Tag: نیڈ پرائس

واشنگٹن : امریکا کا کہنا ہے کہ علم ہے کہ پاکستان آئی ایم ایف اور دیگرمالیاتی اداروں سے مذاکرات کررہا ہے، جہاں تک ممکن ہوا پاکستان کی مدد کریں گے۔

تفصیلات کے مطابق امریکی محکمہ خارجہ کے ترجمان نیڈ پرائس نے واشنگٹن میں پریس بریفنگ کے دوران کہا کہ پاکستان کے درپیش معاشی چیلنج سےواقف ہیں اور ہم پاکستان کو بہترمعاشی پوزیشن پردیکھنا چاہتے ہیں۔

نیڈ پرائس کا کہنا تھا کہ علم ہے کہ پاکستان آئی ایم ایف اور دیگرمالیاتی اداروں سے مذاکرات کررہا ہے، پاکستان ہمارا شراکت دار ہے، جہاں تک ممکن ہوا پاکستان کی مدد کریں گے،پاکستان اوربین الاقوامی مالیاتی اداروں کے درمیان تعاون بات چیت پر منحصرہے۔

تکنیکی معاملات پر امریکی محکمہ خارجہ اور پاکستانی حکام رابطے میں ہیں، امریکی محکمہ خارجہ،پاکستانی دفترخارجہ، وائٹ ہاؤس اور امریکی وزارت خزانہ کے درمیان پاکستان کی میکرو اکنامی کو مستحکم بنانے پر بات چیت ہوتی ہے۔

واشنگٹن : امریکی محکمہ خارجہ کے ترجمان نیڈ پرائس کا کہنا ہے کہ پاکستان امریکا کا قریبی سیکیورٹی پارٹنرہے ،پاکستان وہ کرے گا جو اس کے مفاد میں ہوگا۔

تفصیلات کے مطابق امریکی محکمہ خارجہ کے ترجمان نیڈ پرائس نے میڈیا بریفنگ دیتے ہوئے کہا کہ پاکستان امریکا کا قریبی سیکیورٹی پارٹنرہے، پاکستانی عوام نے دہشت گرد حملوں میں شدید نقصان اٹھایا۔

امریکی ترجمان کا کہنا تھا کہ سرحد اور افغانستان میں موجود دہشت گرد گروپوں نے بہت سی پاکستانی جانیں لیں، سرحد پارسے تشدد کے نتیجے میں بہت جانی نقصان ہوا۔

نیڈ پرائس نے کہا کہ دہشت گرد گروپ خطے کے لئے مشترکہ خطرہ بھی ہیں، جسے سنجیدہ لیا جاتا ہے، یہ ہی دہشت گرد امریکا، نیٹو اور افغانستان کے ہمسائیوں کے لئے چیلنج رہا ہے، یہ ہماری مشترکہ تشویش ہے افغانستان سے دہشت گردی ہونے کا خطرہ ہے۔

ترجمان امریکی محکمہ خارجہ کا کہنا تھا کہ پاکستان کس قسم کا ایکشن لے سکتا ہے اس بارے میں رائے نہیں دے سکتے، پاکستان وہ کرے گا جو اس کے مفاد میں ہوگا، اپنا دفاع پاکستان کا حق ہے، پاکستان تب ایکشن لے گا جب مناسب لگے گا۔

افغانستان کی صورتحال کے حوالے سے انھوں نے کہا طالبان نے افغان سر زمین دہشت گردی کیلئے استعمال نہ ہونے دینے کا معاہدہ کیا تھا، ایمن الظواہری افغانستان میں موجود تھا، ہم نے اس کے خلاف بھی کارروائی کی، ہماراعزم ہے خطرے سے نمٹنے کیلئے یک طرفہ کارروائی کی ضرورت پڑی تو کریں گے۔

نیڈ پرائس نے کسی دہشت گرد گروہ بشمول ٹی ٹی پی کی طرف سے تشدد اور خطرے کی مذمت کرتے ہوئے کہا کہ پاکستان اور امریکا کا مشترکہ مفاد ہے کہ طالبان وعدوں کو پورا کریں۔

امریکی ترجمان نے روز دیا کہ طالبان یقینی بنائیں دہشت گرد گروپ خطے کی سیکیورٹی کیلئے خطرہ نہ رہیں۔