ہیملٹن: ورلڈ کپ کے گروپ اے میں بنگلہ دیش اور نیوزی لینڈ مدِ مقابل ہیں۔
بنگلہ دیش نے نیوزی لینڈ کو 289 کا ہدف دیدیا ہے، بنگلہ دیش نے مقررہ 50 اوورز سات وکٹوں کے نقصان پر 288 رنز بنائے، ٹورنامنٹ میں یہ کیویز کے خلاف کسی بھی ٹیم کا بہترین اسکور ہے۔
نیوزی لینڈ نے 27 اوورز میں دو وکٹوں کے نقصان پر 155 رنز بنالئے ہیں، نیوزی لینڈ کی جانب سے میککلم اور گپتل نے اننگز کا آغاز کیا۔
گپتل نے 88 گیندوں پر سینچری مکمل کی ، جس میں 11 چوکے اور دو چھکے شامل ہیں، نیوزی لینڈ کے میککلم اور ولیمسن کو شکیب نے آؤٹ کیا ، ولیمسن صرف ایک رن بنا سکے۔
اس سے قبل نیوزی لینڈ نے ٹاس جیت کر بنگلہ دیش کو پہلے بیٹنگ کی دعوت دی۔
بنگلہ دیش کی جانب سے امر القیس اور تمیم اقبال اچھا آغاز فراہم نہ کر سکے، چھٹے اوور امرالقیس صرف دو رن بنا کر آؤٹ ہوگئے جبکہ دسویں اوور تمیم اقبال بھی آؤٹ ہوگئے۔
بنگال ٹائیگرز کا آغاز مایوس کن رہا، ستائیس رنز پر دو وکٹیں گرنے کے بعد بیٹسمین وکٹ پر جم گئے، محموداللہ اور سومیا سرکار نے ذمہ دارانہ بیٹنگ کرتے ہوئے ٹیم کی پوزیشن مستحکم کی، دونوں کھلاڑیوں نے تیسری وکٹ کے لئے نوے رنز کی شراکت قائم کی، سرکار نے اکیاون رنز کی اننگز کھیلی۔
محمود اللہ لگاتار دوسرے میچ میں سینچری بنانے والے بنگلہ دیش کے پہلے کھلاڑی بن گئے، محمود اللہ نے ناٹ آؤٹ ایک سو اٹھائیس رنز کی اننگز کھیلی۔
شکیب الحسن 23 رنز مشفیق الرحیم صرف 15 رنز بنا سکے، صابر رحمان نے 22 گیندوں پر 40 رنز بنائے، جن میں پانچ چوکے اور دو چھکے شامل ہیں۔
نیوزی لینڈ کی جانب سے بولٹ، اینڈرسن اور ایلیئٹ نے دو دو وکٹیں حاصل کیں جبکہ ویٹوری ایک وکٹ لے سکے۔
نیوزی لینڈ کی ٹیم اس ٹورنامنٹ میں اب تک ناقابلِ شکست ہے جبکہ بنگلہ دیش نے اب تک پانچ میں سے تین میچ جیتے، ایک ہارا جبکہ اس کا ایک میچ بےنتیجہ رہا تھا۔
یہ دونوں ٹیمیں پہلے ہی کوارٹر فائنل میں جگہ بنا چکی ہیں۔
