Tag: نیٹ فلکس

عراق میں پھنسے ہوئے چینی سائنس دانوں اور ان کو وہاں سے نکالنے کے مشن اور ایکشن پر مبنی یہ فلم ہڈن اسٹرائیک پاکستان میں نیٹ فلیکس کے ٹاپ ٹین میں پہلے نمبر پر موجود ہے۔ اس فلم نے کئی دنوں سے اپنی یہ پوزیشن برقرار رکھی ہوئی ہے۔

ہڈن اسٹرائیک(Hidden Strike) میں معروف امریکی اداکار "جون سینا” اور”جیکی چن” ایک ساتھ نظر آرہے ہیں اور ان دونوں اداکاروں کے تیز ترین ایکشن کے علاوہ یہ فلم ہمیں کئی نئے چینی فن کاروں سے بھی متعارف کرواتی ہے۔

کہانی/ اسکرین پلے

یہ کہانی ایک جنگ زدہ علاقے کی ہے، جہاں کی ایک آئل ریفائنری میں چینی سائنس دان اور دیگر افراد کام کرتے ہیں۔ یہ عراق کے شہر بغداد کا پس منظر ہے۔ وہاں جب خطرات بڑھ جاتے ہیں تو ان چینی سائنس دانوں کو وہاں سے نکالنے کی کوشش کی جاتی ہے، مگر اس میں ناکامی ہوتی ہے، کیونکہ یہاں سے نکلنے کا واحد راستہ ایک سپر ہائی وے ہے، جس کو موت کی سڑک کے نام سے پکارا جاتا ہے۔ اس کے لیے چین کے اسپیشل فورس کے نہایت تجربہ کار سابق سپاہی اور اس کی ٹیم کو بھیجا جاتا ہے۔ اس جنگجو کی اس مشن میں دل چسپی کی ایک بڑی وجہ یہ ہوتی ہے کہ ان پھنسے ہوئے افراد میں اس کی بیٹی بھی شامل ہے، جو ہر چند کہ اپنے باپ سے ناراض ہے، مگر وہ پھر بھی اس کی خاطر اس مشن میں کود پڑتا ہے۔

فلم میں ایک طرف جنگ زدہ علاقے سے نکلنے کی منظرکشی کی گئی ہے تو دوسری طرف باپ بیٹی کے مکالمے ہیں‌ جو دونوں کے رشتے کی تفہیم کرتے ہیں۔ کس طرح ایک جنگجو اور جو باپ بھی ہے، اپنے مشن کو پورا کرتا ہے، یہ دیکھنے کے لائق ہے۔ یہاں اس کا ساتھ ایک سابق امریکی جاں باز سپاہی بھی دیتا ہے، اور دونوں مل کر اپنی ٹیم کے لوگوں کی مدد سے اپنے ساتھیوں کو بحفاظت پُر خطرعلاقے سے باہر لے آتے ہیں۔ اس کہانی میں کئی مقامات ایسے ہیں، جہاں مکالموں کی بجائے کہانی کو بیان کرنے کے لیے ایکشن کا سہارا لیا گیا ہے جب کہ کئی طرح کے کلائمکس اسے مزید دل چسپ بنا دیتے ہیں۔

فلم کے لیے اسکرین پلے "آرش عامل” نے لکھا ہے۔ وہ ایک ایرانی نژاد برطانوی فلم ساز اور کہانی نویس ہیں۔ اور اب طویل عرصے سے امریکا میں مقیم ہیں۔ آرش عامل کئی فلمیں لکھ چکے ہیں، جن میں اے پرائیویٹ وار، گریس آف مناکو، دی ٹائٹن اور دیگر فلمیں شامل ہیں۔ آئندہ برسوں میں لگاتار ان کی تحریر کردہ کئی فلمیں ریلیز ہونے والی ہیں۔ جنگ کے پس منظر میں کہانی لکھنے میں ان کو مہارت حاصل ہے۔ اسی لیے مذکورہ فلم بھی انہوں نے بہت اچھے انداز میں قلم بند کی ہے۔

فلم سازی

اس فلم کے درجن بھر پروڈیوسرز ہیں، جن کا تعلق امریکا اور چین سے ہے۔ یہ کہا جا سکتا ہے کہ مذکورہ فلم دونوں ممالک کی مشترکہ پروڈکشن ہے۔ اس فلم کے دیگر تکنیکی شعبوں میں بالخصوص سینماٹوگرافی کے فرائض بھی معروف چینی کیمرہ مین "ٹونی چیونگ” نے نبھائے ہیں۔ اس فلم کے لیے موسیقی "ناتھن فورسٹ” نے ترتیب دی ہے جو امریکی موسیقار ہیں۔

