Tag: نیگلیریا وائرس

کراچی : انسانی دماغ کھانے والے جرثومے نیگلیریا کے باعث کراچی میں رواں سال اب تک نو افراد زندگی کی بازی ہارگئے، ماہرین نے خبردار کیا ہے کہ پانی میں کلورین کی مطلوبہ مقدار نہ ہونے کے سبب یہ وائرس جان لیوا بن جاتا ہے۔

تفصیلات کے مطابق کراچی کے مختلف علاقوں میں پینے کے پانی میں کلورین کی مطلوبہ مقدار نہ ہونے کے سبب ماہرین صحت نیگلیریا سے اموات کو سب سے اہم سبب قرار دے رہے ہیں۔

ماہرین نے کہا ہے کہ مختلف ذرائع سے حاصل کئے جانے والے پانی میں کلورین کی مقدار شامل نہ کئے جانے کی ذمہ داری متعلقہ اداروں پر عائد ہوتی ہے جبکہ شہریوں کی بھی ذمہ داری ہے کہ وہ گھروں میں زیر استعمال انڈر گراونڈ ٹینک اور پانی زخیرہ کرنے والی جگہوں پر بلیچ کے ذریعے پانی کو صاف کریں۔

کراچی کے علاقے نیوکراچی کے 45 سالہ رضوان بھی نیگلیریا کے باعث جاں بحق ہوگئے تھے ، جنھیں نیو کراچی کے شیڈ اسپتال کے بعد گلشن اقبال میں واقع نجی اسپتال منتقل کیا گیا تھا، جہاں وہ دوران علاج زندگی کی بازی ہار گیا تھا۔

نیگلیریا کے باعث کراچی میں رواں سال اب تک نو افراد جان سے جاچکے ہیں، ڈائریکٹرجنرل ہیلتھ سروس سندھ کے مطابق شہریوں کوفراہم کئے جانے والے پانی میں کلورین کی مقدار لازمی شامل کی جائے۔

کراچی : خطرناک نیگلیریا وائرس نے ایک اور نوجوان کی جان لے لی، 21 سالہ نوجوان ڈیفنس کی نجی اکیڈمی کے سوئمنگ پول میں نہایا تھا۔

تفصیلات کے مطابق کراچی میں دماغ خور امیبا ایک اور زندگی نگل گیا، ڈی ایچ اے کا رہائشی 21 سالہ نوجوان 18 جون کو بخار کی حالت میں نجی اسپتال لایا گیا تھا، طبیعت بگڑنے پر وینٹی لیٹر پر منتقل کیا گیا جو 6 جولائی کو انتقال کرگیا۔

ڈائریکٹر ہیلتھ کراچی ڈاکٹر عبدالحمید جمانی نے بتایا کہ کراچی میں اب تک نیگلیریا سے 6 اموات ہوچکی ہیں، چار کا تعلق کراچی، ایک ایک کوئٹہ اور حیدرآباد سے تھیں،21 سالہ نوجوان ڈیفنس کی نجی اکیڈمی کے سوئمنگ پول میں نہایا تھا۔

نگلیریا وائرس کیا ہے؟

نگلیریا ایک ایسا امیبا ہے، جو اگر ناک کے ذریعے جسم میں داخل ہوجائے تو دماغ کو پوری طرح چاٹ جاتا ہے، جس سے انسان کی موت واقع ہوجاتی ہے، یہ عموماً گرم پانی میں تیزی سے پرورش پاتا ہے۔

یہ وائرس عموماً سوئمنگ پولز، تالاب سمیت ٹینکوں میں موجود ایسے پانی میں پیدا ہوتا ہے، جس میں کلورین کی مقدار کم ہوتی ہے، شدید گرمی بھی نگلیریا کی افزائش کا سبب بنتی ہے۔

طبی ماہرین ’نگلیریا‘ کو خاموش قاتل قرار دیتے ہیں کیونکہ اس نے اب تک دنیا میں ہزاروں افراد کو ابدی نیند سلادیا ہے.

علامات

یہ ایک خطرناک وائرس ہے، جو ناک کے ذریعے دماغ میں داخل ہوجاتا ہے اور دماغ متاثر کرنا شروع کردیتا ہے، اس کی علاماتیں سات دن میں ظاہر ہوتی ہے، جو گردن توڑ بخار سے ملتی جلتی ہیں، سرمیں تیز درد ہونا، الٹیاں یا متلی آنا ، گردن اکڑ جانا اور جسم میں جھٹکے لگنا اس کی واضح علامات ہیں۔