ARYNews.tv | Urdu – Har Lamha Bakhabar

Tag: ن لیگ

  • قومی اسمبلی میں جھگڑے پر مراد سعید اور جاوید لطیف دونوں قصوروار قرار

    قومی اسمبلی میں جھگڑے پر مراد سعید اور جاوید لطیف دونوں قصوروار قرار

    اسلام آباد: قومی اسمبلی کے اراکین مراد سعید اور جاوید لطیف میں جھگڑے کا معاملے پر تحقیقاتی کمیٹی نے اپنی رپورٹ اسپیکر اسمبلی کو پیش کردی ہے۔ کمیٹی نے جاوید لطیف کے ایوان پر آنے پر 8 دن جبکہ مراد سعید پر 2 دن کی پابندی لگانے کی سفارش کی ہے۔

    ذرائع کے مطابق اسپیکر قومی اسمبلی ایاز صادق کی ہدایت پر بنائی گئی تحقیقاتی کمیٹی نے قومی اسمبلی کی راہداری میں تحریک انصاف کے رکن مراد سعید اور مسلم لیگ ن کے رکن جاوید لطیف کے درمیان ہونے والی جھگڑے میں دونوں کو قصور وار قرار دیا ہے۔

    اپنی رپورٹ میں کمیٹی نے سفارش کی ہے کہ جاوید لطیف پر 8 دن جبکہ مراد سعید پر 2 دن کے لیے ایوان میں آنے پر پابندی لگائی جائے۔ تحقیقاتی کمیٹی نے اپنی رپورٹ اسپیکر قومی اسمبلی سردار ایاز صادق کو پیش کردی ہے جو اس فیصلے کا حتمی اعلان کریں گے۔

    واضح رہے کہ چند روز قبل ن لیگ کے رکن اسمبلی جاوید لطیف نے قومی اسمبلی کے اجلاس میں چیئرمین تحریک انصاف عمران خان کو غدار کہا جس پر تحریک انصاف نے شدید احتجاج کیا۔

    اجلاس ملتوی ہونے کے بعد اراکین ایوان سے باہر آئے تو مراد سعید اور جاوید لطیف میں زبانی جھڑپ ہوگئی جو بڑھ کر ہاتھا پائی تک جا پہنچی۔ اس دوران جاوید لطیف نے مراد سعید کے خلاف نازیبا زبان بھی استعمال کی۔

    بعد ازاں چیئرمین تحریک انصاف عمران خان نے پارٹی رہنماؤں اور کارکنوں کو ایسی تقریبات میں شرکت سے گریز کی ہدایت کردی تھی جہاں جاوید لطیف کو مدعو کیا گیا ہو۔

    عمران خان کا کہنا تھا کہ کسی بھی مہذب معاشرے میں ایسی غیر اخلاقی حرکات کرنے والے افراد پر عوامی اجتماعات میں آنے پر پابندی لگا دی جاتی ہے۔

  • قومی اسمبلی میں تحریک انصاف اور ن لیگ کے کارکن آپس میں دست و گریباں

    قومی اسمبلی میں تحریک انصاف اور ن لیگ کے کارکن آپس میں دست و گریباں

    اسلام آباد: قومی اسمبلی میں ن لیگ اور تحریک انصاف کے ارکان کے درمیان تلخ کلامی ہوئی، باہر نکل کر لابی میں مراد سعید اور جاوید آفریدی ایک بار پھر الجھ پڑے۔

    تفصیلات کے مطابق عمران خان سے متعلق ریمارکس دینے پر ن لیگ اور تحریک انصاف کے کارکنان ایوان کے اندر اور باہر آمنے سامنے آگئے۔ تحریک انصاف کے مراد سعید اور جاوید لطیف میں ہاتھا پائی اور تلخ جملوں کا تبادلہ ہوا۔

    قومی اسمبلی کے اجلاس کے دوران ن لیگ کے رکن جاوید لطیف نے کہا کہ غیر ملکی کھلاڑیوں کو پھٹیچر اور ریلو کٹا کہا گیا۔ جس طرح کے بیانات دیے جاتے ہیں وہ بھی غداری کے زمرے میں آتے ہیں۔ تحریک انصاف اپنے لیڈر کا پاگل پن ختم کرے۔