فلم کی ایڈیٹنگ، فلم کے ہدایت کار نے ہی کی ہے۔ پروڈکشن کے دیگر شعبوں میں آرٹ ڈائریکشن، کاسٹیومز، ساؤنڈ، لائٹنگ، ویژول ایفیکٹس اور دیگر شعبوں میں امریکی اور چینی ماہر آرٹسٹ شامل ہیں۔ فلم میں عراقی فن کاروں کو بھی کام کرنے کا موقع دیا گیا ہے۔ فلم کے ویژول ایفیکٹس پر مزید کام ہو سکتا تھا، البتہ ایکشن سین بہت اچھی طرح فلمائے گئے ہیں۔

ہدایت کاری

اس فلم کے ہدایت کار "اسکاٹ واگ” ہیں، جن کا تعلق امریکا سے ہے۔ ان کی سب سے مشہور فلم اسی سال ریلیز ہو گی، جس کا نام "ایکسپینڈ فور ایبلز” ہے، مگر اس سال انہوں نے پہلے اپنی اس فلم "ہیڈن اسٹرائیک” کو ریلیز کرنے کا فیصلہ کیا ہے۔ ایکشن سے ان کا گہرا تعلق ہے۔

اسکاٹ واگ نے فلم کے شعبے میں اپنا کیریئر بطور "اسٹنٹ مین” شروع کیا تھا۔ اب وہ ایک معروف فلم ساز ہیں۔ فلم ہیڈن اسٹرائیک میں بھی انہوں نے اپنی صلاحیتوں کا خوب مظاہرہ کیا ہے۔

اداکاری

اس فلم میں مرکزی کردار "جیکی چن” اور "جون سینا” نے نبھائے ہیں۔ دونوں ایکشن ہیرو ہیں۔ اپنی ڈھلتی ہوئی عمر میں بھی ٹام کروز، آرنلڈ شوازنیگر اور سلور اسٹالون کی طرح ایکشن کو برقرار رکھنے کی کوشش کر رہے ہیں، لیکن ہِڈن اسٹرائیک نامی اس فلم کو دیکھ کر لگتا ہے کہ انہیں مزید جدوجہد کرنا پڑے گی۔ اس فلم میں دونوں معروف چہرے اپنی اداکاری سے زیادہ متاثر نہیں کر پائے، البتہ چند چینی اداکاروں، جن میں سرفہرست "چنری ما” ہیں، انہوں نے فلم ہیڈن اسٹرائیک میں متاثر کن اداکاری کی ہے۔ وہ اس فلم میں جیکی چن کی بیٹی بنی ہیں۔ ان کے علاوہ "ریما زیدان” نے بھی اچھا کام کیا ہے۔ ان کا تعلق تائیوان سے ہے۔ مجموعی طور پر یہ فلم اپنے ایکشن، موت کی سڑک کے بھیانک مناظر اور اس سے متعلق مختلف صورت حال کی عکاسی کرتے ہوئے فلم بینوں کو اپنی طرف متوجہ کرتی ہے۔

حرفِ آخر

نیٹ فلیکس کی مقبولیت اپنی جگہ، لیکن فلموں کی معروف ویب سائٹ "روٹین ٹماٹوز” پر اس کو پذیرائی نہیں ملی۔ اسے صرف پندرہ فیصد پسندیدگی حاصل ہوئی جب کہ ایمپائر آن لائن پر فلم کو پانچ میں سے دو فیصد ووٹ ملے ہیں۔ فلموں کی سب سے مشہور ویب سائٹ آئی ایم ڈی بی پر یہ فلم دس میں سے پانچ اعشاریہ تین فیصد کے تناسب سے پسند کی گئی ہے۔ گوگل پر شائقین نے اسے پانچ میں سے تین اعشاریہ دو فیصد پسندیدگی سے نوازا۔ اس طرح یہ ملے جلے ردعمل کے ساتھ فلم بینوں کی نظر میں ہے، البتہ نیٹ فلیکس پر پاکستان میں اس فلم کو نمبر ون کی پوزیشن پر مسلسل ایک ہفتے سے زائد ہوگیا ہے۔

نیٹ فلیکس جیسے اسٹریمنگ پورٹلز ہوں یا پھر سینما تھیٹر، بہت کم ایسی فلمیں ہیں، جو مختلف ممالک کے اشتراک سے بنی ہوں اور فلم بینوں کو بھی اپنی طرف متوجہ کیا ہو۔ امریکا اور چین کے اشتراک سے بنی اس فلم میں آپ کو ان دونوں ممالک کے اداکاروں کے ساتھ عراق کے مقامی اداکاروں کی پرفارمنس بھی دیکھنے کا موقع ملے گا۔

