جھنگ: پی پی 78 کی نشست پر ہونے والے ضمنی انتخاب میں آزاد امیدوار حق نواز جھنگوی کے بیٹے مولانا مسرور نواز جھنگوی نے کامیابی حاصل  کرلی، ن لیگ اور پیپلز پارٹی کے امیدوار کامیابی حاصل نہ کرسکے۔ بلاول بھٹو زرداری نے انتخاب کے نتائج پر سخت ردعمل دے ڈالا۔

غیر سرکاری نتائج کے مطابق مولانا مسرور نواز جھنگوی نے 48 ہزار سے زائد ووٹ حاصل کرکے اپنے مد مقابل ن لیگ اور پیپلز پارٹی کے امیدواروں کو شکست دے دی۔

---

یہ بھی پڑھیں: جھنگ کے الیکشن میں‌ راحیل شریف کو ووٹ کاسٹ

---

ن لیگ کے امیدوار آزاد ناصر 35ہزار سے زائد ووٹ لے کر دوسرے نمبر پر رہے جب کہ پاکستان پیپلز پارٹی کے امیدوار سرفراز ربانی 33ہزار سے زائد ووٹ لے کر تیسرے نمبر پر رہے۔

پی پی 78 میں پولنگ کاعمل نو بجے شروع ہوا جو پانچ بجے تک جاری رہا،حلقہ میں ایک خواجہ سرا سمیت 25 امیدوار وں نے نشست پر الیکشن لڑا، توقع کی جارہی تھی کہ کانٹے کا مقابلہ پی پی اور ن لیگ کے امیدواروں میں ہوگا تاہم آزاد امیدوار نے دونوں کو شکست دے کر فتح حاصل کرلی

جھنگ حلقہ پی پی78 میں تحریک انصاف کے شیخ ارفع مجید اور عوامی تحریک کے نسیم قادری کے علاوہ خواجہ سرا محمد عارف عرف بوٹا بھی امیدواروں میں شامل رہے۔

حلقے میں رجسٹرڈ ووٹرز کی تعداد 2لاکھ 6ہزار 562 ہے جن میں ایک لاکھ 8ہزار 627 مرد اور 97ہزار 935 خواتین ووٹرز شامل ہیں۔

صوبائی اسمبلی کی اس نشست حلقہ پی پی78میں 171 پولنگ اسٹیشنز بنائے گئے اور تمام کو حساس قرار دیا گیا جبکہ سیکیورٹی کےلیے پاک فوج،رینجرز کے 711 اہلکاروں کے علاوہ پولیس کے دوہزار اہلکار ڈیوٹی پر تعینات رہے۔

واضح رہے کہ پی پی 78کی یہ نشست سابقہ ن لیگی رکن صوبائی اسمبلی راشدہ یعقوب شیخ کی سپریم کورٹ سے نااہلی کے بعد خالی ہوئی تھی۔

نیشنل ایکشن پلان دفن ہوگیا، بلاول کا شکست پر رد عمل

انتخاب کے نتائج کے بعد حق نواز جھنگوی کے بیٹے کی برتری سامنے آنے پر پیپلز پارٹی کے چیئرمین بلاول بھٹو نے الیکشن کمیشن اور نیشنل ایکشن پلان پر سوالات کھڑے کر دیے۔

سماجی رابطوں کی ویب سائٹ ٹوئٹر پر ٹوئٹ کرتے ہوئے بلاول کا کہنا تھا کہ نیشنل ایکشن پلان دفن ہوگیا۔ نیپ ناکام لیگ کا ایکشن پلان ہے۔ انہوں نے گو نواز گو کا ہیش ٹیگ بھی لگایا۔

Rest in pieces National action plan. #RIPNAP #NakaamLeagueActionPlan #PP78 #GoNisarGo

— BilawalBhuttoZardari (@BBhuttoZardari) December 1, 2016

PPP workers & leaders risked their lives to fight #PP78 election. Time for inferior minister to go home. ECP has hard questions to answer. https://t.co/Y72P5Fds5w

— BilawalBhuttoZardari (@BBhuttoZardari) December 1, 2016

بلاول نے وزارت داخلہ کو گھر جانے کا مشورہ دیتے ہوئے الیکشن کمیشن کی اہلیت پر بھی سوال کھڑے کردیے۔