Tag: نیوز اینکر

خبریں پڑھنے والے نیوز اینکرز سے توقع کی جاتی ہے کہ وہ جذبات سے عاری ہو کر خبریں پڑھیں اور کسی قسم کے تاثرات کا اظہار نہ کریں، لیکن بعض خبریں ایسی ہوتی ہیں کہ نیوز اینکر اپنے جذبات پر قابو کھو بیٹھتے ہیں۔

ایسے ہی ایک نیوز اینکر کی ویڈیو سوشل میڈیا پر وائرل ہورہی ہے جس میں اینکر خبر پڑھتے ہوئے بے اختیار ہنس پڑا۔

سوشل میڈیا پر وائرل ایک ویڈیو میں دیکھا جاسکتا ہے کہ ایک نیوز اینکر خبر پڑھتے ہوئے بتا رہا ہے کہ ایک 57 سالہ شخص کو 2 ماہ پہلے 200 کلومیٹر فی گھنٹہ کی رفتار سے گاڑی چلانے پر عدالت نے جرمانہ کیا، جس کی ادائیگی سے اس نے انکار کردیا۔

اینکر نے بتایا کہ اس شخص نے کہا کہ وہ جو کام بھی کرتا ہے تیز کرتا ہے، وہ تیز کھاتا ہے، تیزی سے سوتا ہے، گاڑی تیز چلاتا ہے، مطالعہ تیزی سے کرتا ہے اور تیز چلتا ہے۔

اینکر کے مطابق تیز رفتار ڈرائیور نے جب عدالت کو یہ بیان دیا تو عدالت نے کہا کہ دیکھتے ہیں آپ 6 مہینے کی قید کتنی تیزی سے کاٹتے ہیں۔

آخری جملہ پڑھتے ہی نیوز اینکر کی ہنسی چھوٹ گئی اور وہ بے ساختہ قہقہے لگانے لگا، اینکر کی اس ویڈیو کو اب تک ہزاروں افراد نے دیکھا اور اس پر مختلف تبصرے کیے۔

pic.twitter.com/rtmAlJn1Cv

— Ali Aftab Saeed (@aliaftabsaeed) August 8, 2022