اسلام آباد : حکومت کے "اپنا میٹر اپنی ریڈنگ” اسمارٹ ایپ سے متعلق نیپرا اتھارٹی تاحال لاعلم نکلی، چیئرمین نیپرا نے کہا کہ ہمیں اس بارے میں بریف کیا جائے۔
تفصیلات کے مطابق نیپرا اتھارٹی نے حکومت کے”اپنا میٹراپنی ریڈنگ” اسمارٹ ایپ سے متعلق لاعلمی کا اظہار کرتے ہوئے کہا ہمیں اس بارے میں بریف کیا جائے یہ کونسا ایپ ہے۔
چیئرمین نیپرا وسیم مختار کا کہنا تھا کہ گزشتہ روزمنسٹری نے اسمارٹ ایپ کا افتتاح کیا ہے، اس بارے میں دیکھ لیتے ہیں صارفین کا تحفظ اتھارٹی کی ترجیح ہے۔
وسیم مختار سے سوال کیا گیا کل ہی حکومت نے گیس کی قیمتوں میں اضافہ بھی کیا ہے اس کا کیا اثر آئے گا؟ تو سی پی پی اے نے بتایا کہ مختلف سلیبز میں اضافے سے بجلی ایک روپے فی یونٹ تک مہنگی ہوسکتی۔
بزنس کمیونٹی کا کہنا تھا کہ فرنس آئل پر پیٹرولیم لیوی لگانے سے پاورسیکٹر پر بوجھ پڑے گا، ملک کی بہت زیادہ صنعت بھی فرنس آئل استعمال کرتی ہے، حکومت کی جانب سے آئندہ مالی سال کیلئے لیوی میں اضافہ کیاگیا۔
یاد رہے گذشتہ روز وزیراعظم شہبازشریف نے بجلی کے نظام میں شفافیت لانے کے لیے "اپنا میٹر اپنی ریڈنگ” ایپ لانچ کی تھی۔
مزید پڑھیں : ’اپنا میٹر، اپنی ریڈنگ‘: حکومت نے بجلی صارفین کیلیے بڑی سہولت متعارف کروا دی
افتتاحی تقریب سے خطاب میں وزیراعظم نے پانچ سوارب روپے کی بجلی چوری کو بڑا چیلنج قرار دیتے ہوئے کہا تھا کہ کراچی سے پشاور تک اس ایپ کو فعال کیا جائے گا۔
پاور ڈویژن کے مطابق ایپ کےذریعے صارفین مقررہ تاریخ پر اپنے میٹر کی تصویر اپ لوڈ کر سکیں گے، جس کی بنیاد پر درست اور بروقت بلنگ کی جائے گی، صارف اور میٹر ریڈر دونوں ریڈنگ دیں تو کم ریڈنگ کوترجیح دی جائے گی، تاکہ اووربلنگ، غلطیوں اور سبسڈی کےنقصان سے بچا جا سکے۔