    جاوید لطیف کے بیان پر تحریک انصاف نے شدید احتجاج کیا۔ اجلاس ملتوی ہونے پر اراکین ایوان سے باہر آئے تو مراد سعید اور جاوید لطیف میں جھڑپ ہوگئی۔

    پارلیمنٹ کی لابی میں دونوں اراکین اسمبلی کے درمیان ہاتھا پائی ہوئی۔ قریب کھڑے لوگوں نے بیچ بچاؤ کروایا۔

    بعد ازاں تحریک انصاف کے رکن مراد سعید نے کہا کہ جاوید لطیف نے میرے لیڈر کو غدار کہا، نازیبا لفظ استعمال کیے گئے۔ کرپشن کیس کا فیصلہ آنے والا ہے تو یہ لوگ ایسے ہتھکنڈے استعمال کر رہے ہیں۔

  • ن لیگی امیدواروں کوووٹ ڈالنے والوں کی پارٹی میں جگہ نہیں،عمران خان

    ن لیگی امیدواروں کوووٹ ڈالنے والوں کی پارٹی میں جگہ نہیں،عمران خان

    اسلام آباد: چئیرمین تحریک انصاف عمران خان کا کہناہے کہ فیصل آباد سمیت دیگراضلاع میں ن لیگی امیدواروں کو ووٹ ڈالنے والے ممبران کی پارٹی میں اب کوئی جگہ نہیں ہے۔

    تفصیلات کےمطابق پنجاب میں بلدیاتی انتخابات کے آخری مرحلے میں ن لیگ کی کامیا بی پر تحریک انصاف کےسربراہ عمران خان نےکہا کہ مسلم لیگ ن کے امیدواروں کوووٹ دینے والوں کی پارٹی میں جگہ نہیں ہے۔

    سماجی رابطے کی ویب سائٹ ٹویٹر میں عمران خان نے اپنی ٹویٹ میں کہا کہ پی ٹی آئی کے وہ تمام ممبران جنہوں نے فیصل آباد سمیت پنجاب کے دیگراضلاع میں لیگی امیدواروں کو ووٹ ڈالا ان کی پارٹی میں کوجگہ نہیں،انہیں پارٹی سے نکال دیا جائے گا۔

    مزید پڑھیں:پنجاب میں بلدیاتی انتخابات کا آخری مرحلہ‘ن لیگ کامیاب

    یاد رہے کہ گزشتہ روز فیصل آباد کے میئر کے انتخاب میں تحریک انصاف کے امیدواروں نے رانا ثناء اللہ گروپ کی حمایت کی تھی۔

    واضح رہے کہ گزشتہ روزفیصل آباد کے میئر کے انتخاب میں رانا ثناءاللہ گروپ کےملک رازق 105 ووٹ لے کر مئیر منتخب ہوگئے۔

  • ن لیگ سے وزیر خارجہ نہ ملنا انتہائی نا اہلی ہے، مولا بخش چانڈیو

    ن لیگ سے وزیر خارجہ نہ ملنا انتہائی نا اہلی ہے، مولا بخش چانڈیو

    حیدرآباد: پیپلز پارٹی کے رہنما مولا بخش چانڈیو کا کہنا ہے عمران خان اور نواز شریف کو قومی اور سیاسی رہنما مانتا ہوں، انہوں نے کہا عمران خان بتائیں کامیاب جلسے سے حاصل کیا ہوا۔

    حیدر آباد میں پریس کانفرنس کرتے ہوئے پاکستان پیپلز پارٹی کے رہنما مولا بخش چانڈیو کا کہنا تھا انتہائی نا اہلی کی بات ہے کہ مسلم لیگ ن سے کوئی وزیر خارجہ نہیں مل سکا، انہوں نے کہا عمران خان اور میاں صاحب دونوں کو قومی اور سیاسی رہنما مانتا ہوں ۔

    مولا بخش چانڈیو نے کہا ایک بات طے ہے کہ مخالفین کے معاملے میں دونوں غیر سنجیدہ ہیں، عمران خان جلسہ کرنے میں کامیاب ہوگئے لیکن جلسے سے حاصل کیا ہوا ؟۔

