اسلام آباد : عدلیہ سےمتعلق آئینی ترمیم کے لیے ن لیگ اور پیپلزپارٹی کی نمبرز مکمل کرنےکیلئے کوششیں جاری ہے ، ترمیم کے لئے جے یو آئی ف کے 8 ووٹ بھی درکار ہے۔
تفصیلات کے مطابق عدلیہ سے متعلق آئینی ترمیم کے لئے ن لیگ اورپیپلزپارٹی کے نمبرز مکمل کرنے کیلئے جتن جاری ہے۔
ذرائع نے بتایا کہ آئینی ترمیم کےلئے حکومت کومطلوبہ نمبرز حاصل کرنے کیلئے 4 آزادارکان کے ووٹ اور جےیوآئی ف کے8ووٹ بھی درکار ہے۔
نمبرزگیم پوراکرنے کے لئے مختلف حلقے سرگرم ہیں ، صدرآصف زرداری اورن لیگ کی نمبرز گیم کے لئے کوششیں جاری ہے۔
خیال رہے وزیراعظم شہبازشریف نے پارلیمنٹ میں رواں ہفتے اہم قانون سازی کے معاملے پر آج اتحادی جماعتوں کے ارکان کو عشائیہ پر مدعو کرلیا ہے۔
وزیراعظم ملکی معاشی صورت حال اور مجوزہ قانون سازی پرارکان کواعتماد میں لیں گے، حکومت ججوں کی تعداد بڑھانے سمیت آئینی اصلاحاتی پیکج بھی لانا چاہتی ہے۔
دوسری جانب عدلیہ سے متعلق قانون سازی کیلئے پیپلزپارٹی کےقانونی ماہرین کو اسلام آباد طلب کرلیاگیا۔
چیئرمین پیپلزپارٹی بلاول بھٹو بھی کراچی سے اسلام آباد پہنچ گئے جبکہ صدرآصف علی زرداری بھی خصوصی طیارےکےذریعے اسلام آباد پہنچے۔
ذرائع کا کہناہےپی پی قیادت کی ہدایت پرارکان قومی اسمبلی وسینیٹرزبھی اسلام آباد پہنچنا شروع ہورہے ہیں، پیپلزپارٹی قیادت کا آئندہ ہفتے اسلام آباد میں اجلاس ہوگا، جس میں عدلیہ سے متعلق قانون سازی کا ہر پہلو سے جائزہ لیا جائے گا۔
سینیٹر افنان اللہ نے دعوی کیا ہے کہ آئین سازی اور قانون سازی کیلئے سینیٹ اور قومی اسمبلی میں حکومت کے پاس نمبرز پورے ہیں۔۔ دوتہائی اکثریت حکومت کے پاس ہے، آئینی ترمیم میں مولانا فضل الرحمان بھی حکومت کا ساتھ دیں گے۔
لیگی رہنما مصدق ملک کہتے ہیں کہ ہم آئین سازی اور قانون سازی کرنا چاہتے ہیں۔
ایوان میں قانون سازی سے متعلق سوال پر فیصل واوڈا نے کہا کہ پاکستان کی بہتری کےلیےپارلیمان میں قانون بدل سکتے ہیں، وہ گانا سنا ہے مولانا آرہا ہے۔۔یہ گانا یاد رکھیں اس کو گاڑی میں بجانا شروع کردیں۔
