغا نے ٹاس جیت کر پہلے فیلڈنگ کا فیصلہ کیا تاہم بولرز نے رنز کی برسات کرتے ہوئے 20 اوورز میں 220 رنز دے کر گرین شرٹس کو پہاڑ جیسے ہدف تلے دبا دیا۔
نیوزی لینڈ کی جانب سے اوپنرز ٹم سائفرٹ اور فن ایلن نے جارحانہ انداز میں اننگ کا آغاز کرتے ہوئے ٹیم کی نصف سنچری صرف 3.4 اوورز میں ہی مکمل کرا دی تھی۔
کیویز کی جانب سے فن ایلن 20 گیندوں پر 50 رنز بنا کر ٹاپ اسکورر رہے۔ کپتان مچل بریسویل نے ناقابل شکست 46 اور ٹم سائفرٹ نے 44 رنز کی برق رفتار اننگز کھیلیں۔
149 رنز پر پانچ وکٹیں گرنے کے بعد چھٹی وکٹ کے لیے کپتان مچل بریسویل نے ڈیرل مچل کے ساتھ مل کر 56 رنز کی پارٹنر شپ قائم کی۔ یہ پارٹنر شپ بھی حارث رؤف نے ہی توڑی اور ڈیرل مچل کو 29 رنز پر آؤٹ کر کے اپنی تیسری وکٹ بنایا۔
پاکستان کی جانب سے سب سے کامیاب بولر حارث رؤف رہے جنہوں نے چار اوورز میں 27 رنز دے کر 3 وکٹیں حاصل کیں۔ ابرار احمد 41 رنز کے عوض دو وکٹوں کا سواد کیا جب کہ عباس آفریدی نے تین اوورز میں 38 رنز دے کر ایک وکٹ حاصل کی۔
قومی ٹیم کے فاسٹ بولر شاہین شاہ آفریدی اور نائب کپتان شاداب خان مہنگے ترین بولرز ثابت ہوئے۔ دونوں نے اپنے کوٹے کے چار، چار اوورز میں بغیر کوئی وکٹ حاصل کیے 49، 49 رنز دیے۔
اس جیت کے ساتھ ہی نیوزی لینڈ نے پانچ میچوں کی سیریز میں تین، ایک کی فیصلہ کن برتری حاصل کر لی ہے۔ سیریز کا آخری میچ بدھ 26 مارچ کو ویلنگٹن میں کھیلا جائے گا۔
