Tag: ن لیگ میں شامل

لاہور : وفاقی تحقیقاتی ایجنسی (ایف آئی اے) کے سابق ڈائریکٹر جنرل (ڈی جی) بشیر میمن نے مسلم لیگ ن میں باقاعدہ شمولیت اختیار کرلی۔

اس حوالے سے ذرائع کا کہنا ہے کہ مریم نواز نے نواز شریف کے استقبال کیلئے سندھ میں 12 رکنی کمیٹی تشکیل دی ہے اور بشیر میمن کو 12 رکنی کمیٹی کا کنوینر مقرر کیا گیا ہے۔

پارٹی نوٹیفکیشن کے مطابق کمیٹی میں محمد زبیر، کھیل داس کوہستانی، نہال ہاشمی بھی شامل ہیں، کمیٹی 21 اکتوبر کو نواز شریف کے استقبال میں کارکنان کی شرکت یقینی بنائے گی۔

واضح رہے کہ گزشتہ حکومت سے اختلافات کے بعد یکم دسمبر 2019 کو اس وقت کے ڈائریکٹر جنرل ایف آئی اے بشیر میمن نے احتجاجاً اپنی ملازمت سے مستعفیٰ ہونے کا اعلان کیا تھا۔

بعد ازاں سال 2022 میں میڈیا سے گفتگو کرتے ہوئے بشیر میمن نے شریف خاندان کے خلاف کیسز کے حوالے سے اہم انکشافات کیے ان کا کہنا تھا کہ ان سے شریف خاندان کے خلاف کیسز بنانے کا کہا گیا تھا۔

انہوں نے کہا کہ مجھے متعدد بار مریم، نواز شریف اور شہباز شریف کے خلاف کیسز کا کہا گیا، میں نے جو الزامات لگائے تھے ان کی انکوائری کی بجائے مجھ ہی پر الزامات لگا دیے گئے۔