    انہوں نے کہا کہ وہ اے پی سی بلاتے تو شیخ رشید کو ضرور مدعو کرتے، مولا بخش چانڈیو کا کہنا تھا رینجرز صوبے میں حکومت کے ساتھ تعاون اور اختیارات استعمال کرتی رہے گی، پولیس اور رینجرز کی کوشش سے کراچی میں امن قائم ہوا ہے۔

  • چیچہ وطنی،ضمنی الیکشن کے لیے پولنگ ختم،گنتی کا عمل شروع

    چیچہ وطنی،ضمنی الیکشن کے لیے پولنگ ختم،گنتی کا عمل شروع

    لاہور : ساہیوال کی تحصیل چیچہ وطنی کے حلقہ این اے 162 میں ضمنی الیکشن کے لیے پولنگ کا وقت ختم ہونے کے بعد ووٹوں کی گنتی کا عمل شروع ہو گیا۔

    تفصیلات کےمطابق آج صبح سے بچیچہ وطنی کے حلقہ این اے 162 میں ضمنی الیکشن کے لیے پولنگ کا عمل پُر امن طریقے سے جاری رہا اور مقررہ وقت تک لوگ اپنا حق رائے دہی استعمال کرتے رہے تا ہم ووٹ کا ٹرن آؤٹ معمول سے کم دیکھنے میں آیا۔

    پولنگ کا وقت ختم ہونے کے بعد پولنگ اسٹیشن کے دروازے بند کردیے گئے اور ووٹوں کی گنتی کا عمل پریزائڈنگ آفیسر کی زیرز نگرانی شروع کردیا گیا ہے پولنگ کے دوران کوئی بھی ناخوشگوار واقعہ دیکھنے میں نہیں آیا۔

    اس حلقےمیں تحریک انصاف کے رائے محمد مرتضیٰ اقبال، ن لیگ کےچوہدری محمد طفیل جٹ اور پیپلزپارٹی کے شہزاد سعید چیمہ کے درمیان سخت مقابلہ متوقع ہے۔

    خیال رہے کہ حلقہ این اے 162 کی نشست عام انتخابات میں کامیاب ہونے والے پاکستان تحریک انصاف کے ایم این اے رائے حسن نواز کی جانب سے اثاثے چھپانے کے باعث نااہل قرار دیے جانے کے بعد خالی ہوئی تھی۔

    چیچہ وطنی کے حلقہ این اے 162 کے ضمنی الیکشن میں تحریک انصاف کے رائے محمد مرتضیٰ اقبال، ن لیگ کےچوہدری محمد طفیل جٹ اور پیپلزپارٹی کے شہزاد سعید چیمہ کے علاوہ چار آزاد امیدوار بھی انتخابی دنگل میں ہیں۔

    حلقہ این اے 162چیچہ وطنی شہر ،کسوال اور ہڑپہ کی دیہی آبادی پر مشتمل ہے جہاں رجسٹرڈ ووٹرز کی تعداد تین لاکھ چھ ہزار ہے۔جن میں سے ایک لاکھ 74 ہزار مرد اور ایک لاکھ بتیس ہزار خواتین ووٹرز ہیں۔

    اس حلقے میں کل 293 پولنگ اسٹشینز بنائے گئے ان میں سے 22کوحساس ترین قرار دیا گیا ہے۔کسی بھی ناخوشگوار واقعے سے نمٹنے کے لیے حلقےمیں پولیس کے ساتھ پاک فوج بھی پولنگ اسٹیشنز کے اندر اور باہر سیکورٹی کے فرائض سرانجام دے گی۔

    واضح رہے کہ پاکستان تحریک انصاف کے سربراہ عمران خان اور مسلم لیگ ن کے رہنما حمزہ شہباز شریف چیچہ وطنی آکر اپنے اپنے امیدواروں کے حق میں جلسے کر چکے ہیں۔

  • زعیم قادری کی پریس کانفرنس میں لیگی کارکنان اور صحافیوں میں جھگڑا

    زعیم قادری کی پریس کانفرنس میں لیگی کارکنان اور صحافیوں میں جھگڑا

    لاہور: ترجمان پنجاب حکومت اور ن لیگی رہنما زعیم قادری کی پریس کانفرنس کے دوران گلو بٹ کے بھائی نے صحافیوں سے شدید بدتمیزی کا مظاہرہ کیا تاہم ن لیگ نے گلو بٹ کے بھائی سے لاتعلقی کا اعلان کردیا جس کے بعد صحافیوں نے گلو بٹ کے بھائی کو گھیرے میں لے لیا۔

