اسلام آباد : مسلم لیگ ن کی حکومت نے احساس پروگرام اور پناہ گاہیں بند کرنے کی خبروں کو جھوٹ قرار دے دیا۔
تفصیلات کے مطابق مسلم لیگ ن کی ترجمان مریم اورنگزیب نے احساس پروگرام اورپناہ گاہیں بندکرنے کی خبروں کو جھوٹ قرار دے دیا۔
مریم اورنگزیب نے کہا کہ شہبازشریف نے واضح کیا عوامی خدمت کے منصوبے جاری رہیں گے، بے نظیر انکم سپورٹ پروگرام جاری رہے گا، اسے مزید توسیع دی جائےگی۔
ترجمان کا کہنا تھا کہ وزیراعظم نےبےنظیرانکم سپورٹ پروگرام کوتعلیم کاذریعہ بنانےکافیصلہ کیا، عوام کی بھلائی کے ہر منصوبے کو مزید بہتر بنائیں گے۔
انھوں نے مزید کہا کہ صحت کارڈ اسی طرح چلتا رہے گا، اسے مزید بہتر بنائیں گے ، یہ جھوٹ وہ پھیلا رہے ہیں جنہیں کنٹینر پر جھوٹ بولنے کی عادت ہے۔
مریم اورنگزیب کا کہنا تھا کہ اللہ تعالیٰ کا شکر ہے کہ آج ملک میں ایک منتخب وزیراعظم ہے ، منتخب وزیراعظم عوام کا دکھ ، درد اور احساس رکھتا ہے، آج ملک میں ایسا منتخب وزیراعظم ہے جو خدمت کا جذبہ رکھتا ہے اور جو سلامتی ایشوز کو سیاست کیلئے استعمال نہیں کرتا۔
