Tag: ن لیگ

اسلام آباد: پیپلزپارٹی نے اے پی سی کے معاملے پر مسلم لیگ ن کی خاموشی کے بعد آئندہ کی حکمت عملی پر غور شروع کر دیا۔

تفصیلات کے مطابق پیپلزپارٹی اور ن لیگ میں اے پی سی کے معاملے پر اتفاق رائے نہ ہوسکا۔اپوزیشن کی آل پارٹیز کانفرنس مزید تاخیر کا شکار ہوگئی۔

ذرائع کا کہنا ہے کہ پیپلزپارٹی نے مسلم لیگ ن کی خاموشی کے بعد آئندہ کی حکمت عملی سمیت دیگر جماعتوں سے اہم بیٹھک پر غور شروع کر دیا۔

ذرائع کے مطابق ن لیگ نے اے پی سی سےمتعلق یقین دہانی کرائی تھی،عیدگزرنے کے باوجود ن لیگ تاحال خاموش ہے،پیپلزپارٹی نے اے پی سی بلانے پر غور شروع کر دیا ہے۔

ذرائع کا کہنا ہے کہ پیپلزپارٹی کی جانب سے اے پی سی بلا کر ن لیگ کو دعوت دینے پر غور کیا جا رہا ہے،ن لیگ پر ہے کہ وہ اے پی سی میں شرکت کرتی ہے یا نہیں۔

ذرائع کا مزید کہنا ہے کہ اے پی سی نہیں بلائی گئی تو دیگر اپوزیشن جماعتوں سے اہم بیٹھک ہوگی۔

اسلام آباد: آج قومی اسمبلی کے اجلاس میں ن لیگی رہنما احسن اقبال نے ترکی کے مشہور ترین ڈرامے ارطغرل غازی کا عجیب طرح سے ذکر کیا۔

اجلاس میں احسن اقبال نے خطاب کرتے ہوئے حکمراں جماعت کو تنقید کا نشانہ بنایا، حکومت کی تضحیک کے مقصد کے لیے انھوں نے ترکی کے تاریخی ڈرامے ارطغرل کے نام کا عجیب طرح سے سہارا لیا۔

پارٹی کے سیکریٹری جنرل نے پہلے پاکستان میں اس ڈرامے کی مقبولیت کا ذکر کیا، کہا کہ ترکی نے بہت اچھا ڈراما بنایا، ارطغرل یہاں ہر بچے کی زبان پر ہے۔ اس کے بعد احسن اقبال نے کہا کہ لیکن ہم بھی پیچھے نہیں، ہم نے بھی بڑے ڈرامے بنائے ہیں۔

ایسا لگ رہا تھا کہ اب وہ پاکستانی ڈراموں کا ذکر کریں گے، تاہم معلوم ہوا کہ انھوں نے ارطغرل کے نام سے آخری دو حروف رُل کو لے کر عجیب انداز میں حکومت کی تضحیک کرنے کی کوشش کی، واضح رہے کہ رُلنا اردو میں پامال ہونے اور تباہ ہونے کے لیے استعمال کیا جاتا ہے۔

ارطغرل کی حلیمہ کو پاکستان پسند آگیا، میگزین کیلئے فوٹو شوٹ

احسن اقبال نے اسمبلی کے فلور پر کہا کہ ہم نے بھی ڈراما بنایا ہے جس کا نام ہے معیشت رُل، اس سے ان کا مطلب تھا کہ حکومت نے معیشت کو تباہ کر کے رکھ دیا ہے۔ صرف یہی نہیں احسن اقبال نے ارطغرل کے نام کا مزید سہارا لیا اور کہا ہم نے مُلک رُل، خارجہ پالیسی رُل، سرمایہ کاری رُل، نوجوان رُل ، کسان رُل ڈرامے بھی بنائے ہیں۔

لیگی رہنما اس آڑ میں کہنا چاہ رہے تھے کہ حکمرانوں نے نہ صرف معیشت بلکہ خارجہ پالیسی سے لے کر کسانوں اور نوجوانوں تک ہر شعبے کا برا حال کر دیا ہے، احسن اقبال نے ارطغرل کے نام کا غلط استعمال کرتے ہوئے اسی پر ہی بس نہیں کیا بلکہ آخر میں کہا کہ ہمارے اس ڈرامے کا ڈراپ سین بھی موجود ہے، جو حکومت رُل ہے۔

لاہور: عدالتی اسٹے آرڈر کے بعد صوبائی حکومت نے اسحاق ڈار کے گھر سے پناہ گاہ کا سامان نکالنے کی تیاریاں شروع کردیں۔

اے آر وائی نیوز کے مطابق عدالتی اسٹے آرڈر کے بعد گھر سے پناہ گاہ کا بورڈ بھی اتار دیا گیا ہے جبکہ اسحاق ڈار کے گھر کے اطراف کنٹینر کو کرین کی مدد سے پارک میں اتارا گیا۔

پناہ گاہ کو گھر سے سامنے پارک میں منتقل کیا جائے گا۔ ضلعی انتظامیہ کا عملہ اسحاق ڈار کی رہائش گاہ میں موجود ہے، جو پناہ گاہ کے سامان منتقلی کا جائزہ لے رہا ہے۔