    لاہور میں پنجاب حکومت کے ترجمان اور ن لیگی رہنما زعیم قادری کی پریس کانفرنس کے دوران نواز شریف جانثار فورس نے وہاں موجود صحافیوں سے شدید بدتمیزی کا مظاہرہ کیا۔ اس دوران ن لیگی کارکنان آپس میں باہم دست و گریباں بھی ہوگئے۔

    سانحہ ماڈل ٹاؤن میں گاڑیوں کے شیشے توڑنے والے گلو بٹ کا بھائی بھی پریس کانفرنس میں موجود تھا جس نے صحافیوں سے بدتمیزی کی اور انہیں دھکے دیے۔ اس دوران زعیم قادری اٹھ کر پریس کلب کے صدر کے کمرے میں جا کر بیٹھ گئے۔

    رائیونڈ مارچ روکنے کے لیے مسلم لیگ یوتھ ونگ کی ڈنڈا بردار فورس قائم *

    صحافیوں نے پریس کلب کا مرکزی گیٹ بند کردیا اور گلو بٹ کے بھائی کے خلاف احتجاج شروع کردیا۔ ان کا مطالبہ تھا کہ گلو بٹ کے بھائی کی بدتمیزی کا نوٹس لیا جائے۔ ن لیگ نے گلو بٹ کے بھائی سے لاتعلقی کا اعلان کرتے ہوئے صحافیوں سے معذرت طلب کی تاہم صحافیوں کا کہنا تھا کہ معافی سے کام نہیں چلے گا بلکہ زعیم قادری گلو بٹ کے بھائی کے خلاف ایکشن لیں۔

    دوسری جانب تحریک انصاف کے رہنما اعجاز چوہدری نے اے آر وائی نیوز سے خصوصی گفتگو کرتے ہوئے کہا کہ ن لیگ شدید بوکھلاہٹ میں مبتلا ہوگئی ہے۔ ہمیں پاناما پیپرز کا احتساب چاہیئے جس کا ابھی تک حکومت نے کوئی جواب نہیں دیا۔

    انہوں نے صحافیوں سے بدتمیزی کی شدید مذمت کرتے ہوئے کہا کہ حکومت کے پاس کوئی جواب نہیں لہٰذا یہ ڈنڈے بازی پر اتر آئے ہیں۔

    دوسری جانب عوامی مسلم لیگ کے سربراہ شیخ رشید احمد نے کہا کہ ن لیگ بدمعاش لے کر پھر رہی ہے، شرافت ان سے بہت دور ہوگئی ہے۔ انہوں نے کہا کہ رائیونڈ مارچ کے شرکا جاتی امرا کی طرف جا کر ہی رکیں گے۔

    واضح رہے کہ زعیم قادری کی پریس کانفرنس میں مخالفین کو مارنے کی دھمکی دینے والا کارکن بھی دیکھا گیا۔

  • ن لیگ کے 100 یوسی چیئرمین پارٹی کے خلاف پھٹ پڑے

    ن لیگ کے 100 یوسی چیئرمین پارٹی کے خلاف پھٹ پڑے

    فیصل آباد : ن لیگ کے سو سے زائد چیئرمینوں نے استعفوں کی دھمکی دے دی۔

    تفصیلات کے مطابق فیصل آباد میں یوسی چیئرمین اپنی ہی جماعت مسلم لیگ ن کے خلاف پھٹ پڑے۔ حکومت کو ایک ہفتے کا الٹی میٹم دےدیا۔

    پولیس پر نیشنل ایکشن پلان ناکام بنانے کا الزام بھی لگادیا.فیصل آباد میں نواز لیگ کے بلدیاتی نمائندوں نے پولیس کارروائیوں کےخلاف سات دن کا الٹی میٹم دے دیا۔

    سوسےزائد چیئرمینوں نےاستعفوں کی دھمکی دےڈالی۔ یو سی چیئرمینز نے پریس کانفرنس میں الزام لگایا کہ بااثر شخصیات کی ایماء پر ہراساں کی جارہاہے۔

    منتخب عوامی نمائندوں نے کہا کہ اگر کارروائی کرنے والے پولیس افسران کو معطل نہ کیا گیا تو مستعفی ہوجائیں گے۔

