لاہور : ڈرامہ نگار خلیل الرحمان قمر کے اغوا کا ماسٹرمائنڈ پکڑا نہ جاسکا ، ملزم حسن شاہ نے بلیک میلنگ کیلئے مرد اور خواتین کا گروہ بنا رکھا تھا۔
تفصیلات کے مطابق ڈرامہ نگار خلیل الرحمان قمر کے ہنی ٹریپ کے معاملے پر نیٹ ورک کا ماسٹرمائنڈ حسن شاہ پولیس کی گرفت میں نہ آسکا۔
پولیس نے بتایا کہ ملزم حسن شاہ نے بلیک میلنگ کیلئے مرد و خواتین کاگروہ بنارکھاتھا، حسن شاہ بلیک میلنگ کے ذریعے کروڑوں روپے کما چکا ہے۔
حکام کا کہنا تھا کہ ملزمہ عروج فاطمہ سمیت 9 گرفتار ملزمان حسن شاہ کیلئےکام کرتےہیں تاہم مرکزی ملزم کی گرفتاری کیلئے چھاپے مارے جارہے ہیں، ملزم کو جلد گرفتار کرلیا جائے گا۔
مزید پڑھیں : ڈرامہ نگار خلیل الرحمان قمر کو جھانسہ دینے والی ملزمہ آمنہ عروج کا بیان سامنے آگیا
اس سے قبل ڈرامہ نگار خلیل الرحمان قمر کو جھانسہ دینے والی ملزمہ آمنہ عروج کا بیان سامنے آیا تھا، جس میں ملزمہ نے بتایا کہ ڈرامہ نگار سے10 سے 15 دن تک بات ہوئی، فون کے ذریعے ان سے چیٹ ہوئی اور تصاویر کا تبادلہ ہوا، انھوں نے ملنے کا کہا، تب میں نے گھر بلالیا۔
یاد رہے ڈرامہ نگار کو اغوا کرنے والی خاتون کو گینگ سمیت گرفتار کیا گیا تھا ، ڈی آئی جی عمران کشور کا کہنا تھا کہ خلیل الرحمن قمر کا موبائل ڈیٹا ریکور کرنے کے بعد ملزم آمنہ عروج کو گرفتار کرکے اس کے ذریعے باقی ملزموں تک پہنچے، بلیک میلرگروہ میں دو خواتین بھی شامل ہیں۔
ذرائع کے مطابق ملزمہ گوجرانوالہ کی رہائشی اورہائی پروفائل افراد کو جھانسہ دیکر رقوم بٹورتی ہے۔