یہ عام فلموں سے ذرا مختلف ہے۔ وہ فلم بین جنہیں صحرا اور ویرانے میں ایکشن دیکھنا پسند ہے، ان کو یہ فلم ضرور پسند آئے گی۔

 

پاکستان میں نیٹ فلیکس پر ویب سیریز کے ٹاپ ٹین چارٹ میں پہلے نمبر پر موجود ہے بلیک نائٹ۔ 

یہ ویب سیریز پاکستان میں ہی نہیں دنیا بھر میں شائقین کی توجہ حاصل کررہی ہے اور اسے نہایت دل چسپی سے دیکھا جارہا ہے، کیونکہ یہ اپنے موضوع کے اعتبار سے اَچھوتی کہانی ہے۔

اس میں 2071 کا زمانہ دکھایا گیا ہے، جب زمین پر آکسیجن ناپید ہوجاتی ہے اور انسانوں کی زندگیاں شدید خطرے سے دوچار ہو جاتی ہیں۔ یہ سائنس فکشن ویب سیریز ایک انوکھی کہانی کے ساتھ جدید طرز پر بنائی گئی ہے، اور اسی لیے ناظرین اسے بے حد پسند کر رہے ہیں۔

 

کہانی/ اسکرین پلے

ویب سیریز میں 2071 کا وہ جزیرہ نما کوریا دکھایا گیا ہے، جو فضائی آلودگی کی وجہ سے بنجر ہوجاتا ہے اور وہاں فضا میں آکسیجن ناپید ہونے لگتی ہے۔ اس کا نتیجہ یہ نکلتا ہے کہ جزیرے پر صرف ایک فیصد آبادی زندہ بچتی ہے، اور ان کو بھی آکسیجن ماسک پر انحصار کرنا پڑتا ہے۔ جزیرے کے ان باقی ماندہ لوگوں کو آکسیجن فراہم کرنے والے ڈلیوری ڈرائیورز ہوتے ہیں، جو یہ خدمات انجام دیتے ہیں۔

اس کام میں خطرہ بھی ہے اور شدید پریشانی بھی، اسی ماحول میں مختلف محلاتی سازشیں بھی ہوتی ہیں، جن سے ان کو نبرد آزما ہونا پڑتا ہے۔ یہ خدمات انجام دینے والے عرف عام میں نائٹس کہلاتے ہیں۔

اچھے اور برے کرداروں پر بُنی گئی یہ کہانی بہت افسانوی، لیکن انتہائی دل چسپ ہے۔

کوریائی زبان میں اس ویب سیریز کے نام کا مطلب "ڈلیوری ڈرائیور” ہے، جس کو انگریزی میں "ڈارک نائٹ” کا عنوان دیا گیا ہے۔ سفاک سماجی رویّوں اور رحم دلی کے جذبات کو سامنے لاتی ہوئی اس سائنس فکشن کہانی کو، جنوبی کوریا کے ویب ٹون رائٹر "لی یون کیون” سے مستعار لیا گیا ہے۔ ویب ٹون رائٹر ان کو کہا جاتا ہے جو ڈیجٹیل ایپس اور ویب سائٹس کے لیے ڈرائنگ پر مبنی کہانیاں لکھتے ہیں، جس طرح امریکا میں کامکس اور جاپان میں مانگا اینیمیشن پر مبنی کہانیاں لکھی جاتی ہیں، اسی طرح جنوبی کوریا میں ویب ٹون کہانی بیان کرنے کی ایک جدید صنفِ ادب ہے۔

اس ویب سیریز کے لیے فلم کے ہدایت کار "چواوسیکی” نے ہی کہانی کو اسکرین پلے میں ڈھالا ہے۔

چھ اقساط پر مبنی اس کہانی میں بے پناہ تجسس ہے، کیونکہ یہ ایک تصوراتی، مگر بھیانک مستقبل کی منظر کشی کر رہی ہے۔ ایک ایسی دنیا، جہاں صرف ایک فیصد انسان زندہ ہیں اور وہ سانس لینے والے ماسک پہنتے ہیں اور سماجی قیود انتہائی زیادہ ہیں اور اس ماحول میں صرف آکسیجن فراہم کرنے والے یہ ڈلیوری ڈرائیور ہی ان لوگوں کی بقا کی آخری امید ہیں۔ اس قصے کو انتہائی مؤثر انداز میں قلم بند کیا گیا ہے۔ اس کہانی کے لیے ایک نعرہ بھی تشکیل دیا گیا کہ "دنیا ہوا کے بغیر” جس میں انسان زندہ ہیں۔