    ن لیگی چیئرمینز نے کہا کہ پولیس نیشنل ایکشن پلان کوناکام بنارہی ہے۔ یاد رہے کہ فیصل آباد میں بلدیاتی انتخابات کےدوران لیگی رہنما عابد شیرعلی اوررانا ثناءاللہ گروپ آمنے سامنے آگئے تھے۔

     

  • سپریم کورٹ نے پنجاب کے حلقہ پی پی 232 میں دوبارہ الیکشن کرانے کا حکم دے دیا

    سپریم کورٹ نے پنجاب کے حلقہ پی پی 232 میں دوبارہ الیکشن کرانے کا حکم دے دیا

    اسلام آباد: سپریم کورٹ نے الیکشن ٹریبونل کا فیصلہ برقرار رکھتے ہوئے پنجاب اسمبلی کے حلقہ پی پی 232 میں دوبارہ الیکشن کرانے کا حکم دے دیا۔

    تفصیلات کے مطابق سپریم کورٹ نے پنجاب اسمبلی کے حلقہ پی پی 232 سے کامیاب آزاد امیدوار رکنِ صوبائی اسمبلی کی درخواست کو مسترد کرتے ہوئے الیکشن ٹریبونل کا فیصلہ برقرار رکھا اور حلقہ میں دوبارہ الیکشن کرانے کا حکم دے دیا،عدالتی فیصلے پر مخالف امیدوار غلام محی الدین نے اطمینان کا مظاہرہ کیا۔

    واضع رہے 2013 کے عام انتخابات میں پنجاب اسمبلی کے حلقہ پی پی 232 وہاڑی-1سے آزاد امیدوار چوہدری محمد یوسف کسیلا 50260 ووٹ لے کر کامیاب ہوئے تھے،جب کہ مد مقابل مسلم لیگ (ن) کے امیدوار غالم محی الدین نے 43665 ووٹ حاصل کیے تھے۔

    pic-2

    یاد رہے آزاد امیدوار یوسف کسیلا نے بعد ازاں مسلم لیگ (ن) میں شمولیت اختیار کرلی تھی، جس کے بعد انہیں پنجاب اسمبلی کی اسٹیندنگ کمیٹی برائے ’’ایکسائز اینڈ ٹیکسیشن‘‘ کا چئیر پرسن بنا دیا گیا تھا۔

    ECP

    تاہم 2013 کے عام انتخاب میں مسلم لیگ (ن) کے امیدوار غلام محی الدین نے الیکشن ٹریبونل میں درخواست دائر کی کہ کامیاب آزاد امیدوار یوسف کسیلا نے الیکشن میں کیے گئے اخراجات کو چھپا کرالیکشن کمیشن کے قواعد و ضوابط کی کھلی خلاف ورزی کی ہے،اور اب وہ ’’صادق اور ’’امین‘‘ نہیں رہے،اس لیے الیکشن کو کالعدم قرار دے کر حلقہ میں دوبارہ الیکشن کرائے جائیں۔

    pic-1

    الیکشن ٹریبونل نے غلام محی الدین کے حق میں فیصلہ دے کر حلقہ کے انتخاب کو کالعدم قرار دیا،جس پر کامیاب امیدوار یوسف کسیلا الیکشن ٹریبونل کے فیصلے کے خلاف سپریم کورٹ چلے گئے تھے،تاہم آج سپریم کورٹ نے بھی الیکشن ٹریبونل کے فیصلے کو برقرار رکھتے ہوئے حلقہ پی پی 232 میں دوبارہ الیکشن کرانے کا حکم دے دیا ہے۔

    یہ امر بھی دلچسپی سے خالی نہیں کہ کیس ہارنے والے آزاد امیدوار نے بھی بعد ازاں ن لیگ میں شامل ہوگئے تھے جب کہ کیس جیتنے والے غلام محی الدین اِسی حلقے سے ن لیگ کے ٹکٹ ہولڈرتھے،دیکھنا یہ ہے کہ ن لیگ کی اعلیٰ قیادت اس دلچسپ صورتِ حال پر کیا لائحہ عمل وضع کرتی ہے۔

