نیوزی لینڈ کرکٹ بورڈ نے اگلے سیزن کے لیے سینٹرل کنٹریکٹ کا اعلان کر دیا پاکستانی نژاد آل راؤنڈر محمد عباس معاہدے میں شامل بڑے نام نظر انداز ہو گئے۔
نیوزی لینڈ کرکٹ بورڈ نے اگلے سیزن 26-2025 کے لیے نئے سینٹرل کنٹریکٹس کا اعلان کیا ہے۔ اس معاہدے میں چار نئے کھلاڑیوں سمیت 20 کرکٹرز سے معاہدے کیےگئے ہیں۔ پاکستانی نژاد آل راؤنڈر محمد عباس کو رواں برس پاکستان کے خلاف بہترین
کارکردگی کا پھل مل گیا ہے اور انہیں بھی سینٹرل کنٹریکٹ میں شامل کیا گیا ہے۔
کیوی بورڈ نے جہاں نئے سال کے کنٹرکیٹ میں پاکستانی نژاد آل راؤنڈر محمد عباس، وکٹ کیپر بیٹر مچ ہے، آل راؤنڈر زیک فولکس اور لیگ اسپنر آدی اشوک جیسے نئے چہرے شامل کیے ہیں، وہیں ٹم ساؤتھی، اش سودھی، اجاز پٹیل اور جوش کلارکسن جیسے معروف کھلاڑیوں سے اگلے سیزن کے لیے معاہدہ نہیں کیا ہے۔
اطلاعات کے مطابق نیوزی لینڈ کرکٹ بورڈ کی سابق کپتان کین ولیمسن، ڈیون کانوے، فن ایلن، ٹم سیفرٹ اور لوکی فرگوسن جیسے کھلاڑیوں سے پورے سیزن کے بجائے جز وقتی معاہدوں پر بات چیت جاری ہے۔
واضح رہے کہ محمد عباس نے اپنا ون ڈے ڈیبیو اپنے آبائی ملک پاکستان کے خلاف رواں سال مارچ میں کیا تھا اور ڈیبیو میچ میں 26 گیندوں پر 52 رنز کی برق رفتار اننگ کھیل کر اپنے روشن مستقبل کی نوید سنانے کے ساتھ ڈیبیو پر تیز ترین نصف سنچری بنانے کا عالمی ریکارڈ بھی اپنے نام کیا تھا۔ اسی میچ میں انہوں نے پاکستانی کپتان محمد رضوان کو آؤٹ کر کے اپنی پہلی وکٹ بنایا تھا۔
سینٹرل کنٹریکٹ حاصل کرنے والے کھلاڑیوں میں محمد عباس، آدی اشوک، ٹام بلنڈیل، مائیکل بریسویل، مارک چپمن، جیکب ڈفی، زک فولکس، مچ ہے، میٹ ہنری، کائل جیمسن، ٹام لیتھم، ڈیرل مچل، ہنری نکولس، ول اورورکے، رچن رویندرا، مچل سینٹنر، بین سیئرز، ناتھن اسمتھ اور ول ینگ شامل ہیں۔
نیوزی لینڈ کرکٹ بورڈ کے مطابق سینٹرل کنٹریکٹ کے لیے کھلاڑیوں کا انتخاب مکمل ڈیٹا اور کھلاڑیوں کی حالیہ کارکردگی کے پیش نظر آئندہ مصروف سیزن، خصوصاً ٹی ٹوئنٹی ورلڈ کپ 2026 کو مدنظر رکھتے ہوئے کیا گیا ہے۔
