Tag: ن لیگ پر تنقید

  • معاون خصوصی افتخار درانی کا ن لیگ پر طنز

    معاون خصوصی افتخار درانی کا ن لیگ پر طنز

    اسلام آباد: وزیر اعظم کے معاون خصوصی برائے اطلاعات افتخار درانی نے کہا ہے کہ جن کی لندن تو کیا پاکستان میں بھی کوئی جائیداد نہیں تھی، پتا نہیں کہاں کہاں سے ان کی جائیدادیں برآمد ہو گئیں۔

    تفصیلات کے مطابق معاون خصوصی افتخار درانی نے ٹویٹ کرتے ہوئے کہا کہ جن کی کہیں بھی جائیداد نہیں تھی پھر ان کی جگہ جگہ سے جائیدادیں نکل آئیں۔

    افتخار دارنی نے ٹویٹر پر اپنے پیغام میں ن لیگی رہنما پر تنقید کرتے ہوئے کہا کہ جن کے قطری خطوط اور کیلبری فونٹ کے چرچے عام تھے وہ دوسروں کو جھوٹ بولنے کا طعنہ دیتے ہیں۔

    معاون خصوصی نے طنز کرتے ہوئے کہا کہ جب ڈھٹائی کا یہ عالم ہو، تب ہی انسان اپنے والد کو ’محفوظ مقام‘ پر منتقل کر کے نائب صدر بنتا ہے۔

    یہ بھی پڑھیں:  پی ٹی آئی نے مریم نواز کو ن لیگ کا نائب صدر بنانے کا فیصلہ چیلنج کردیا

    یاد رہے کہ 3 مئی کو مسلم لیگ ن کے صدر شہباز شریف نے پارٹی عہدے داروں کے ناموں کا اعلان کرتے ہوئے مریم نواز کو پارٹی کی نائب صدر مقرر کر دیا تھا۔

    دوسری طرف پاکستان تحریک انصاف نے الیکشن کمیشن میں مریم نواز کو پارٹی عہدہ دینے کے فیصلے کے خلاف با ضابطہ درخواست دائر کر کے فیصلہ چلینج کیا، درخواست میں کہا گیا مریم نواز سزا یافتہ ہیں، احتساب عدالت نے مریم نواز کو عوامی عہدے کیلئے نااہل قرار دیا۔

  • سیاسی جماعتوں کے ترجمانوں کے ضمیر نوکریوں کی زنجیروں سے بندھے ہوئے ہیں: زرتاج گل

    سیاسی جماعتوں کے ترجمانوں کے ضمیر نوکریوں کی زنجیروں سے بندھے ہوئے ہیں: زرتاج گل

    اسلام آباد: وزیر مملکت زرتاج گل نے کہا ہے کہ سیاسی جماعتوں کے ترجمانوں کے ضمیر نوکریوں کی زنجیروں سے بندھے ہوئے ہیں۔

    تفصیلات کے مطابق مسلم لیگ ن کی ترجمان مریم اورنگ زیب کے بیان پر وزیرِ مملکت زرتاج گل نے سخت رد عمل ظاہر کیا ہے، انھوں نے کہا کہ ان کے ضمیر نوکریوں کی زنجیروں سے بندھے ہوئے ہیں۔

    زرتاج گل کا کہنا تھا کہ عوام کو دلاسے دینے والے کرپشن کنگز ہیں، کرپشن کنگز لوٹ مار نہ کرتے تو آج یہ حالات نہ ہوتے۔

    وزیر مملکت نے سیاسی جماعتوں پر کڑی تنقید کی، کہا یہ سیاسی جماعتیں نہیں بلکہ پرائیویٹ لمیٹڈ کمپنیاں ہیں جنھوں نے ملک لوٹا، سیاسی جماعتوں کی آڑ میں پرائیویٹ لمیٹڈ کمپنیوں کے ترجمان لگائے جا رہے ہیں۔

    یہ بھی پڑھیں:  مریم اورنگزیب کی نیا پاکستان ہاؤسنگ اسکیم اور وزیر اعظم پر الزامات کی بارش

    زرتاج گل نے کہا ’ان کے ضمیر نوکریوں کی زنجیروں سے بندھے ہوئے ہیں، عمران خان اور فواد چوہدری سچ بولتے ہیں تو کرپشن کنگز کو تکلیف ہوتی ہے، لیکن ہم سچ بول کر قوم کا پیسا لوٹنے والوں کی چیخیں سنتے رہیں گے۔‘

    خیال رہے کہ مسلم لیگ ن کی ترجمان مریم اورنگ زیب نے نیا پاکستان ہاؤسنگ اسکیم پر کڑی تنقید کرتے ہوئے اسکیم کو وزیر اعظم ہاؤس یونی ورسٹی کا ایکشن ری پلے قرار دیا تھا۔

    مریم اورنگ زیب نے کہا ’میں وزیر اعظم کو شہباز شریف کے منصوبے کی نقل پر مبارک باد دیتی ہوں، شہباز شریف نے 2011 میں آشیانہ اقبال، آشیانہ قائد کی بنیاد رکھی تھی، لیکن یہ نہ تو گھر بنا سکتے ہیں، نہ ہی بس سروس بنا سکتے ہیں۔‘

  • ن لیگ عدالتوں‌ کے فیصلے تسلیم نہیں‌ کرتی، کائرہ

    ن لیگ عدالتوں‌ کے فیصلے تسلیم نہیں‌ کرتی، کائرہ

    اسلام آباد: پیپلز پارٹی کے رہنما قمر الزماں کائرہ نے کہا کہ ن لیگ شروع سے ہی عدالتوں کے فیصلے تسلیم نہیں کرتی، حکومت ہمارے مطالبات مان لے احتجاج خود بخود ختم ہوجائےگا،عمران خان تنہا ہی نکل پڑے ہیں انہیں چاہیے کہ وہ باقی جماعتوں کو بھی ساتھ لے کر چلیں اور سولو فلائٹ نہ کریں۔


    اے آر وائی نیوز کے پروگرام میں بات کرتے ہوئے انہوں نے کہا کہ موجودہ صورتحال پر اپوزیشن جماعتوں کا اجلاس طلب کرلیا ہے، عمران خان کے مطالبات جائز ہیں، اپوزیشن کے بھی یہی مطالبات ہیں، پی ٹی آئی کی صوبائی حکومت میں اتحادی جماعتیں بھی ان کے ساتھ ہیں، ن لیگ عدالتی فیصلے تسلیم نہیں کرتی لیکن اس کے خلاف کوئی کارروائی نہیں کی جاتی۔

    انہوں نے مزید بتایا کہ حکومت کی مذاکراتی ٹیم کل ہمارے پاس آئی تھی۔

    تحریک انصاف کے رہنما  علی محمد خان نے کہا کہ وفاقی حکومت نے عدالتی حکم کی خلاف ورزی کی، ریاستی دہشت گردی کا مظاہرہ کیا گیا، سب کو اپنی ذمہ  داری ادا کرنی ہوگی، پی ٹی آئی کے ساتھ عوامی مسلم لیگ کو بھی تشدد کا نشانہ بنایا گیا۔