    یاد رہے 2013 کے عام الیکشن میں ٹکت کی تقسیم کے حوالے سے بوری والہ سمیت کئی حلقوں میں اعتراضات اُٹھائے گئے تھے،اور یہ اختلاف ن لیگ کی شکست کا باعث بنا تھا،تاہم کامیاب امیدوار یوسف کسیلا کے ن لیگ میں شامل ہونے سے قیادت نے اطمینان کا اظہار کیا تھا۔

  • ن لیگ کا وزیراعظم پر لگے الزامات کا ہر محاذ پر جواب دینے کافیصلہ

    ن لیگ کا وزیراعظم پر لگے الزامات کا ہر محاذ پر جواب دینے کافیصلہ

    اسلام آباد: وفاقی وزیرخزانہ اسحق ڈار کی زیرصدارت ن لیگ کے مرکزی رہنماوٴں کا مشاورتی اجلاس وزیراعظم ہاوٴس اسلام آباد میں ہوا۔

    اجلاس میں وزیراعلی پنجاب شہباز شریف،وفاقی وزراپرویز رشید،عبدالقادر بلوچ، خواجہ آصف، خواجہ سعد رفیق، زاہد حامد نے شرکت کی۔ ن لیگ کے سینئر رہنما مشاہد اللہ خان ، وزیراعظم کی صاحبزادی مریم نواز اور اٹارنی جنرل نے بھی اجلاس میں شرکت کی، اجلاس میں وزیراعظم اور ان کے خاندان پر لگائے جانے والے تمام الزامات کا ہر محاذ پر جواب دینے کا فیصلہ کیا گیا۔

    شرکا کا کہنا تھا ن لیگ نے اس سے پہلے بھی ایسی تمام سازشوں اور سازشی عناصر کا مقابلہ کیا، اجلاس کے شرکا نے پاکستان کے اقتصادی ایجنڈے کو سبوتاژ کرنے کی کوشش پر افسوس کا اظہار کیا، ذاتی خواہشات کے لیے بے بنیاد الزامات عائد کیے جارہے ہیں۔

    اجلاس میں فیصلہ کیا گیا کہ تمام سیاسی قوتوں کو اس مذموم ایجنڈے کے اثرات سے آگاہ کیا جائے گا، اس موقع پر اسحاق ڈار نے شرکا کو وزیراعظم کی دی جانے والی ہدایات پہنچائیں۔

    وزیراعظم نے ہدایت کی ہے کہ سازشیوں کو اہمیت نہ دی جائے،سازشوں پر وقت ضائع کرنے کے بجائے تمام توجہ جاری منصوبوں کو مکمل کرنے پردی جائے۔

  • عمران اسماعیل نے دانیال عزیز کیخلاف مقدمے کی درخواست دیدی

    عمران اسماعیل نے دانیال عزیز کیخلاف مقدمے کی درخواست دیدی

    کراچی: تحریک انصاف نے ن لیگ کے رہنما دانیال عزیز کے خلاف مقدمہ درج کرنے کی درخواست جمع کرادی۔

    تحریک انصاف کے رہنما عمران اسماعیل پارٹی کے دیگر رہنماؤں فیصل واڈا اور خرم شیر زمان کے ساتھ ن لیگ کے رہنما دانیال عزیز کے خلاف مقدمے کی درخواست جمع کرانے کراچی کے درخشاں تھانے پہنچے جہاں انہوں نے دانیال عزیز کی جانب سے مبینہ دھمکیوں پر ان کے خلاف مقدمے کے لیے درخواست جمع کرائی۔

    عمران اسماعیل نے درخواست میں مؤقف اختیار کیا کہ دانیال عزیز نے مجھے ٹی وی شو میں بیٹھ کر دھمکیاں دیتے ہوئے کہا کہ اب تمہارا وقت ختم ہوچکا ہے اور میں تمہاری زبان کاٹ دوں گا جس پر مجھے ان سے خطرہ لاحق ہے۔

    انہوں نے کہا کہ ہم ن لیگ کا ہر محاذ پر مقابلہ کریں گے، پیپلزپارٹی اور ن لیگ کی حکومتوں نے معاہدہ کر رکھا ہے جس کے تحت دونوں جماعتیں ایک دوسرے کے رہنماؤں کے خلاف مقدمات درج نہیں ہونے دیتیں لہٰذا مقدمے کی درخواست دینے سے کچھ نہیں ہوا تو پھر عدالت سے رجوع کریں گے۔