مذکورہ اقدامات لاہورہائی کورٹ کے سابق وزیر خزانہ اسحاق ڈار کا گھرپناہ گاہ میں تبدیل کرنے کے خلاف حکم امتناع جاری ہونے کے بعد سامنے آئیں۔ عدالت نے پنجاب حکومت سے دس روز میں جواب بھی طلب کرلیا ہے۔

اسحاق ڈار کاگھرپناہ گاہ میں تبدیل کرنے کیخلاف حکم امتناع جاری

یاد رہے حکومت نے سابق وزیر خزانہ اسحاق ڈار کے لاہور میں واقع گھر کو پناہ گاہ میں تبدیل کر دیا تھا ، اسسٹنٹ کمشنر ماڈل ٹاؤن کا کہنا تھا کہ اسحاق ڈار کے گھر میں 50 لوگوں کی رہائش کا انتظام کیا گیا ہے، اس پناہ گاہ میں 35مرد اور 15 خواتین رہائش اختیار کر سکیں گے۔

دوسری جانب معاون خصوصی برائے احتساب شہزاد اکبر نے کہا تھا کہ اسحاق ڈار کے گھر کو پناہ گاہ بنانا کوئی انتقامی کارروائی نہیں ہے۔

اسلام آباد: وفاقی وزیر برائے اقتصادی امور حماد اظہر کا کہنا ہے کہ پیپلزپارٹی اور ن لیگ کے خسارے ہم پورے کر رہے ہیں۔

تفصیلات کے مطابق وفاقی وزیر حماد اظہر نے قومی اسمبلی میں اظہار خیال کرتے ہوئے کہا کہ ملکی خسارے ہم پورے کر رہے ہیں، 2018 میں مارچ میں آئی ایم ایف کی رپورٹ آئی ، ملکی معیشت کا بیڑہ ن لیگ کے دور میں غرق کیاگیا۔

حماد اظہر کا کہنا تھا کہ بجلی گیس کے بحرانوں کی وجہ ن لیگی دور کے غیرمستحکم منصوبے تھے، ن لیگ دور میں معیشت اچھی جا رہی تھی تو آئی ایم ایف کے پاس کیوں گئے۔

انہوں نے کہا کہ گزشتہ سال جولائی سے اب تک فارن ریزرو میں 50 فیصد اضافہ ہوا، رواں سال دسمبر تک گردشی قرضے ختم کرنے ہیں، حکومت کے لیے بجلی کے بل بڑھانے کا فیصلہ مشکل ہوتا ہے۔

وفاقی وزیر کا کہنا تھا کہ مشکل فیصلےکوئی بھی حکومت خوشی سے نہیں کرتی، معیشت پر بات ہوتی ہے اور ہمیں احساس ہےمہنگائی میں اضاٖفہ ہوا، اس میں کوئی شک نہیں کہ مہنگائی میں اضافہ ہوا ہے۔

حماد اظہر نے کہا کہ کوئی مجبوری ہوتی ہے جس کے تحت مشکل فیصلے کیے جاتے ہیں، پیپلزپارٹی اور ن لیگ کے خسارے ہم پورے کر رہے ہیں،کرنٹ اکاؤنٹ کا خسارہ آج 84فیصد سے نیچے آچکا ہے۔

انہوں نے کہا کہ ہم نے معیشت کو آئی سی یو سے نکالا ہے، کرنسی بہت زیادہ دباؤ میں تھی، پی ٹی آئی نے روپے کو ڈی ویلیو نہیں کیا،
پاکستان 3.6 ارب ڈالر واپس کرچکا ہے۔

اسلام آباد: پاکستان تحریک انصاف کے رہنما فرخ حبیب کا کہنا ہے کہ جو گڑھا پی ٹی آئی کے لیے کھودا گیا یہ لوگ خود اس میں گرنے جا رہے ہیں۔

تفصیلات کے مطابق اسلام آباد میں پارلیمانی سیکریٹری فرخ حبیب نے میڈیا کو بریفنگ کے دوران بتایا کہ ن لیگ، پی پی فنڈنگ سے متعلق پٹیشن دائر کی، کل پارٹی فنڈنگ اسکرونٹی کمیٹی سماعت کرے گی۔

فرخ حبیب نے کہا کہ سیاسی پارٹیزکے گوشواروں کی جانچ الیکشن کمیشن کا اختیار ہے، خدشہ ہے ن لیگ نے پارٹی اکاؤنٹ منی لانڈرنگ کے لیے استعمال کیا۔ انہوں نے کہا کہ ن لیگ یوکے لمیٹڈ کمپنی کے طور پر رجسٹرڈ ہے، ن لیگ یوکے لمیٹڈ کمپنی برطانوی قانون کے مطابق کاروبارکرسکتی ہے۔

انہوں نے کہا کہ ن لیگ یوکے لمیٹڈ کمپنی برطانوی قانون کے مطابق تجارت کرسکتی ہے، ن لیگ یوکے لمیٹڈ کمپنی کے سربراہ زبیر گل ہیں، ن لیگ یوکے سے کتنا پیسہ پاکستان آیا ن لیگ نے جواب نہیں دیا۔