پروڈکشن/ ہدایت کاری

یہ ویب سیریز کا پہلا سیزن ہے، جس پر 25 بلین (ملکی کرنسی) یعنی 18 ملین امریکی ڈالرز خرچ ہوئے ہیں۔ پروجیکٹ تین سو اٹھارہ نامی ادارے نے اسے پروڈیوس کیا ہے اور نیٹ فلیکس کے پاس اس کی ڈسٹری بیوشن ہے۔ اس کی مقبولیت کو دیکھتے ہوئے توقع کی جارہی ہے کہ فلم کے مزید کئی سیزن آئیں گے۔ ویب سیریز میں جدید ٹیکنالوجی، گرافکس، ساؤنڈ، میوزک، ویژول ایفکٹس، لائٹنگ اور دیگر جدید ٹیکنالوجی اور مہارتوں‌ کے استعمال کے ساتھ ساتھ بہترین سینماٹو گرافی اور پروڈکشن ڈیزائن بنایا گیا ہے۔ وی ایف ایکس کے ماہر ویسٹ ورلڈ نے یہ سیریز بنائی ہے، وہ اس سے پہلے سویٹ ہوم اور اسکواڈ گیم جیسی شاہکار ویب سیریز تخلیق کرچکے ہیں۔ اس ویب سیریز کے لیے کئی ٹن ریت کا استعمال کیا گیا جسے اسٹوڈیو میں کئی ہزار فٹ پر پھیلا دیا گیا۔ ایک کلومیٹر فاصلے تک سڑک تعمیر کی گئی، اس پر وی ایف ایکس کی مدد سے حتمی منظرنامہ ڈیزائن ہوا، اور یوں دیکھنے والوں کے لیے ایک بنجر زمین یا صحرا تیار کیا گیا۔

ویب سیریز کی ہدایت کاری کے فرائض بھی بخوبی انجام دیے گئے ہیں، البتہ کہیں کہیں طویل مکالمے یا ہنسی مذاق غیر فطری محسوس ہوتا ہے، جسے مزید بہتر کیا جا سکتا تھا۔

اداکاری

بلیک نائٹ کے مرکزی چھ سات اداکاروں میں "کم وون بن” اور”سونگ سیونگ ہیون” کا نام سرِفہرست ہے۔ ان دونوں اداکاروں کو جنوبی کوریا میں بہت مقبولیت حاصل ہے۔ ان کی ساتھی اداکارہ "سیوم” نے بھی ویب سیریز میں اپنی موجودگی کا احساس شدت سے دلایا ہے۔ دیگر دس ذیلی کرداروں کے لیے اپنی اداکاری کے جوہر دکھانے والے بھی ناظرین کو متاثر کریں گے، جن میں شامل "کم ایوسنگ” اور "جن کیونگ” نے بلاشبہ شاندار اداکاری کی ہے۔

مجموعی طور پر ایک اچھی کہانی اور اداکاری کے امتزاج سے ہدایت کار نے بھیانک مستقبل کو بہت تفصیل سے پیش کیا ہے۔

حرفِ آخر

جنوبی کوریا اس وقت فلموں اور ویب سیریز میں، سائنس فکشن کے موضوعات پر کام کرنے والا ایسا ملک ہے، جسے اس میں یدطولیٰ حاصل ہے۔ ان کے ہنرمند موجودہ دنیا سے آگے کا کام کر رہے ہیں اور پوری دنیا کی فلمی صنعتیں ان کی تقلید کررہی ہیں۔ انہیں اپنے ملک کے ساتھ ساتھ دنیا بھر میں مقبولیت بھی مل رہی ہے اور آن لائن فلم پورٹلز پر جنوبی کور کے یہ ماہر اس وقت عملی طور پر راج کر رہے ہیں۔ وہ دن دور دکھائی نہیں دے رہا، جب یہ روایتی مین اسٹریم سینما تھیٹرز میں بھی نمبر ون پوزیشن حاصل کر لیں گے۔

آپ کو اگر سائنس فکشن کہانیوں میں دل چسپی ہے، تو یہ ویب سیریز آپ جیسے ہی قارئین کے لیے ہے، جسے دیکھتے ہوئے کہانی سے لطف اندوز تو ہوں گے، مگر مستقبل کی ایک بھیانک تصویر دیکھ کر خوف سے جسم میں سنسناہٹ بھی پھیل جائے گی۔

پاکستان میں یہ ویب سیریز ان دنوں مستقل دیکھی جارہی ہے۔ آپ بھی اس تخیل کی دنیا میں داخل ہوجائیں، جو یہ بتاتی ہے کہ اگر انسانوں نے فضائی آلودگی پر قابو نہ پایا تو خدا نہ کرے یہ فرضی کہانیاں کل کو حقیقت بھی بن سکتی ہیں۔