امریکا کیخفیہ ایجنسی سی آئی اے کے سربراہ جان ریٹ کلیف کا کہنا ہے کہ قابل اعتماد انٹیلی جنس موجود ہے کہ امریکی حملوں سے ایران کے نیوکلیئر پروگرام کو بہت زیادہ نقصان ہوا ہے، جبکہ کئی اہم تنصیبات تباہ ہوگئیں۔
غیر ملکی ذرائع ابلاغ کے مطابق ایک انٹرویو میں امریکا کیخفیہ ایجنسی سی آئی اے کے سربراہ جان ریٹ کلیف کا کہنا تھا کہ انتہائی قابل اعتماد اور درست ذرائع اور طریقے اس جائزے کو سپورٹ کرتے ہیں۔
اُنہوں نے کہا کہ ایران کو ان تنصیبات کو ازسرنو بنانے میں برسوں لگیں گے۔
انہوں نے مزید کہا کہ مزید انٹیلی جنس جمع کرنے کی کوشش کی جارہی ہے تاکہ مناسب فیصلے کرنیوالوں کو مکمل طور پر آگاہ کیا جاسکے اور جب ممکن ہوا عوام کو ان سے آگاہ کیا جائے گا۔
اس سے قبل امریکی نیشنل انٹیلی جنس کی ڈائریکٹر تلسی گیبارڈ کا بیان سامنے آیا تھا جس میں اُن کا کہنا تھا کہ نئی انٹیلی جنس رپورٹ سے ایرانی جوہری تنصیبات کی تباہی کی تصدیق ہوگئی۔
سوشل میڈیا پر جاری ایک بیان میں امریکی نیشنل انٹیلی جنس کی ڈائریکٹر تُلسی گیبارڈ نے بتایا کہ نئی رپورٹ امریکی صدر کی اس بات کی تصدیق کرتی ہے کہ ایرانی جوہری تنصیبات مکمل تباہ کر دی گئی ہیں۔
انہوں نے کہا کہ نطنز، فردو اور اصفہان کی تمام جوہری تنصیبات مکمل طور پر تباہ ہو چکی ہیں،ایران کو تینوں تنصیبات کی ازسر نو تعمیرکرنا ہوگی جس میں کئی سال لگ سکتے ہیں۔
تلسی گیبارڈ کا کہنا تھا کہ پروپیگنڈا میڈیا صدر ٹرمپ کی فیصلہ کن قیادت کو نقصان پہنچانے کی باقاعدہ مہم چلارہا ہے، میڈیا نے صدر ٹرمپ کے ایران پر حملوں کے اقدامات کو کمزور کرنے کی کوشش کی۔
امریکی انٹیلی جنس چیف نے بتایا کہ میڈیا نے لیک شدہ خفیہ رپورٹ کا جزوی استعمال کرکے حقیقت چھپائی، رپورٹ میں ’لوکانفیڈنس‘کی نشاندہی کو نظر انداز کیا گیا۔ امریکی انٹیلی جنس قیادت کی جانب سے مضبوط مؤقف سامنے آیا۔
برطانیہ میں دہشتگرد ی کا خطرہ ہے، وزیراعظم سر کیئر اسٹارمر
اس حوالے سے الجزیرہ ٹی وی نے اپنی رپورٹ میں کہا ہے کہ امریکی انٹیلی جنس چیف کا بیان صدر ٹرمپ کے دعوؤں کی توثیق ہے۔