پارلیمانی سیکریٹری نے کہا کہ پارٹی فنڈنگ کیس پر ن لیگ راہ فرار اختیار کر رہی ہے، ہوسکتا ہے تاخیر کی وجہ کسی اور قطری خط کی صورت میں سامنے آئے، نوازشریف نے ن لیگ کو 10کروڑ دیے، اگلے دن 4 کروڑ اپنے اکاؤنٹ منتقل کیے۔

فرخ حبیب نے کہا کہ پی پی اور ن لیگ کے وکلاعدالت میں پیش تک نہیں ہوتے، پی پی کی یوکے میں کمپنی کا سربراہ امریکی شہری مارک سیگل ہے، مارک سیگل بینظیر شہید کیس میں بھی خط لے کر آئے تھے، آصف زرداری پیپلزپارٹی کی اس کمپنی کے پرنسپل ہیڈ ہیں۔

انہوں نے کہا کہ جو گڑھا پی ٹی آئی کے لیے کھودا گیا یہ لوگ خود اس میں گرنے جا رہے ہیں، پی ٹی آئی نے 40 ہزار ڈونرز کا ڈیٹا فراہم کردیا ہے، پی ٹی آئی سے جو جواب مانگا جائے گا وہ الیکشن کمیشن کو دیں گے۔

پارلیمانی سیکریٹری نے کہا کہ ن لیگ، پی پی عوام کو مزید گمراہ نہیں کرسکتی، 2013 سے 2018 تک حکومت ن لیگ کی تھی، ن لیگ یہ کیسے کہہ سکتی ہے کہ 5 سال سے جواب نہیں دیا، ن لیگ کی حکومت انہوں نے پی ٹی آئی پر کیس کیوں نہیں کیا۔

فرخ حبیب نے کہا کہ الیکشن کمیشن کی اسکروٹنی کمیٹی پر بڑی ذمہ داری ہے، تمام سیاسی جماعتوں کے کیس کی روزانہ سماعت ہونی چاہیے، جن ٹی او آرز پر پی ٹی آئی کیس سنا جا رہا ہے ن لیگ اور پی پی کا کیس بھی سنا جائے۔

تحریک انصاف کے رہنما نے کہا کہ پی پی، ن لیگ کی جگہ جگہ ٹی ٹیز، منی لانڈرنگ کے ثبوت موجود ہیں، پی پی اور ن لیگ کو رسیدیں، منی ٹریل دینا ہوگی۔ انہوں نے کہا کہ عمران خان نے ہر دور میں اپنے اثاثے ڈکلیئر کیے، عمران خان نے کرکٹ سمیت ہر آمدن کی تفصیلات دیں۔

لاہور: صوبائی وزیر فیاض الحسن چوہان نے کہا کہ کل پریس کانفرنس کروں گا، فارن فنڈنگ کیس کے شواہد لے کرآؤں گا، پی پی، ن لیگ فارن فنڈنگ کے کچے چٹھے سامنے رکھوں گا۔

تفصیلات کے مطابق صوبائی وزیر فیاض الحسن چوہان کا کہنا ہے کہ گزشتہ 2 دن سے فارن فنڈنگ کیس پر واویلا مچایا جا رہا ہے،بجٹ آیا تو کہا بجٹ پاس نہیں کریں گے تو شاید حکومت گرجائے گی، مولانا کو آگے لگایا وہ پلان 420 لے آئے، ناکام ہو کر نو دو گیارہ ہوگئے۔

انہوں نے کہا کہ کل پریس کانفرنس کروں گا، فارن فنڈنگ کیس کے شواہد لے کرآؤں گا، پی پی، ن لیگ فارن فنڈنگ کے کچے چٹھے سامنے رکھوں گا۔

فیاض الحسن چوہان نے کہا کہ ہمارے اگلے 4 سال سکون سے گزریں گے، ہرمائیکرو، میکرو انڈیکیٹر ترقی کی طرف جا رہا ہے،ان کو ڈر ہے اگلے 4 سال حکومت رہی تو ان کی سیاست ختم ہوجائے گی۔

صوبائی وزیر نے کہا کہ نوازشریف اپنی پلیٹیں ٹھیک کرتے کرتے چمچوں کو پیچھے چھوڑ گئے، احسن اقبال نے یواے ای میں خاکروب کا اقامہ بنایا کس لیے بنایا۔ انہوں نے کہا کہ ہم نے ساڑھے 10 ارب ڈالرکا قرضہ ایک سال میں اتارا ہے۔

فارن فنڈنگ کیس سے پی ٹی آئی کو کوئی خطرہ نہیں، فیصل چوہدری

واضح رہے کہ تحریک انصاف کے سابق وکیل فیصل حسین چوہدری کا کہنا ہے کہ معاملہ فارن فنڈنگ کا نہیں بلکہ ممنوعہ فنڈنگ کا ہے، پی ٹی آئی کوکوئی خطرہ نہیں ہے۔