ویلنگٹن : نیوزی لینڈ کے خلاف پہلے ون ڈے میں پاکستانی ٹیم دو سو دس رنزبناکر آؤٹ ہوگئی۔ شاہد آفریدی اور مصباح الحق کی اننگز نے ٹیم کو مکمل تباہی سے بچالیا۔
ورلڈ کپ سے قبل پاکستان کا کڑا امتحان شروع ہوگیا۔ پاکستانی ٹاپ آرڈر پہلے ہی آزمائش میں ناکام ہوگئے۔ ویلنگٹن میں نیوزی لینڈ نے ٹاس جیتا اور بولنگ کا فیصلہ کیا۔
اوپنر محمد حفیظ جلدی میں دکھائی دیئے۔ احمد شہزاد کا بلا بھی رنز نہ اگل سکا۔ یونس خان کا تجربہ بھی ٹیم کے کام نہ آیا۔ حارث سہیل اور عمر اکمل بھی جلد آؤٹ ہوکر ٹیم مشکلات میں ڈال گئے۔
سرفراز احمد سے کچھ امیدیں تھیں لیکن وہ بھی توقعات پر پورا نہ اترسکے۔ ایک سو ستائیس رنز پر چھ وکٹیں گرنے کےبعد مصباح الحق اور آفریدی نے ٹیم کو مکمل تباہی سے بچایا۔
آفریدی نے تیز کھیلتے ہوئے اکیس گیندوں پر نصف سنچری مکمل کی۔ آفریدی سڑسٹھ اور مصباح اٹھاون رنزبناکر آؤٹ ہوئے۔ پاکستانی ٹیم چھیالیسویں اوور میں دو سو دس رنزبناکر آؤٹ ہوگئی۔
میزبان ٹیم کی جانب سے گرانٹ ایلیٹ نے تین، کائل ملز اور ٹرینٹ بولٹ نے دو دو وکٹیں حاصل کیں۔
